អាជ្ញាធរក្រុងតាខ្មៅនិងស្រុកកៀនស្វាយ មិនអនុញ្ញាតឲ្យមានម្ចាស់បែត្រី ទូក ឬផ្ទះ ចូលសំចតតាមបណ្តោយមាត់ទន្លេរខ្លួនឡើយ
21-September-2026 / សន្តិសុខសង្គម
កណ្តាល៖ លោក នូ សុវណ្ណារ៉ា អភិបាលក្រុងតាខ្មៅ បានអះអាង នារសៀលថ្ងៃទី១១ ខែមិថុនា ឆ្នាំ ២០២១ថា លោកនឹងមិនអនុញ្ញាតឱ្យមានបែត្រី ទូក ឬផ្ទះទូករបស់ជនជាតិវៀតណាម(មកពីភ្នំពេញឬកន្លែងផ្សេង) មកស្នាក់អាស្រ័យនៅដែនទឹកក្រុងតាខ្មៅនោះឡើយ ។
លោកអភិបាលក្រុងតាខ្មៅថា៖ «បើសិនពួកគេទាំងនោះមានបំណងមកសុំស្នាក់អាស្រ័យ គឺលោកមិនអនុញ្ញាតជាដាច់ខាត ប៉ុន្តែបើសិនជាឆ្លងកាត់ គឺអាចឆ្លងបានហើយទៅឱ្យហួសពីដែនទឹកដីក្រុងតាខ្មៅបាន លោកនឹងចាត់ចែងក្រុមការងារឃ្លាំមើលតាមផ្លូវទឹករួចរាល់ហើយ និងបានបញ្ជាដល់អាជ្ញាធរមានសមត្ថកិច្ចគ្រប់លំដាប់តាមមូលដ្ឋានត្រូវធ្វើកិច្ចការនេះឱ្យបានម៉ត់ចត់បំផុត»។តែ ចំពោះជនជាតិវៀតណាម ដែលកំពុងស្នាក់អាស្រ័យ តាំងពីមុនពេលមានសេចក្ដីសម្រេចរបស់រដ្ឋបាលរាជធានីភ្នំពេញមក គឺរដ្ឋបាលក្រុងតាខ្មៅ ពុំទាន់មានការសម្រេចចិត្តយ៉ាងណាចំពោះពួកគាត់ឡើយ ពោលគឺអ្នកចាស់បន្តនៅធម្មតា អ្នកថ្មីហាមចូលមកនៅ។
ឯអ្នករស់នៅលើបែចិញ្ចឹមត្រី និងផ្ទះបណ្តែតទឹកដែលចល័តពីខណ្ឌច្បារអំពៅទៅឈប់ចតដើម្បីស្នាក់នៅលើផ្ទៃទឹកទន្លេមេគង្គក្រោម ក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាលក៏ ត្រូវបានកម្លាំងចម្រុះរបស់គណៈបញ្ជាការឯកភាពរដ្ឋបាលស្រុកចុះបណ្តេញចេញពីភូមិសាស្ត្រស្រុកកៀនស្វាយមិនឱ្យឈប់ចតស្នាក់នៅឡើយ ។យុទ្ធនាការនេះធ្វើឡើងពេញមួយថ្ងៃទី១១ ខែមិថុនា ឆ្នាំ២០២១ ដឹកនាំដោយលោក សុខ ពិសិដ្ឋ អភិបាលរងស្រុក , លោកវរសេនីយ៍ឯក ព្រំ សំណាង អធិការនគរបាលស្រុក និងលោក អ៊ួន សុផាត មេបញ្ជាការមូលដ្ឋានកងរាជអាវុធហត្ថស្រុក ព្រមទាំងមានការចូលរួមពីផ្នែករដ្ឋបាលជលផល និងសង្កាត់រដ្ឋបាលជលផលកៀនស្វាយផងដែរ ។
ដោយមិនឱ្យឈប់សំចតស្នាក់នៅក្នុងភូមិសាស្ត្រស្រុកឡើយ និងគោលដៅទី២- ចុះត្រួតពិនិត្យតាមទីតាំងដែលមានបែចិញ្ចឹមត្រីនិងបញ្ជីឈ្មោះអ្នករស់នៅចាស់ ជាលទ្ធផលកម្លាំងចម្រុះរកឃើញអ្នករស់នៅលើបែចិញ្ចឹមត្រីចូលមកស្នាក់នៅថ្មីលើផ្ទៃទន្លេក្នុងភូមិស្តៅកន្លែង ឃុំដីឥដ្ឋចំនួន១០គ្រួសារ មាន២៥បែចិញ្ចឹមត្រីត្រូវបានកម្លាំងគណៈបញ្ជាការឯកភាពស្រុកធ្វើការណែនាំនិងសម្រេចឱ្យម្ចាស់បែអូសចេញពីភូមិសាស្ត្រស្រុកកៀនស្វាយ ។
