វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 769 នាក់
ម្សិលមិញ 10264 នាក់
សរុប 14139951 នាក់
ភ្នំពេញ៖សាលាដំបូងរាជធានីភ្នំពេញនៅថ្ងៃទី១មិនា២០២១នេះបានកាត់ទោស លោក សម រង្ស៊ី ប្រធានស្តីទីអតីតគណបក្សសង្គ្រោះជាតិឲ្យជាប់ពន្ធនាគាររយៈពេល២៥ឆ្នាំ ព្រមទាំងដកហូតសិទ្ធិបោះឆ្នោត និងសិទ្ធិឈរឈ្មោះឲ្យគេបោះឆ្នោតផងដែរ។ ឯ លោកស្រី មូរ សុខហួរ និងលោក អេង ឆៃអ៊ាង អនុប្រធានអតីតគណបក្សសង្គ្រោះជាតិ ឲ្យជាប់ពន្ធនាគារម្នាក់ៗចំនួន២២ឆ្នាំ។
ក្រៅពីនេះ មន្ត្រីជាន់ខ្ពស់អតីតបក្សប្រឆាំងនេះ៦រូបផ្សេងទៀត រួមមាន លោកស្រី ជូឡុង សូមួរ៉ា លោក ហូរ វ៉ាន់ លោក ម៉ែន សុថាវរិន្ទ្រ លោក នុត រំដួល លោក ឡុង រី និងលោក អ៊ូ ច័ន្ទឫទ្ធិតុលាការក៏បានដាក់ទោសឲ្យជាប់ពន្ធនាគាររយៈពេល២០ឆ្នាំ ។ បន្ថែមពីនេះ តុលាការក្រុងភ្នំពេញ ក៏បានប្រកាសដកហូតជាស្ថាពរនូវសិទ្ធិបោះឆ្នោត និងសិទ្ធិឈរឈ្មោះឲ្យគេបោះឆ្នោតទៀតផង។
លោក សម រង្ស៊ីដែលរស់នៅក្រៅប្រទេស តាមរយៈទំព័រហ្វេសប៊ុករបស់លោក បានហៅសាលក្រមរបស់សាលាដំបូងក្រុងភ្នំពេញនៅថ្ងៃនេះថា ជាសាលក្រមគួរឲ្យអស់សំណើច ហើយឆ្លុះបញ្ចាំងពីការភ័យខ្លាចរបស់លោក ហ៊ុន សែន ដែលចង់កម្ចាត់លោក សម រង្ស៊ី ចេញពីឆាកនយោបាយ នៃប្រទេសកម្ពុជា។ លោក សម រង្ស៊ី ថា បើមានការបោះឆ្នោតត្រឹមត្រូវ របបផ្តាច់ការហួសសម័យ នឹងមកដល់ទីបញ្ចប់របស់វា។
សូមបញ្ជាក់ថា៖ កាលពីថ្ងៃទី២៦ ខែកញ្ញា ឆ្នាំ២០១៩លោក សម រង្ស៉ី និងថ្នាក់ដឹកនាំជាន់ខ្ពស់អតីតគណបក្សសង្គ្រោះជាតិ ៨នាក់ផ្សេងទៀត ត្រូវបានអយ្យការអមសាលាដំបូងរាជធានីភ្នំពេញ ចោទប្រកាន់ពីបទ ពាក់ព័ន្ធនឹងការប៉ុនប៉ងធ្វើរដ្ឋប្រហារ ផ្ដួលរំលំរាជរដ្ឋាភិបាលស្របច្បាប់ ឬ ឧបឃាត ក្រោមឧបាយកលជាយុទ្ធសាស្ត្រនៃការវិលត្រឡប់ចូលប្រទេសកម្ពុជាវិញ កាលពីថ្ងៃទី ៩ វិច្ឆិកា ឆ្នាំ២០១៩ដែលទទួលបរាជ័យ៕