ប្រវត្តិខ្លះៗរបស់បុរសលក់នំបុ័ងនៅប៉ោយប៉ែតយូជាងគេដែលឃើញស្លាប់ក្នុងស្រះទឹកយ៉ាងអាថកំបាំង?!
07-November-2024 / សន្តិសុខសង្គម
បន្ទាយមានជ័យ៖ឈ្មោះ ធីម ធី ជាស្ថាបនិក អ្នកលក់នំបុ័ងយូរឆ្នាំជាងគេនៅស្រុកអូរជ្រៅ ខេត្តបន្ទាយមានជ័យត្រូវបានឃើញទទួលមរណៈភាពដោយសារលង់ទឹកស្រះមួយកន្លែងយ៉ាងអាថកំបាំង នៅសង្កាត់ផ្សារកណ្តាល ក្រុងប៉ោយប៉ែតកាលពីថ្ងៃទី៥ឧសភា២០២១ ។
ធីម ធី មានដើមកំណើត នៅភូមិបុសឡាវ ស្រុកក្រចេះ និង ខេត្តក្រចេះ គេបានធើ្វដំណើរមកកាន់ ទឹកដីជាយដែនខ្មែរថៃ ក្រុងប៉ោយប៉ែតប្រកប មុខរបរជាអ្នកលក់នំបុ័ង ។ការមកស្នាក់នៅទីតាំងថ្មី ប៉ោយប៉ែតកាលនោះក្រុងនេះ ស្ថិតនៅក្នុងស្រុកអូរជ្រៅនៅឡើយ ។ធីម ធី ដើរលក់នំបុ័ង គ្រប់ច្រកល្ហក ពេលព្រឹក និងពេលយប់ ធ្វើឲ្យមជ្ឈដ្ឋានទូទៅ ជាពិសេសកម្មករលីសែងទំនិញគីប និងអ្នកអូសរទេះ និយមគាំទ្រនំបុ័ងរបស់គាត់ណាស់នាកំឡុងឆ្នាំ២០០០។
កាលនោះយើងនៅចាំបានថាក្រោយទទួលបានអតិថិជនច្រើនគួរសម ធីម ធី ក៏ពូកែប្រឹងប្រែងសន្សំសំចៃថវិកាបានពីចំណូលលក់នំបុ័ងនោះរូបគេទិញបាន នាឡិកាដៃ និងខ្សែក ដើម្បីពាក់លំអរ ខ្លួនក្នុងវ័យប្រហែលខ្ទង់២៨ឆ្នាំ ។ នៅដើមឆ្នាំ២០០២ ធីម ធី ឡើងកូតយ៉ាងខ្លាំងរូបគេមានទាំងចិញ្ចៀនត្រាមាស ពាក់ ហ៊ឺហាគួរសមទៀតផង ។
អ្នកផ្សារអគ្គប៉ោយប៉ែតនរណាៗ ក៏កោតសសើរថា ធីម ធី ជាមនុស្សល្អចេះសន្សំទុកដាក់លុយនិង មិនសេពគប់ ក្រុមជនសង្គមងងឹតផ្តេសផ្តាស់ទេ ពោលគឺគេដឹងតែប្រឹងប្រែងរកប្រាក់ដើម្បីទុកសាងវាសនាជាមួយ អនាគត(ស្ត្រីម្នាក់)ដែលស្ម័គ្ររួមរស់ជាមួយរូបគេ ។ នៅឆ្នាំ២០០៤ គេបានឃើញ ធីម ធី ពរក្មេងស្រីដើរលេងនៅម្តុំភូមិក្បាលស្ពាន១ ស្ថិតក្នុងសម្បុរភ្លឺថ្លា ពេលនោះរូបគេបង្ហើបថា ខ្ញុំមានប្រពន្ធហើយនាងជាបុគ្គលិកបំរើការងារក្នុង ក្រុមហ៊ុនបនល្បែងកាស៊ីណូមួយនៅក្រុងប៉ោយប៉ែតហ្នឹង ។
ជីវិតជាការតស៊ូ យ៉ាងស្វិតស្វាញនៃមនុស្សសត្វផងទាំងឡាយគឺ ធីម ធី មិនបានកែប្រែអាជីពរបស់ខ្លួនទេនៅតែរក្សាមុខរបរ ស្ពាយ កញ្ឆេរដើរលក់នំបុ័ង តាមច្រកល្ហកក្នុងមូលដ្ឋានរបស់ ក្រុងប៉ោយប៉ែតដដែល ។នាកំឡុងឆ្នាំ ២០១៣ ធីម ធី ហាក់ធ្លាក់កូតខ្លាំងជាងពេលណាៗទាំងអស់ ពោលគឺស្បែកនិង សាច់ឈាម របស់គាត់ មានសភាពស្លេកស្លាំង ពេលនោះគាត់បានចូលលុយ ជាមួយក្រុមការងារ របស់ខ្ញុំនូវទឹកប្រាក់ចំនួន៥០០០រៀលដើម្បីរៀបចំពិធីកាន់វេនបិណ្ឌតាមវត្តអារាម ធីម ធី ថា ខ្ញុំមិនសូវបានធ្វើបុណ្យច្រើនទេបង ហើយឥឡូវ ខ្ញុំក៏មានទុក្ខកង្វល់ច្រើនដែរ ព្រោះអ្វីៗ បានប្រែប្រួល គឺ ភរិយារបស់គាត់ រត់ចោលនិងយកកូនទៅ អស់ហើយ ខ្ញុំគ្មានសេសសល់អ្វីទៀតទេ។
