វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4964 នាក់
ម្សិលមិញ 10264 នាក់
សរុប 14144146 នាក់
ភ្នំពេញ៖នៅថ្ងៃទី១ មីនាចៅក្រមសាលាដំបូងរាជធានីភ្នំពេញ បន្តសវនាការលើកទី១១ សួរដេញដោលអ្នកជំនាញផ្នែកច្បាប់ និងវិទ្យាសាស្ត្រនយោបាយអន្តរជាតិ កញ្ញា សេង ធារី ពីការបង្ហោះសារ«លេខ៩» គាំទ្រដល់យុទ្ធនាការម្រាមដៃ៩ របស់លោក សម រង្ស៊ី ដែលប្រឆាំងនឹងរដ្ឋាភិបាលឯកបក្សស។ កញ្ញា សេង ធារី ថ្លែងថា ការបកស្រាយនេះមិនត្រឹមត្រូវ ខណៈសង្គមស៊ីវិលមិនរំពឹងថា ប្រព័ន្ធតុលាការអាចផ្ដល់យុត្តិធម៌ដល់គូរភាគីក្នុងសំណុំរឿងនយោបាយបានទេ។
កញ្ញា សេង ធារី ពន្យល់ប្រាប់ចៅក្រម និងតំណាងអយ្យការថា ការសរសេរលេខ៩នៅលើហ្វេសប៊ុក (Facebook) មិនមែនបានន័យថា កញ្ញាចង់ផ្ដួលរំលំរដ្ឋាភិបាលតាមរយៈបដិវត្តន៍ពណ៌ ដូចទស្សនៈរបស់មន្ត្រីតុលាការដែលលើកយកមកចោទប្រកាន់នេះទេ។ កញ្ញា បញ្ជាក់ថា ភាសាផ្ដួលរំលំ ឬការធ្វើឲ្យរំលំ ដែលចៅក្រម និងតំណាងអយ្យការ បានបកស្រាយក្នុងន័យផ្សេង។ ប៉ុន្តែន័យផ្ដួលរំលំរបស់កញ្ញា សេង ធារី សំដៅដល់បែបផែននៃលទ្ធិប្រជាធិបតេយ្យ។
ក្នុងសវនាការលើកនេះ មិនតានតឹងដូចសវនាការមុនៗទេ ដោយសារមន្ត្រីតុលាការលើកយកតែអង្គហេតុលេខ៩តែមួយគត់ មកសួរដេញដោលកញ្ញា សេង ធារី។ ប្រធានក្រុមប្រឹក្សាជំនុំជម្រះចៅក្រម រស់ ពិសិដ្ឋ និងតំណាងអយ្យការ លោក សេង ហៀង ក៏មិនសូវបានសួរដេញដោលដែរ គឺចៅក្រមបានទុកលទ្ធភាពច្រើន ឲ្យមេធាវីរបស់កញ្ញាសេង ធារី ជាជនជាប់ចោទសួរដេញដោលកូនក្ដីខ្លួន។ឯកងកម្លាំងវិញ មិនត្រូវបានដាក់ពង្រាយច្រើនទេគឺមានតែនគរបាលដែលឈរយាមល្បាតមុខតុលាការប៉ុណ្ណោះ។
កញ្ញា សេង ធារី ឲ្យកាសែតដឹងថាគាត់ពេញចិត្តចំពោះការតាំងសំណួររបស់មេធាវី ជួង ជូងឺ និងភាពស៊ីចង្វាក់គ្នារវាងកញ្ញា និងមេធាវី ជូង ជូងី។ កញ្ញាបន្តថា ការតទល់ក្ដីក្នុងសវនាការលើកនេះ ហាក់បានបង្ហាញពីការប្រមូលផ្តុំកម្លាំង និងចំណេះដឹងគ្នា ដើម្បីពន្យល់ប្រាប់ទៅចៅក្រម និងតំណាងអយ្យការថា សកម្មភាពបញ្ចេញមតិរបស់កញ្ញា និងសកម្មជនបក្សប្រឆាំងផ្សេងទៀត មិនមានន័យសុទ្ធតែអាក្រក់ដូចទស្សនៈរបស់អាជ្ញាធរដែលបានចោទប្រកាន់កន្លងមកទេ។
