លោកអ៊ិន សុភិន ហៅលោករ៉េមមី ហ៊ូដែលចោទលោករឿងមិនសងលុយ ថាជាអ្នកដឹងនាំរឿងគ្មានអាជ្ញាប័ណ្ណ!
06-June-2026 / ព័ត៌មានជាតិ
ភ្នំពេញ៖ ទំនាស់រឿងជំពាក់លុយកាក់ជិត២ម៉ឺនដុល្លារករណីយ៍លោក អ៊ិនសុភិន ចាងហ្វាងផលិតកម្មមហាហង្ស ជួលពីពិធីករ លោក សុខរ៉ាស៊ី រហូតឈានដល់ការប្ដឹងផ្ដល់គ្នាតាមផ្លូវតុលាការមិនទាន់ចប់ផង ឥឡូវមានអ្នកទី២ បានចេញមកទម្លាយថា គេក៏ជួបរឿងនេះជាមួយលោក សុភិន ដែរ។
អ្នកដឹកនាំរឿង និងជាអ្នកច្នៃម៉ូដល្បីមួយរូបនៅសហរដ្ឋអាមេរិក និងកម្ពុជាលោក Remy Hou (រ៉េមមី ហ៊ូ) បានទម្លាយរឿងរ៉ាវប្រាប់កាសែត ថា តាមពិតលោកក៏មានសាច់រឿងដូចគ្នាទៅនឹងលោក សុខ រ៉ាស៊ី ដែរ។លោកមិនទាន់បានទទួលប្រាក់៥០ភាគរយ គឺប្រមាណជិត៥ពាន់ដុល្លារពីផលិតកម្មមហាហង្សនោះទេ។តែលើកនេះធ្វើឲ្យលោកអ៊ិន សុភិន អគ្គនាយកផលិតកម្មមហាហង្សនៅស្ងៀមបានឡើយ ។លោក អ៊ិន សុភិនបានបញ្ចេញសារយ៉ាងវែងតាមហ្វេប៊ុកវាយបកទៅកាន់ផលិតករខាងលើដោយថែមទាំងចំអកឲ្យលោក រ៉េមមី ហ៊ូថាជាអ្នកដឹកនាំរឿងគ្មាន Licenceឬ អាជ្ញាប័ណ្ណនោះ ។
លោក អ៊ិន សុភិន បានបញ្ជាក់ថា៖ គួរឱ្យអស់សំណើច ហើយឱ្យបងប្អូនផលិតករចាំមុខពីរនាក់នេះឱ្យច្បាស់ ខ្ញុំទើបប្រជុំចប់កាលពីថ្ងៃចន្ទរឿងពួកគាត់ធ្វើការមិនកើតចង់បានលុយខុសក្បួន ហេតុតែអាណិតពួកគាត់អត់ការងារធ្វើតេមកសុំការងារធ្វើ អាណិតពេកក៏ឱ្យម្ដង៣រឿងដឹក:
១-រឿង ឯកកា ដឹកនាំរឿងមិនកើត ហើយបានកក់លុយត្រឹមត្រូវដល់តំណាក់កាលទី២មិនទាន់បានបង់ព្រោះរឿងទទួលយកមិនបាន ខុសច្រើន ដឹកឱ្យរួចតែពីដៃ ចឹងតើឱ្យគេបង់លុយឱ្យដែរ? ណាមួយតាំងពីថតចប់មកកូវីដរហូត រឿងនេះមិនទាន់គិតយ៉ាងម៉េចផង មកថាគេមិនទាន់បង់លុយ កុំឱ្យតែគេប្ដឹងវិញទៅសំណាងហើយ ដឹកនាំរឿងតម្រូវចិត្តខ្លួនឯង មិនតម្រូវចិត្តអ្នកបង់លុយ ខាងក្រុមហ៊ុនមិនទាន់និយាយអ្វីទាំងអស់ តែនេះចង់បង្កបញ្ហាដោយខ្លួនឯង អាណិតណាស់តែការងារមិនកើតចង់តែបានលុយគេ ពេលមកសុំការងារគេធ្វើនិយាយល្អ តែពេលបានការងារទៅធ្វើចរិតមើលងាយការងារ ហើយហ៊ានចេញមកទៀត អត់កេរ្តិ៍ខ្មាស។
២-រឿងបេសកម្មស្នេហ៍ ដឹកមិនកើត កាត់តមិនចេញ លុយកាក់បានកក់រួចហើយនៅតែបង់ដំណាក់កាលបន្ត,៣-រឿងវង្វេង ក៏ដូចគ្នា ដឹកមិនបានកូនក្មេងដឹកលេងផង មើលមិនយល់ រឿងលុយកាក់គេបានកក់រួចរាល់ហើយដែរ នៅតែបង់ដំណាក់កាលបន្ត តែពេលនេះរឿងទាំងបីយកជាការមិនបានសោះ ហេតុតែចង់ជួយមិនមានបទពិសោធន៍សោះក៏ឱ្យឧកាស តែសមត្ថភាពអន់ណាស់ យកជាការមិនបាន។
