វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 7232 នាក់
ម្សិលមិញ 8227 នាក់
សរុប 14134113 នាក់
ភ្នំពេញ៖៖ កណ្តុរយក្សអាហ្វ្រិកម៉ាហ្គាវ៉ា (Magawa) ដែលទទួលបានមេដាយមាសក្នុងនាមជា HeroRAT សម្រាប់បេសកកម្មហិតមីននៅកម្ពុជា បានបាត់ជីវិតហើយក្រោយការចូលនិវត្តន៍ពីបេសកកម្មដោះមីននៅកម្ពុជាអស់រយៈពេល៥ឆ្នាំ។
អង្គការ APOPOបានបញ្ជាក់ពីសុខភាពចុះខ្សោយជាបន្តបន្ទាប់រហូតដល់ Magawa បាត់បង់ជីវិត ក្រោយប្រារព្ធខួប៨ឆ្នាំ កាលពីខែវិច្ឆិកាថា៖វាជារឿងដ៏រំជួលចិត្ត ដោយយើងសូមចែករំលែកនូវដំណឹងសោកសៅ ពីមរណភាពរបស់វីរកណ្តុរ HeroRat Magawa ដែលបានបាត់បង់ជីវិតកាលពីចុងសប្តាហ៍កន្លងមក!អង្គការ APOPO
សូមបញ្ជាក់ថារយៈពេល៥ឆ្នាំកន្លងមកនេះ ម៉ាហ្គាវ៉ា បានរួមចំណែករុករកគ្រាប់មីន និងយុទ្ធភណ្ឌមិនទាន់ផ្ទុះ ជាង៧១គ្រាប់នៅកម្ពុជា ជាពិសេសក្នុងខេត្តសៀមរាប និងព្រះវិហារ។ មានកំណើតនៅប្រទេសតង់ហ្សានីក្នុងខែវិច្ឆិកា ឆ្នាំ២០១៤ កណ្តុរម៉ាហ្គាវ៉ា ទទួលបានការបណ្តុះបណ្តាលពីជំនាញ ហិតមីនពីសំណាក់ក្រុមអ្នកជំនាញនៃអង្គការបែលហ្ស៊ិក APOPO។
កណ្តុរយក្សម៉ាហ្គាវ៉ា មកដល់កម្ពុជានៅឆ្នាំ២០១៦ ហើយបំពេញបេសកកម្មនៅសៀមរាប ឧត្តរមានជ័យ និងព្រះវិហារ។កាលពីឆ្នាំ២០២០ កន្លងមក កណ្តុរហិតមីនក្រោមការគ្រប់គ្រងរបស់អង្គការស៊ីម៉ាក់ និងអង្គការ APOPO បែលហ្ស៊ិកមួយនេះ ទទួលបានមេដាយមាសការងារពីអង្គការសប្បុរសធម៌សត្វព្រៃ (PDSA) នៃចក្រភពអង់គ្លេស.។
មរណៈភាពរបស់កណ្តុរយក្សម៉ាហ្កាវ៉ាបានកើតឡើងក្នុងពេលដែលអ្នកដោះមីនកម្ពុជា៣រូបបានជួបឧបទ្ទវហេតុបណ្តាលឲ្យស្លាប់ក្នុងពេលបំពេញបេសកកម្ម។
អ្នកដោះមីន ៣នាក់ នៃអង្គការដោះមីនកម្ពុជា (CSHD) បានពលីជីវិតដោយការផ្ទុះមីនតោន ក្នុងកិច្ចប្រតិបត្តិការប្រមូល និងកម្ទេចគ្រាប់កាលពីថ្ងៃទី១០ ខែមករា ឆ្នាំ២០២២ ក្នុងភូមិសាស្ត្រភូមិសែនតេជៈ ឃុំសែនតេជោ ស្រុកជាំក្សាន្ត ខេត្តព្រះវិហារ។ ជនរងគ្រោះ បានបម្រើការងារបោសសម្អាតមីនមនុស្សធម៌រយៈពេលជិត ១០ឆ្នាំមកហើយ។
ជនរងគ្រោះទាំង៣រូបនេះ រួមមាន៖ លោក ស៊ុន វង្ស, លោក ម៉ា ស៊ីម៉េត និងលោក ម៉ន ចក់។ គិតចាប់ពីឆ្នាំ១៩៩៧ ដល់បច្ចុប្បន្ន អ្នកដោះមីនដែលគ្រោះថ្នាក់ក្នុងកិច្ចប្រតិបត្តិការ បានបាត់បង់ជីវិត ពិការ និងរបួស សរុបចំនួន ១៥៤នាក់ ក្នុងនោះបាត់បង់ជីវិតចំនួន ៣១នាក់៕