ក្នុងបន្ទប់សវនាការក្រៅពីកញ្ញា សេង ធារី ហើយនោះ ក៏មានជនជាប់ចោទចំនួន៣នាក់ ជាសកម្មជនបក្សប្រឆាំងកំពុងជាប់ឃុំបណ្ដោះរយៈពេលជិត២ឆ្នាំមកហើយ គឺ លោក ហេង ច័ន្ទសុទ្ធី លោក កាក់ កុម្ភារ និងលោក ទុំ ប៊ុនថន។ ចៅក្រមមិនបានសួរដេញដោល ឬអនុញ្ញាតឲ្យអ្នកទាំង៣នាក់បានបញ្ចេញមតិឡើយ។ ក្រោយស្ដាប់ការសួរដេញដោលគ្នារវាងមេធាវី ជាមួយកញ្ញាសេង ធារី ចប់ ប្រធានក្រុមប្រឹក្សាជំនុំជម្រះបន្តលើកពេលសវនាការទៅថ្ងៃទី១០ មីនា សប្ដាហ៍ក្រោយ ដោយចៅក្រមនឹងកោះហៅនគរបាលយុត្តិធម៌ ជាអ្នកកាន់សំណុំរឿងនេះមកបង្ហាញភស្ដុតាង។
ចប់ពីសវនាការ កញ្ញា សេង ធារី បានប្រាប់ក្រុមអ្នកសារព័ត៌មាននៅខាងមុខតុលាការថា កញ្ញា និងមេធាវី នៅតែទាមទារឲ្យតុលាការមោឃៈភាព ឬបញ្ឈប់សវនាការដ៏ចម្រូងចម្រះនេះ ក្រោមហេតុផលថា ចៅក្រមបានរំលោភបំពានលើនីតិវិធីនៃសំណុំរឿងនេះយ៉ាងធ្ងន់ធ្ងរ។ កញ្ញា ក៏បានប្រាប់ចៅក្រមដែរថា គួរកុំឲ្យចំណាយពេលវេលា និងធនធានរបស់រដ្ឋមកខ្ជះខ្ជាយលើសំណុំរឿងបែបនយោបាយ ព្រោះកញ្ញាថាមានរឿងអយុត្តិធម៌ច្រើនណាស់ ដែលរង់ចាំតុលាការជួយស៊ើបអង្កេត និងកាត់ក្ដី៖ «ចំពោះខ្ញុំ! ខ្ញុំរីករាយនៅក្នុងការបើកឲ្យខ្ញុំមានទីកន្លែង (បន្ទប់សវនាការ) ពន្យល់អំពីលទ្ធិប្រជាធិបតេយ្យ អំពីសេរីភាព អំពីនីតិរដ្ឋ។ប៉ុន្តែខ្ញុំបានលើកឡើងថានេះ ជាការខ្ជះខ្ជាយពេលវេលារបស់អ្នកទោសមនសិការ ខ្ជះខ្ជាយធនធានរដ្ឋ នៅក្នុងការផ្ដល់ប្រាក់ខែឲ្យចៅក្រម ឲ្យព្រះរាជអាជ្ញា ឲ្យអ្នកយាមនៅក្នុងការមកចោទប្រកាន់មនុស្សស្លូតត្រង់ដូចពួកខ្ញុំ»។
លោក សេង ហៀងតំណាងអយ្យការ បានចោទកញ្ញា សេង ធារី ពីបទរួមគំនិតក្បត់ និងញុះញង់ឲ្យមានភាពវឹកវរធ្ងន់ធ្ងរដល់សង្គម ពាក់ព័ន្ធការបង្ហោះសារគាំទ្រផែនការមាតុភូមិនិវត្តន៍របស់ប្រធានស្ដីទីគណបក្សសង្គ្រោះជាតិលោក សម រង្ស៊ី នៅឆ្នាំ២០១៩។ សំណុំរឿងនេះ មានថ្នាក់ដឹកនាំ និងសកម្មជនបក្សប្រឆាំងសរុប ១២០នាក់។តែចៅក្រមស៊ើបសួរ លោក កូយ សៅ បានបំបែកសំណុំរឿងជា២ ដោយកញ្ញា សេង ធារី ស្ថិតក្នុងចំណោមជនជាប់ចោទ ៤២នាក់។