វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 359 នាក់
ម្សិលមិញ 5304 នាក់
សរុប 14139885 នាក់
ភ្នំពេញ៖ នៅវិមានសន្តិភាពនារសៀលថ្ងៃទី០១ ខែមិថុនា ឆ្នាំ២០២១នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានទទួលជួបពិភាក្សាការងារ ជាមួយលោកស្រី វេនឌី សឺមែន (Wendy R. Sherman) អនុរដ្ឋមន្ត្រីការបរទេសសហរដ្ឋអាមេរិក ។
តាមរយៈលោក អ៊ាង សុផល្លែត ជំនួយការសម្តេចតេជោ ក្នុងជំនួបនេះ លោកស្រី សឺមែន បានគោរពជម្រាបជូនសម្តេចតេជោថា ដំណើរទស្សនៈកិច្ចរបស់លោកស្រី មកកាន់កម្ពុជានាពេលនេះ គឺដើម្បីពាំនាំយកលិខិតរបស់លោក ប្រធានាធិបតី ចូ បៃដិន មកជូនសម្តេចតេជោ ដោយផ្ទាល់។លោកស្រីនិយាយ ថា ជាបំណងរបស់លោកប្រធានាធិបតី ចូ បៃដិន ក្នុងន័យធ្វើយ៉ាងណា ឱ្យអ្វីៗមានភាពល្អសម្រាប់ប្រទេសទាំងពីរ។ លោកស្រី បានសម្ដែងនូវការពេញចិត្តយ៉ាងខ្លាំង ចំពោះកិច្ចសហប្រតិបត្តិការរវាងកម្ពុជា និងសហរដ្ឋអាមេរិកកន្លងមក លើវិស័យជាច្រើន ជាពិសេសលើវិស័យរុករកអដ្ឋិធាតុទាហានអាមេរិក ដែលបាត់ខ្លួននៅកម្ពុជា, កិច្ចសហប្រតិបត្តិការប្រយុទ្ធប្រឆាំងនឹងភេរវកម្ម និងនិងកិច្ចសហប្រតិបត្តិការវិស័យមនុស្សធម៌ ដូចជាការអនុញ្ញាតឲ្យកប៉ាល់ Westerdam ចូលចតនៅកម្ពុជា ដើម្បីជួយសង្គ្រោះប្រជាជន ដែលជាប់នៅលើកប៉ាល់ ដោយប្រទេសទៀតមិនអនុញ្ញាតឲ្យចូល ដោយបញ្ហាកូវីដ១៩។
លោកស្រីវេនឌី សឺមែន (Wendy R. Sherman) ក៏បានជម្រាបជូនសម្ដេចតេជោផងដែរ អំពីឱកាសនៃកិច្ចសហប្រតិបត្តិការរវាងប្រទេសទាំងពីរ ដែលរួមមានទាំងការលុបបំបាត់បំណុលរបស់កម្ពុជា, កិច្ចសហប្រតិបត្តិការលើប្រេងនិងឧស្ម័ន និងការវិនិយោគរបស់សហរដ្ឋអាមេរិកលើបញ្ហាទឹក បញ្ហាហេដ្ឋារចនាសម្ព័ន្ធ បញ្ហាថាមពលបៃតង និងបញ្ហាដទៃទៀតជាច្រើន។
សម្តេចតេជោ បានសំដែងនូវការរីករាយ ចំពោះអ្វីដែលលោកស្រី បានលើកឡើង និងអ្វីដែលសហរដ្ឋអាមេរិក បានរួមចំណែកជួយដល់កម្ពុជា រួមមានចំណែកក្នុងការស្វែងរកសន្តិភាពនៅកម្ពុជា ការចូលរួមចំណែកអភិវឌ្ឍន៍កម្ពុជា រហូតមកដល់ពេលនេះ និងការចូលរួមចំណែករបស់សហរដ្ឋអាមេរិក មកដល់កម្ពុជាដោយផ្ទាល់ និងដោយប្រយោល តាមរយៈអង្គការសុខភាពពិភពលោក ក្នុងការប្រយុទ្ធប្រឆាំងនឹងជំងឺរាតត្បាតកូវីដ១៩។