សុខ ពិសិដ្ឋ អភិបាលរង ស្រុកកៀនស្វាយ បានណែនាំដល់ម្ចាស់បែចិញ្ចឹមត្រីនិងផ្ទះបណ្តែតទឹកដែលមានបំណងចូលមកឈប់សំចតស្នាក់នៅថ្មីលើផ្ទៃទឹកទន្លេក្នុងភូមិសាស្ត្រស្រុកកៀនស្វាយត្រូវតែរុះរើ ឬចល័តចេញដោយខ្លួនឯងមិនឱ្យចូលមកស្នាក់នៅឡើយ បើរឹងរូសគណៈបញ្ជាការឯកភាពស្រុកនិងចាត់វិធានការរដ្ឋបាលមិនទទួលខុសត្រូវរាល់ការខូចខាតឡើយ ។ ដោយឡែកអ្នកតាំងទីលំនៅចាស់និងមានបែចិញ្ចឹមត្រីដែរនោះ រដ្ឋបាលស្រុកបានចុះស្រង់ស្ថិតិរួចរាល់ហើយ រង់ចាំតែមានផែនការពីថ្នាក់លើតែប៉ុណ្ណោះ ។
សូមជម្រាបថា រដ្ឋបាលរាជធានីភ្នំពេញ ក៏ដូចជារដ្ឋបាលខណ្ឌច្បារអំពៅ កាលពីថ្ងៃទី០២ ខែមិថុនា ឆ្នាំ២០២១ កន្លងទៅ ក៏បានចេញប្រកាសព័ត៌មានផងដែរថា កន្លងមកមានជនឆក់ឱកាសមួយចំនួន បានលបលួចធ្វើបែចិញ្ចឹមត្រី ផ្ទះបណ្តែតទូក ផ្ទះតូចៗ និងសំណង់មិនរៀបរយនៅលើផ្ទៃទន្លេ ហើយកន្លែងខ្លះបានប្រែក្លាយជាកន្លែងស្នាក់នៅដោយខុសច្បាប់យ៉ាងអាណាធិបតេយ្យ ដែលបង្កឱ្យបាត់បង់សណ្តាប់ធ្នាប់ ប៉ះពាល់ដល់ផ្លូវនាវាចរ ប៉ះពាល់ដល់ប្រព័ន្ធអេកូឡូហ្ស៉ី មានចរន្តទឹកហូរ គោករាក់ ពិសេសការប្រើប្រាស់ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ពាសវាល ពាសកាលក្នុងទន្លេ ធ្វើឱ្យខូចខាតយ៉ាងធ្ងន់ធ្ងរដល់ជីវៈចម្រុះក្នុងទឹក ខូចគុណភាពទឹក បំពុលបរិស្ថាន និងប៉ះពាល់ដល់សោភ័ណភាព រាជធានីភ្នំពេញ ព្រមទាំងប៉ះពាល់ដល់សុខភាព នៃប្រជាពលរដ្ឋ ដែលបានប្រើប្រាស់ទឹកមិនស្អាតផងដែរ។
ដើម្បីរក្សាបរិស្ថាន ជីវៈចម្រុះ គុណភាពទឹក និងលុបបំបាត់បាតុភាពអសកម្មខាងលើ រដ្ឋបាលរាជធានីភ្នំពេញ តម្រូវឱ្យម្ចាស់បែចិញ្ចឹមត្រី ផ្ទះបណ្តែតទឹក ម្ចាស់ផ្ទះតូចៗ និងម្ចាស់សំណង់មិនរៀបរយនៅលើផ្ទៃទន្លេទាំងអស់ ត្រូវរុះរើ ឬចល័តចេញជាបន្ទាន់ ដោយទុករយៈពេល ១សប្ដាហ៍ គិតចាប់ពីកាលបរិច្ឆេទ ចេញសេចក្តីជូនដំណឹងនេះតទៅ។ រដ្ឋបាលរាជធានីភ្នំពេញ ស្នើឱ្យប្រជាពលរដ្ឋប្តូរទម្លាប់ពីការចិញ្ចឹមត្រីតាមបែរលើផ្ទៃទន្លេ នៅភូមិសាស្ត្ររាជធានីភ្នំពេញ មកចិញ្ចឹមត្រីតាមស្រះវិញ៕
