អាជ្ញាធរខេត្តកណ្តាលចាប់ប្រជាពលរដ្ឋដែលតវ៉ារឿងក្រុមហ៊ុនកសាងព្រលានយន្តហោះរំលោភយកដី!
17-December-2025 / ព័ត៌មានជាតិ
ខេត្តកណ្តាល៖ពលរដ្ឋ៣០នាក់ដែលទាមទារឱ្យរដ្ឋាភិបាលផ្តល់សំណងសមរម្យពីផលប៉ះពាល់ដោយសារការអភិវឌ្ឍព្រលានយន្តហោះថ្មីនៅខេត្តកណ្ដាលនោះត្រូវបានអាជ្ញាមានសមត្តកិច្ចប្រមាណ៣០០នាក់ចាប់ឃាត់ខ្លួនកាលពីព្រឹកថ្ងៃទី១២កញ្ញា។ទាក់ទងបញ្ហានេះ អាជ្ញាធរបំភ្លឺប្រកាសថា ជាការបង្ខំចិត្ត ដើម្បីការពារខ្លួនក្រោយមានអំពើហិង្សាបង្កឱ្យសមត្ថកិច្ច១៣នាក់រងរបួស។
យោងតាមលិខិតចុះថ្ងៃទី១២ ខែកញ្ញា ឆ្នាំ២០២១ រដ្ឋបាលខេត្តកណ្តាលបំភ្លឺថា វិធានការចាប់ខ្លួនអ្នកភូមិ៣០នាក់នោះបានធ្វើឡើងក្រោយពីប្រជាពលរដ្ឋបានប្រមូលផ្តុំគ្នាប្រើហិង្សាមកលើសមត្ថកិច្ចដែលឈរជើងនៅទីនោះ របួស១៣នាក់។ «កាលពីវេលាម៉ោង១០និង៣០នាទី ថ្ងៃទី១២ ខែកញ្ញា ឆ្នាំ២០២១ មានក្រុមមនុស្សប្រមាណជា១០០នាក់ បានមកប្រមូលផ្ដុំគ្នាប្រើអំពើហិង្សានិងធ្វើការជេរប្រមាថដល់សមត្ថកិច្ច ដោយបានដុតកៅស៊ូកង់ឡាននិងសម្ភារផ្សេងៗ ប្រើដំបង គប់ដុំថ្ម បាញ់ចម្ពាមកៅស៊ូ គប់ដបសាំង មកលើកងកម្លាំងសមត្ថកិច្ចដែលកំពុងតែឈរជើងបំពេញការងាររក្សាសន្តិសុខនិងសណ្ដាប់ធ្នាប់នៅក្នុងទីតាំងគម្រោងសាងសង់អាកាសយានដ្ឋានអន្តរជាតិភ្នំពេញ ស្ថិតនៅក្នុងឃុំបឹងខ្យាង ស្រុកកណ្ដាលស្ទឹង ខេត្តកណ្តាល បណ្តាលឱ្យកងកម្លាំងសមត្ថកិច្ចរបួសចំនួន១៣នាក់»។
រដ្ឋបាលខេត្តបញ្ជាក់ថា ស្ថិតនៅក្នុងស្ថានភាពនេះ កងកម្លាំងបានបង្ខំចិត្តបំបែកក្រុមបាតុករដោយប្រើរថយន្តបាញ់ទឹក ឧស្ម័នបង្ហូរទឹកភ្នែក ដើម្បីការពារខ្លួននិងបំបែកក្រុមបាតុករ ព្រមទាំងបានឃាត់ខ្លួនសមាជិកក្រុមបាតុករចំនួន៣០នាក់ (២០នាក់ជាស្ត្រី) ដើម្បីធ្វើការសាកសួរនៅស្នងការដ្ឋាននគរបាលខេត្តកណ្តាល។ រដ្ឋបាលខេត្តកណ្ដាល ក៏អំពាវនាវដល់ក្រុមបាតុករទាំងអស់ បញ្ឈប់នូវរាល់សកម្មភាពខុសច្បាប់ទាំងឡាយឱ្យមកចូលរួមដោះស្រាយដោយសន្តិវិធី និងចូលរួមគោរពតាមគោលនយោបាយ របស់រាជរដ្ឋាភិបាល ដើម្បីចូលរួមអភិវឌ្ឍប្រទេសជាតិឱ្យរីកចម្រើនឡើង៕
ជម្លោះដីធ្លីរវាងប្រជាពលរដ្ឋជាង៣០០គ្រួសារនៅភូមិកំពង់តាឡុង ឃុំបឹងខ្យាង ស្រុកកណ្តាលស្ទឹង ខេត្តកណ្តាល ជាមួយក្រុមហ៊ុន OCIC ជាក្រុមហ៊ុនសាងសង់ព្រលានយន្តហោះអន្តរជាតិភ្នំពេញថ្មី នៅស្រុកកណ្តាលស្ទឹង ខេត្តកណ្តាលនេះ បានអូសបន្លាយអស់រយៈពេល៣ឆ្នាំមកហើយ ដោយភាគីក្រុមហ៊ុនមិនព្រមទិញដីស្រែនិងដីចម្ការរបស់ប្រជាពលរដ្ឋតាមតម្លៃទីផ្សារនោះទេ ដោយទាមទារឱ្យប្រជាពលរដ្ឋលក់ក្នុងតម្លៃ៨ដុល្លារក្នុង១ម៉ែត្រការ៉េ តែប្រជាពលរដ្ឋមិនព្រម។
បើតាមលិខិតមួយរបស់ប្រជាពលរដ្ឋកាលពីថ្ងៃទី៦ ខែកក្កដា ឆ្នាំ២០២១ បានឱ្យដឹងថា គម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី អូស៊ីអាយស៊ី (OCIC) របស់ឧកញ៉ា ពុង ឃាវសែ បានធ្វើឱ្យប៉ះពាល់ប្រជាពលរដ្ឋចំនួន៤ឃុំ រួមមាន ឃុំបឹងខ្យាង ឃុំអំពៅព្រៃ ឃុំព្រែកស្លែង នៅស្រុកកណ្តាលស្ទឹង ខេត្តកណ្តាល និងឃុំពត់សរ នៅស្រុកបាទី ខេត្តតាកែវ ដែលមានប្រជាពលរដ្ឋសរុប៣៣០គ្រួសារ ព្រមទាំងមាន៤៩៨ក្បាលដី ដែលមានទំហំសរុបជាង១លានម៉ែត្រការ៉េ (១ ៦៦៣ ០៣៥) ជាកម្មសិទ្ធិស្របច្បាប់របស់ពលរដ្ឋទាំងនោះ។
ក្រុមហ៊ុនសាជីវកម្មវិនិយោគក្រៅប្រទេសកម្ពុជា ហៅកាត់អូ.ស៊ី.អាយ.ស៊ី (OCIC) របស់ លោក ពុង ឃាវសែ ទទួលបានសិទ្ធិសាងសង់ព្រលានយន្តហោះខ្នាតអន្តរជាតិមួយនៅទីនោះ។ តាមគម្រោង ក្រុមហ៊ុននឹងសាងសង់រួចរាល់នៅ ឆ្នាំ២០២៣។ ព្រលានយន្តហោះថ្មីនេះ វិនិយោគក្នុងទឹកប្រាក់ប្រមាណជាងមួយពាន់លានដុល្លារ (១.៥០០លាន) លើផ្ទៃដី ជិតបីពាន់ហិកតារ (២.៦០០)។
