លោកមាសុគ្រីប្រតិកម្មដោយសាគេស៊ីមួយតុមកដាក់ទោសលើកលោកតែម្នាក់ឯង
22-August-2024 / សុខភាពនិងកីឡា
ភ្នំពេញ៖លោកមាសុគ្រីមន្ត្រីសហព័ន្ធកីឡាប្រដាល់គុនខ្មែរមួយរូបបានប្រតិកម្មថា ខ្លួនរងភាពអយុត្តិធម៌ដោយត្រូវទទួលការពិន័យផ្អាកការងារពីសហព័ន្ធតែម្នាក់ឯង ខណៈដែលមន្ត្រីពាក់ព័ន្ធផ្សេងទៀតរួចផុតពីការពិន័យទាក់ទងការកាត់សេចក្តីមិនប្រកាសលទ្ធផលគូប្រកួតខ្សែក្រវាត់រវាងលោកឃឹមបូរ៉ានិងលោកម៉ឺនមេឃានៅលើកញ្ចក់ទូរទស្សន៍ CNC។
សូមបញ្ជាក់ថាសហព័ន្ធកីឡាប្រដាល់គុនខ្មែរ បានសម្រេចពិន័យផ្អាកការងារមន្ត្រីសហព័ន្ធ២រូប រួមមាន គណៈកម្មការប្រតិបត្តិនៃសហព័ន្ធកីឡាប្រដាល់គុនខ្មែរ និងជាស្នងការប្រកួតប្រចាំស្ថានីយទូរទស្សន៍ CNC លោក មាស សុគ្រី ចំនួន៦សប្តាហ៍ និងចៅក្រមអាជ្ញាកណ្តាល លោក រាម កុសល ចំនួន៤សប្តាហ៍ ដោយហេតុមានកំហុសឆ្គងក្នុងការកាត់ក្តីការប្រកួតខ្សែក្រវាត់រវាងកីឡាករ ឃឹម បូរ៉ា និង ម៉ឺន មេឃា កាលពីថ្ងៃទី១០ ខែកក្កដាកន្លងទៅ។
ការដាក់ពិន័យនេះធ្វើឡើងក្រោយពីសម្តេចនាយករដ្ឋមន្ត្រី ហ៊ុន សែន បានរិះគន់ការសម្រេចចិត្តរបស់គណៈកម្មការរៀបចំការប្រកួតដែលសម្រេចលើកពេលប្រកួតទៅពេលក្រោយ បើទោះបីជាកីឡាករ ម៉ឺន មេឃា បានរំលោភលើលក្ខន្តិកៈប្រកួតដោយចាប់កីឡាករ ឃឹម បូរ៉ា បោក។ ក្រោយពីមានការរិះគន់ពីលោកនាយករដ្ឋមន្ត្រី ហ៊ុន សែន មក គណៈកម្មាធិការរៀបចំការប្រកួត បានសម្រេចផ្តល់ជ័យជម្នះដល់កីឡាករ ឃឹម បូរ៉ា ជាម្ចាស់ខ្សែក្រវាត់ អមដោយទឹកប្រាក់៥ពាន់ដុល្លារអាមេរិក។
លោក មាស សុគ្រី ដែលជាគណៈកម្មការប្រតិបត្តិនៃសហព័ន្ធកីឡាប្រដាល់គុនខ្មែរ និងជាស្នងការប្រកួតប្រចាំស្ថានីយទូរទស្សន៍ CNC លើកឡើងប្រាប់កាសែតថា ជារឿងអយុត្តិធម៌ដែលលោកត្រូវទទួលការពិន័យពីសហព័ន្ធតែម្នាក់ឯង ដែលធ្វើឱ្យប៉ះពាល់កិត្តិយសលោកនិងគ្រួសារ ខណៈដែលមន្ត្រីពាក់ព័ន្ធដែលជំនុំសម្រេចកាត់ក្តីរួមគ្នាផ្សេងទៀត មិនត្រូវបានសហព័ន្ធកីឡាប្រដាល់គុនខ្មែរពិន័យនោះទេ។ លោកថា៖ «គេសម្រេចឱ្យឈ្នះចាញ់យុត្តិធម៌ តែសម្រេចដាក់កំហុសខ្ញុំ មិនយុត្តិធម៌តែឯង! បើសិនជាដាក់ជារួមទៅ គ្រូអត់តូចចិត្តទេ កំហុសវាមាន មិនមែនអត់ទេ! កម្មវិធីនេះ វារលូនកើតឡើងដោយសារយើងសហការគ្នា គ្មានអ្នកណាមួយធ្វើដោយចិត្តឯងទេ គឺយើងធ្វើដោយប្រព័ន្ធរួមគ្នា បើខុសៗទាំងអស់គ្នាទៅ កុំឆ្លើយដាក់ម្នាក់ៗ វាអត់ល្អមើលទេ! មិនមែនគ្រូអ្នកសម្រេចទេ គេធ្វើការតាមប្រព័ន្ធប្រធានវិនិច្ឆយ មានស្នងការ មានអនុប្រធានសហព័ន្ធ មានស្ព័នស័រ មានស្ថានីយ។
