មានអ្នកទោសក្នុងគុកខេត្តបន្ទាយមានជ័យឆ្លងកូវីតស្លាប់!
06-June-2026 / សន្តិសុខសង្គម
បន្ទាយមានជ័យ៖មានអ្នកជាប់ឃុំឃាំងក្នុងពន្ធនាគារខេត្តបន្ទាយមានជ័យ ម្នាក់ទៀតបានស្លាប់ដោយសារជំងឺកូវីដ-១៩ និងឆ្លងទៅកាន់អ្នកផ្សេងទៀត ។
អ្នកប្រើប្រាស់បណ្តាញសង្គម កាលពីថ្ងៃទី១៩កក្កដា បានចែករំលែកព័ត៌មានតៗគ្នាថា មានអ្នកជាប់ឃុំនៅពន្ធនាគារខេត្តបន្ទាយមានជ័យ ចំនួន៣នាក់ស្លាប់ និងជាង១០០នាក់ទៀតបានឆ្លងជំងឺកូវីដ-១៩ ក្នុងនោះមានទាំងមន្ត្រីពន្ធនាគារផងដែរ។
ប៉ុន្តែអ្នកនាំពាក្យអគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ លោក នុត សវនា ប្រាប់ កាសែតថា ករណីនៅពន្ធនាគារខេត្តបន្ទាយមានជ័យ មានអ្នកជាប់ឃុំតែម្នាក់ប៉ុណ្ណោះដែលស្លាប់ ។លោកថា៖ «មាន[ស្លាប់]មួយរូបកាលពីម្សិលមិញហ្នឹង ដោយសារគាត់មានជំងឺប្រចាំកាយធ្ងន់ធ្ងរពីមុនមក ជំងឺសួតតែម្នាក់ទេ! មិនមែន៣នាក់ដូចការផ្សព្វផ្សាយទេ! ។ទាក់ទងនិងចំនួនអ្នកឆ្លងលោកថាខ្ញុំអត់មានសមត្ថកិច្ចបកស្រាយរឿងហ្នឹងទេ ដោយសាររឿងនេះជាការងារសន្តិសុខ»។
ឯអភិបាលរងខេត្តបន្ទាយមានជ័យ និងជាអ្នកនាំពាក្យ លោក លី សារី បដិសេធឆ្លើយតប ដោយថា លោកមិនមានតួលេខនៃការឆ្លងទេ ហើយលោកបានបង្វែរសំណួរឱ្យសួរទៅអ្នកគ្រប់គ្រងពន្ធនាគារវិញ។លោកថា៖ «កុំជឿគេ អារឿងហ្នឹងនោះ! [អ្នកវិជ្ជមាន]ជាជនជាប់ឃុំថ្មី គេយកទៅធ្វើតេស្តទេ! បងឯងចង់ដឹងអី សួរទៅខាងអ្នកនាំពាក្យទៅ»។អនុប្រធានមន្ទីរសុខាភិបាលខេត្តបន្ទាយមានជ័យ និងជាអ្នកនាំពាក្យ លោក រឿន សុធី ថ្លែងថា លោកមានតែតួលេខអ្នកឆ្លងសរុបនៅទូទាំងខេត្តឆ្លងជាង៨ ០០០នាក់ និងស្លាប់៦៥នាក់ ។ខាងពន្ធនាគារលោកថាមិនបានបែងចែកទេ!។គឹតត្រឹមថ្ងៃអង្គារនេះ មានពន្ធនាគារចំនួន៨ហើយដែលមានការឆ្លងរាលដាលជំងឺកូវីដ-១៩ ពាក់ព័ន្ធព្រឹត្តិការណ៍សហគមន៍២០កុម្ភៈ ក្នុងនោះក៏មានស្ត្រីម្នាក់ជាប់ឃុំនៅពន្ធនាគារខេត្តកំពង់ស្ពឺបានស្លាប់ផងដែរ។នេះបើតាមលោកនុតសវនា។
សូមបញ្ជាក់ថាតាមអង្គការលើកលែងទោសអន្តរជាតិ (Amnesty International) និងអង្គការឃ្លាំមើលសិទ្ធិមនុស្សអន្តរជាតិ (Human Rights Watch) កាលពីថ្ងៃទី២៣ ខែឧសភា ឆ្នាំ២០២១ បាននិយាយក្នុងរបាយការណ៍រួមគ្នាមួយថា បច្ចុប្បន្ន កម្ពុជាមានអ្នកជាប់ឃុំសរុប៣៩ ០០០នាក់នៅក្នុងពន្ធនាគារទូទាំងប្រទេសចំនួន២៨ពន្ធនាគារ ហើយថា ភាពចង្អៀតណែននៅក្នុងពន្ធនាគារ គឺជាហានិភ័យនៃការឆ្លងជំងឺកូវីដ-១៩។ស្ថាប័នអន្តរជាតិទាំងពីរនេះបានទាមទារឱ្យអាជ្ញាធរកម្ពុជាស្វែងរកជម្រើសដោះលែងអ្នកទោសស្រាលៗ និងជនជាប់ឃុំបណ្តោះអាសន្នរង់ចាំសវនាការកាត់ទោស ឱ្យបាននៅក្រៅឃុំ ដើម្បីកាត់បន្ថយហានិភ័យនៃរលកចម្លងជំងឺរលាកផ្លូវដង្ហើមធ្ងន់ធ្ងរមួយនេះ។
តែ អ្នកនាំពាក្យក្រសួងយុត្តិធម៌ លោក គឹម សន្តិភាព ឱ្យដឹងកាលពីដើមខែកក្កដានេះថា វិធានការដោះលែងទណ្ឌិតតាមលក្ខខណ្ឌច្បាប់ ដើម្បីកាត់បន្ថយភាពចង្អៀតណែនក្នុងពន្ធនាគារក្នុងបរិបទកូវីដ-១៩ បានពិភាក្សាចប់សព្វគ្រប់ហើយជាមួយក្រសួងមហាផ្ទៃ នៅរង់ចាំការចុះហត្ថលេខាចុងក្រោយពីរដ្ឋមន្ត្រីក្រសួងយុត្តិធម៌ប៉ុណ្ណោះ.។
ក្រសួងសុខាភិបាលប្រកាស នៅថ្ងៃទី២០ ខែកក្កដា ឆ្នាំ២០២១ បានឱ្យដឹងថា អ្នកស្លាប់ដោយ ជំងឺកូវីដ-១៩ កាលពីថ្ងៃម្សិលមិញ មានចំនួន២១នាក់បន្ថែមទៀត និងករណីឆ្លងថ្មីមានចំនួន៨២៥នាក់ ស្របពេលអ្នកជាសះស្បើយថ្មីមានចំនួន១ ០២២នាក់។
បើ គិតត្រឹមព្រឹកថ្ងៃអង្គារនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៦៨ ៧៩៦នាក់ ក្នុងនោះ អ្នកជំងឺព្យាបាលជាសះស្បើយសរុបមានចំនួន៦១ ០៣៩នាក់ អ្នកស្លាប់សរុប១ ១៤៩នាក់ និងករណីនាំចូលពីក្រៅប្រទេសសរុប៦ ៩៤៥នាក់៕