និយាយបណ្តើរទឹកភ្នែក របស់គាត់ហូរជោរជន់មកដោយមិនដឹងខ្លួន ហើយក៏លើកកញ្ឆេរនំបុ័ង ដើរសំដៅឆ្ពោះទៅទិសខាងលិចដើម្បីដើរលក់នំបុ័ង ចិញ្ចឹមខ្លួន។ ក្រោយៗមកទៀតកំឡុងឆ្នាំ២០១៨ គេឧស្សាហ៍បានឃើញបុរសលក់នំបុ័ង រូបនេះដើរលក់នំនៅម្តុំតូបកាហ្វេ ក្នុងផ្សារអគ្គថ្មី ប៉ោយប៉ែតខ្លាំងណាស់ នំបុ័ង របស់គាត់ លែងមានគេគាំទ្រងដូចមុនទៀតហើយ ។ ពេលខ្លះគេបង្ខំ ចិត្តទិញគាត់ ក្នុងទិដ្ឋភាពអាណិតអាសូរចំពោះគាត់តែប៉ុណ្ណោះ បុរសដែល តែងចាំទិញនំបុ័ងគាត់គឺ បង គ្រី ទិញនំបុ័ង១ដើមឲ្យលុយមួយម៉ឺនរៀលជារៀងរាល់ព្រឹក ។
នាដើមឆ្នាំ២០១៩ ធីម ធី បានចូលវត្តបាលិលេយ្យ ដើម្បីអុជធូបនិងបន់ស្រន់ឲ្យទស្សនរមី តាមថែរក្សាកូនៗ របស់គាត់ រួមនិងភរិយាផង ។ ខ្ញុំចាំបានក្រោយពី ឃើញគាត់ដើរចេញពីមុខបលង្ក័ព្រះ ធីម ធី ហាក់អស់កម្លាំងចិត្តខ្លាំង រាងកាយក៏ស្គមហើយ បានសុំព្រះគ្រូសង្ឃរាជវត្តដេកសំរាក កាយលើបង់១នៅក្រោមដើមស្នាយ ហើយខ្ញុំបានសួរដេញដោលជាមួយ គាត់ជាច្រើនប្រយោគ ជុំវិញខ្សែជីវិត ។ គាត់ថា ខ្ញុំកើតឆ្នាំនៅ ១៩៧៥ ឆ្នាំរោង ខ្ញុំអស់សង្ឃឹមនិងជីវិតមួយនេះខ្លាំងណាស់ ខ្ញុំចង់ដេករហូតហើយមិនចង់ក្រោកដឹងខ្លួនទៀតឡើយ ព្រោះខ្ញុំហត់និង ការតស៊ូរបស់ខ្លួនឯងពេកហើយ ។ ខ្ញុំថា កុំនិយាយ បែបនេះអី មាត់ស៊ីអំបិល ប្រហុកដេកនិង ដួលរលំ វាជាធម្មជាតិ របស់រុក្ខជាតិ ឯ មនុស្សយើង កើត ចាស់ ឈឺ ស្លាប់ ជា សច្ចធម៌ គ្មានអ្នកណាម្នាក់អាចគេចចេញបានឡើយ និយាយចប់ខ្ញុំបានរួតរះដើរចេញពី គេ ទុកពេលឲ្យគាត់សំរាកសំរាននៅទីនោះ ។
លុះក្រោយៗមក ខ្ញុំក៏នៅតែឃើញគាត់ ស្ពាយ កញ្ឆេរនំបុ័ងដើរលក់នាព្រឹកៗ តាមដងវិថី ម្តុំផ្ទះអ្នក ស្រុក ផ្កាយ៣ និងរង្វង់មូល ច្រកទ្វារ អន្តរជាតិ ប៉ោយប៉ែត ជាធម្មតា តែរាងកាយស្លេកស្លាំង ខុសសព្វមួយដង ។ប៉ុន្តែក្នុងកំឡុងពេលបិទខ្ទប់ភូមិការពារជំងឺខូវិដ-19 សាលាក្រុងបានបែងចែកតំបន់ ក្រហម និងហាមឃាត់ប្រជា ពលរដ្ឋចេញចូលនិងលក់ដូរ ស្រាប់ ធីម ធី អាចប្រឈម មានកង្វះស្បៀងអាហារមួយផ្នែក និងមួយ ផ្នែកទៀត គាត់មានជំងឺ ប្រចាំកាយផង ។ស្រាប់តែព្រឹកថ្ងៃទី០៥ ខែឧសភាឆ្នាំ ២០២១ នេះឃើញគេផ្សព្វផ្សាយថា ធីម ធី បានស្លាប់យ៉ាងអាថកំបាំងដោយសារលង់ទឹកស្រះ នៅចំណុចភូមិ ផ្សារកណ្ដាលសង្កាត់ផ្សារកណ្តាលក្រុងប៉ោយប៉ែតខេត្តបន្ទាយមានជ័យ បាត់ហើយ ហើយក៏មិនឃើញ មានកូនប្រពន្ធមកមើលដែរ ៕(សហការីមកពីប៉ោយប៉ែត)