អ្វីក៏ដោយ ពេលអ្នកណាសម្រេចទាំងអស់គ្នា ត្រូវទទួលកំហុសទាំងអស់គ្នា ដើម្បីកាត់សេចក្តី តែចំណែកអស់លោកខ្លះ គាត់នៅស្ងៀម គាត់ធ្វើមិនដឹង គាត់ចាំតែពេលបានលុយទៅ ដល់ពេលមានរឿង គាត់ឆ្លើយយករួចខ្លួន ដល់ពេលមានមុខមានមាត់ គេចប់ខ្សែក្រវាត់ គាត់មានមុខមាត់រហូត»។គណៈកម្មការប្រតិបត្តិនៃសហព័ន្ធកីឡាប្រដាល់គុនខ្មែររូបនេះ បានសំណូមពរឱ្យសហព័ន្ធបែងចែកច្បាប់ឱ្យដាច់ដោយឡែកតាមតួនាទី ដើម្បីសម្រេចជុំវិញបញ្ហានានានៃការប្រកួត ចៀសវាងធ្វើសេចក្តីសម្រេចរួមគ្នា តែពេលមានបញ្ហា ទម្លាក់ឱ្យបុគ្គលម្នាក់ៗ។
ម្ចាស់ក្លឹបប្រដាល់ជ្រៃសែនជ័យខេត្តកំពង់ស្ពឺរូបនេះ បន្តទៀតថា លោកមិនចង់បន្តវែងឆ្ងាយទេ ប៉ុន្តែគ្រាន់តែចង់រកយុត្តិធម៌និងរក្សាកិត្តិយសដែលលោកខិតខំសាងជិត៤០ឆ្នាំលើវិថីគុនខ្មែរ ជូនខ្លួនឯងនិងគ្រួសារតែប៉ុណ្ណោះ។ លោកថា ចំពោះរឿងដែលកើតឡើងហើយ សហព័ន្ធកីឡាប្រដាល់គុនខ្មែរ មិនគួរទម្លាក់កំហុសទៅលើបុគ្គលម្នាក់ៗនោះទេ គួរតែធ្វើលិខិតមួយស្នើទៅលោកនាយករដ្ឋមន្ត្រី ហ៊ុន សែន ដើម្បីធានាបានថា នឹងពង្រឹងសមត្ថភាពគណៈកម្មការរបស់សហព័ន្ធបន្ថែមទៀត។ជាមួយគ្នានេះដែរ លោកក៏បានសុំអភ័យទោសចំពោះកំហុសដែលកើតមាន និងថ្លែងអំណរគុណដល់ប្រមុខរដ្ឋាភិបាល ដែលតែងផ្តល់អនុសាសន៍ល្អៗនិងយកចិត្តទុកដាក់ចំពោះគុនខ្មែរ។
ករណីយ៍នេះដែរលោក ម៉ិល កាដូ អគ្គលេខាធិការសហព័ន្ធកីឡាប្រដាល់គុនខ្មែរ បានរៀបរាប់ថា សហព័ន្ធកីឡាប្រដាល់គុនខ្មែរមានច្បាប់និងបទបញ្ជាច្បាស់លាស់ក្នុងការបែងចែកកិច្ចការនិងដោះស្រាយបញ្ហាជាប្រព័ន្ធពីលើមកក្រោមទៅតាមតួនាទី ដោយមិនមាននរណាម្នាក់អាចធ្វើខុសពីបទបញ្ជានេះឡើយ។
អគ្គលេខាធិការសហព័ន្ធកីឡាប្រដាល់គុនខ្មែររូបនេះ បន្ថែមថា ការសម្រេចពិន័យរបស់សហព័ន្ធកីឡាប្រដាល់គុនខ្មែរជារឿងត្រឹមត្រូវ។ លោកថា អ្នកធ្វើខុសតែងតែមិនពេញចិត្ត និងបដិសេធដោយមិនទទួលស្គាល់កំហុសរបស់ខ្លួន!។