សម្តេចតេជោក៏បានថ្លែងនូវការអបអរសាទរ ជូនដល់ប្រជាជន រដ្ឋាភិបាលសហរដ្ឋអាមេរិក ដែលបានទប់ស្កាត់ជំងឺកូវី១៩ បានជោគជ័យ ដែលជាការឆ្លុះបញ្ចាំងរយៈពេលប៉ុន្មានថ្ងៃកន្លងមកនេះ គឺមានការចុះថយ នៃការរីករាលដាលឆ្លងជំងឺកូវីដ១៩ នៅសហរដ្ឋអាមេរិក គួរឲ្យកត់សម្គាល់។
សម្ដេចក៏បានថ្លែងអំណរគុណ ចំពោះលោកស្រី សឺមែន នូវអ្វីដែលលោកស្រី បានលើកឡើង ជាពិសេសការដោះស្រាយនូវបញ្ហាបំណុល។ សម្ដេចតេជោ បានស្នើសុំឲ្យសហរដ្ឋអាមេរិក ជាពិសេសលោកប្រធានាធិបតី ចូ បៃដិន ពិនិត្យពិចារណាដោះស្រាយបំណុល ដែលកម្ពុជាមានចំពោះសហរដ្ឋអាមេរិក តាមវិធីទ្វេភាគី ដោយអនុញ្ញាតឲ្យកម្ពុជា សងប្រាក់បំណុលនេះ តាមកម្មវិធីសងឡើងវិញបន្តិចម្ដងៗ និងទី២សងប្រាក់តាមកម្មវិធី ដែលមានការប្រាក់ត្រឹម១% និងទី៣ បំណុលដែលកម្ពុជាជំពាក់សហរដ្ឋអាមេរិកនោះ គឺសំណង៧០ភាគរយ ត្រូវបង្វិលមកធ្វើជាជំនួយដល់កម្ពុជាវិញ ទៅលើវិស័យអប់រំ វិស័យវប្បធម៌ វិស័យ យុទ្ធភ័ណ្ឌមិនទាន់ផ្ទុះជាដើម។ សម្តេចតេជោក៏បានស្នើឲ្យសហរដ្ឋអាមេរិក ពិនិត្យឡើងវិញ លើកិច្ចសហប្រតិបត្តិការ លើការបញ្ជូនជនជាតិកម្ពុជាត្រឡប់មកពសហរដ្ឋអាមេរិកមកកម្ពុជាវិញ។
លោកស្រីអនុរដ្ឋមន្ត្រីការបរទេសសហរដ្ឋអាមេរិក បានថ្លែងអំណរគុណជូនចំពោះសម្ដេចតេជោ រាល់កិច្ចសហប្រតិបត្តិការ ហើយលោកស្រី សន្យាថា អ្វីដែលជាការលើកឡើងរបស់សម្ដេចតេជោ ជាសំណើរបស់សម្តេចតេជោ, លោកស្រីនឹងលើកទៅជូនលោកប្រធានាធិបតី ចូ បៃដិន។
សូមបញ្ជាក់ថា តាមគម្រោងក្នុងដំណើរទស្សនកិច្ចរយៈពេល ១១ថ្ងៃ ពីថ្ងៃទី២៥ ខែឧសភា ដល់ថ្ងៃទី៤ ខែមិថុនា នៅអឺរុប និងអាស៊ីអាគ្នេយ៍ លោកស្រី Sherman បានទៅបំពេញទស្សនកិច្ចដំបូង ក្នុងទីក្រុងព្រុចសែល ប្រទេសបែលហ្ស៊ិក ដើម្បីពិភាក្សាការងារយុទ្ធាស្ត្ររវាងអាមេរិក និងអឺរុប ទាក់ទងនឹងឥទ្ធិពលរបស់ចិន។ រួចហើយ លោកស្រី បាននិងកំពុងធ្វើដំណើរទៅកាន់ទីក្រុង អង់ការ៉ា និងអ៊ីស្តង់ប៊ុល នៃប្រទេសតួកគី ដើម្បីនិយាយពីបញ្ហាសិទ្ធិមនុស្ស និងការពង្រឹងកម្លាំងទ័ពជាមួយអង្គការណាតូ។
បន្ទាប់មក លោកស្រីនឹងធ្វើដំណើរមកកាន់តំបន់អាស៊ីអាគ្នេយ៍ ដោយផ្តើមដំបូងគឺទៅទីក្រុងហ្សាកាតា ប្រទេសឥណ្ឌូនេស៊ី ដើម្បីពិភាក្សាស្វែងរកដំណោះស្រាយគន្លឹះពីបញ្ហាភូមា និងការពង្រឹងបន្ថែមទំនាក់ទំនងអាមេរិក អាស៊ាន។ រួចហើយទើបលោកស្រី ធ្វើដំណើរមកកាន់រាជធានីភ្នំពេញ នៅថ្ងៃទី ១ខែមិថុនា មុននឹងបន្តដំណើរទៅកាន់ទីក្រុងបាងកក ប្រទេសថៃ ដើម្បីពិភាក្សាដដែលពីបញ្ហាភូមា បញ្ហាតំបន់ទន្លេមេគង្គ និងបញ្ហាផ្សេងទៀត ជាមួយរដ្ឋាភិបាលថៃ៕