វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 10039 នាក់
ម្សិលមិញ 8227 នាក់
សរុប 14136920 នាក់
ប្រទេសមីយ៉ាន់ម៉ា៖ កងសេរីកាកម្លាំងការពារពលរដ្ឋដែលបង្កើតឡើងដោយរដ្ឋាភិបាលឯកភាពជាតិគាំទ្រលទ្ធិប្រជាធិបតេយ្យឬហៅកាត់ថា (NUG)(រដ្ឋាភិបាលស្រមោលតាមព្រឹត្តិន័យរបស់ប្រទេសមីយ៉ាន់ម៉ាបាននិងកំពុងតែប្រមែប្រមូលនូវវត្ថុតាងមួយចំនួន រួមទាំងភស្តុតាងរូបីដើម្បីដាក់បន្ទុកតាមយន្តការច្បាប់អន្តរជាតិដល់ក្រុមយោធាដែលបានប្រព្រឹត្តិអំពើហិង្សាមកលើពលរដ្ឋស៊ីវិលជាពិសេសអំឡុងនៃការតវ៉ានៅពាសពេញប្រទេសក្នុងរយៈពេលពេញមួយឆ្នាំនេះ (១កុម្ភះ ឆ្នាំ២០២១ -១កុម្ភះ ឆ្នាំ២០២២)។
សេចក្តីរាយការណ៍របស់បណ្តាញផ្សព្វផ្សាយក្នុងតំបន់បានឱ្យដឹងដែរថា ភស្តុតាងដែលគេកំពុងតែប្រមែប្រមូលក្នុងនោះរួមមានការធ្វើទារុណកម្ម ការសម្លាប់ទ្រង់ទ្រាយធំ រួមទាំងសាកសពកប់រួមគ្នា និងការស្លាប់របស់ក្រុមបាតុករនៅតាមដងផ្លូវពេលដែលកំពុងតែធ្វើបាតុកម្មតវ៉ា ។នៅក្នុងរយៈពេល ១២ ខែកន្លងមកនេះ មានរឿងរ៉ាវជាច្រើនដែលគេប្រមូលបានមកពីជនជាសាក្សីទាំងនៅកន្លែងកើតហេតុ និងក្រៅពីកន្លែងកើត ដោយការប្រមូលទិន្នន័យធ្វើឡើងតាមការសម្ភាសន៍ដោយផ្ទាល់ ចុះអង្កេតផ្ទាល់ និងព្យាយាមជីកកកាយតំបន់ដែលកប់សាកសពជនរងគ្រោះដើម្បីយកសាកសពពិនិត្យឡើងវិញ ក្នុងនោះគេរកឃើញថា មានការកាត់បំពង់ក កាត់ប្រដាប់ភេទ និងខ្វេះគ្រាប់ភ្នែកចេញពីសាកសពជនរងគ្រោះផងដែរ។
សាក្សីជាច្រើននាក់ដែលគេសម្ភាសន៍ផ្ទាល់បាននិយាយថា ពួកគេរស់នៅទាំងសភាពភ័យខ្លាចក្នុងរយៈពេល១២កន្លងមកនេះ ខណៈដែលក្រុមអ្នកភូមិនៅតែបន្តរត់ភៀសខ្លួនចេញពីលំនៅដ្ឋានរបស់ខ្លួន ដោយសារតែមានការបាញ់បោះដាក់គ្នាទៅវិញទៅមករវាងក្រុមយោធា និងក្រុមអ្នកប៉ះបោរនៅតាមបណ្តារដ្ឋមួយចំនួន។អ្នកស្រុកម្នាក់ឈ្មោះ Sidoti រៀបរាប់ប្រាប់បណ្តាញផ្សព្វផ្សាយក្នុងតំបន់ថា “យោធាមីយ៉ាន់ម៉ាពិតជាអង្គការចាត់តាំងភេរវកម្មមួយ ហើយមិនមានអ្វីថ្លែងលើសពីនេះទេ”។
ថ្មីៗនេះ រដ្ឋាភិបាលឯកភាពជាតិគាំទ្រលទ្ធិប្រជាធិបតេយ្យឬហៅកាត់ថា (NUG)ប្រមូលបានវត្ថុតាងជារូបថតរហូតដល់ទៅ ៤០០,០០០សន្លឹក និងក្លីបវីដេអូមួយចំនួនធំទៀត។អ្នកនាំពាក្យឱ្យ (NUG) លោកបណ្ឌិត SA SA បាននិយាយថា ភស្តុតាងទាំងអស់ យើងនឹងប្រមូលដាក់ដាច់ដោយឡែកពីគ្នាតាមប្រភេទនៃភស្តុតាងមុនពេលបញ្ជូនទៅកាន់តុលាការឧក្រិដ្ឋកម្មអន្តរជាតិ ឬហៅកាត់ថា (ICC)។
ទោះបីជាបែបនេះក្តី ប្រទេសមីយ៉ាន់ម៉ា មិនទាន់ស្ថិតនៅក្នុងដែនយុត្តាធិការរបស់តុលាការឧក្រិដ្ឋកម្មអន្តរជាតិនៅឡើយទេតាំងពីដំបូងមក រហូតមកទល់នឹងការប្រកាសប្រមូលភស្តុតាងដាក់បន្ទុករបស់ក្រុមរដ្ឋាភិបាលស្រមោល (NUG) កាលពីខែកញ្ញា ឆ្នាំមុន។ ដោយឡែកខាង តុលាការឧក្រិដ្ឋកម្មអន្តរជាតិ ឬហៅកាត់ថា (ICC) មិនទាន់ឆ្លើយតបនៅឡើយទេជុំវិញការប្រកាសដាក់ភស្តុតាងរបស់ក្រុមរដ្ឋាភិបាលឯកភាពជាតិគាំទ្រលទ្ធិប្រជាធិបតេយ្យឬហៅកាត់ថា (NUG)ដែលជារដ្ឋាភិបាលស្រមោលតាមព្រឹត្តិន័យរបស់ប្រទេសមីយ៉ាន់ម៉ានោះ។ប្រភព៖ CNA