សូមផលិតករទាំងអស់គ្នាប្រយត្ន័ចាញ់បោកពួកគាត់ទាំងពីរនាក់ហ្នឹង ខ្ញុំអស់បីរឿងរាប់មុឺនដុល្លារមិនបាននិយាយអីមួយម៉ាត់ទុកមុខរាប់អានគ្នា តែពួកគាត់ចង់ល្បី ព្រោះពួកគាត់កំពុងតែជួបញ្ហាសេដ្ធកិច្ទ អាណិតដែរតែមនុស្សចង់បានលុយគេដោយមិនធ្វើការឱ្យនោះទុកតាមហ្នឹងទៅ សុខចិត្តយករឿងមកឱ្យអ្នកផ្សេងធ្វើវិញ។ នេះជាបទពិសោធន៍ថ្មីមួយ ចេះចង់បានលុយគេអត់ចេះខ្មាស តែខាងក្រុមហ៊ុនកំពុងតែរកមុខឱ្យដឹកសងផង គួរឱ្យចង់សើចអ្នកដឹកនាំរឿងគ្មាន Licence!!!!!!! លោកថាមានសាក្សីច្រើនណាស់ដែលដឹងថាពួកគាត់ធ្វើការមិនកើត!។
សូមបញ្ជាក់ថាលោក Remy Hou (រ៉េមមី ហ៊ូ) បានឲ្យដឹងថា ក្នុងអំឡុងខែ៩ ឆ្នាំ២០១៩ លោកបានទទួលការងារថតរឿង សម្រាប់ចាក់បញ្ចាំងក្នុងរោង(រឿងដុំ)ចំនួន៣រឿង ដោយលោកមានកាតព្វកិច្ចជាអ្នកដឹកនាំរឿង ចំណែកភរិយារបស់លោកឈ្មោះ អ្នកនាង ផូ ភារ័ត្ន ជាជំនួយការដឹកនាំរឿង។ រ៉េមី គឺជាអ្នកឈរឈ្មោះក្នុងធ្វើកុងត្រា ជាមួយខាងផលិតកម្មដែលមានលោក អូន ឧស្សាហ៍ ជានាយកគ្រប់គ្រងទូទៅ ធ្វើជាតំណាង។ តាមការចរចា លោក និងភរិយា បានតម្លៃហត់នឿយ សរុបរួមគ្នា ទើបលោកធ្វើជាតំណាងតែម្នាក់សម្រាប់ការធ្វើកុងត្រា។
តាមខ្លឹមសារនៅក្នុងកុងត្រា លោក រ៉េមមី ហូ និងភរិយា ផូ ភារត្ន័ ក៏បានបញ្ជាក់ថា ក្រុមហ៊ុន ត្រូវកក់ប្រាក់ ៥០% មុនចុះថត ហើយក្រុមហ៊ុនក៏បានកក់រួចហើយដែរ។ ក្រៅពីនេះ ពេលដឹកនាំថតបាន៥០ភាគរយនៃសាច់រឿង ក្រុមហ៊ុនត្រូវបង់ប្រាក់៣០ភាគរយបន្ថែមទៀត លុះបញ្ចប់ការងារដឹកនាំថតចប់ជាស្ថាពរ ទើបក្រុមហ៊ុនត្រូវបង់ប្រាក់២០ភាគរយបញ្ចប់។ប៉ុន្តែជាមួយគ្នានោះ អ្នកដឹកនាំក៏ត្រូវមានតួនាទីទៅមើល ការកាត់តឲ្យចប់ដែរ។ តាមអ្នកដឹកនាំរឿង ២នាក់ប្ដីប្រពន្ធ បានបញ្ជាក់ថា ក្រោយថតចប់ ពួកគេក៏បានទៅមើលការកាត់តបាន២រឿង នៅសល់១រឿង។ ដល់ត្រឹមនេះ លោក រ៉េមមី បញ្ជាក់ថា លោកបានស្នើសុំទូទាត់ទឹកប្រាក់៣០%ទាំងបីរឿង តាមកុងត្រា ដើម្បីយកមកដោះស្រាយលើការចំណាយផ្សេងៗ។
ប៉ុន្តែ មិនទទួលបានអ្វីទាំងអស់ ដោយលោកប្រាប់ថា លោក អ៊ិន សុភិន បានយកលេសនេះលេសនោះ ដើម្បីគេចវេសរហូតមកដល់សព្វថ្ងៃនេះ។ "ម្ដងគាត់ថា កូវីដ ថាអីចេះអីចុះ តែបន្ទាប់ពីពួកខ្ញុំដឹកនាំថតរឿងចប់ទាំងអស់ គាត់ទៅធ្វើកម្មវិធី Miss Grand ដែលជាកម្មវិធីធំ អីចឹងបានន័យថា គាត់មិនអត់លុយទេ...ដល់អីចឹងខ្ញុំឆ្ងល់ ខ្ញុំអត់យល់ហ្មង!"។
តាមការបញ្ជាក់របស់អ្នកដឹកនាំរឿងដដែល លោក អ៊ិនសុភិន នៅមិនទាន់ទូទាត់ប្រាក់ថ្លៃពលកម្មរបស់លោក និងភរិយា សរុបចំនួន ៥០% ស្នើនឹងទឹកប្រាក់ជិត ៥០០០ដុល្លារទៀត។ ចំនួនទឹកប្រាក់នៅសល់នេះ លោកលើកឡើងថា ឲ្យតែក្រុមហ៊ុនព្រមទូទាត់ឲ្យ ទោះបីរំលស់២០០ដុល្លា ៣០០ដុល្លា រឺ៥០០ដុល្លា ក៏បានដែរ ប៉ុន្តែពួកលោកមិនទទួលបានដំណោះស្រាយណាមួយលើទឹកប្រាក់នៅសល់ពី លោក អិនសុភិន រហូតមកដល់បច្ចុប្បន្នដែលមានរយៈពេលជិត ២ឆ្នាំហើយ៕
