វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3647 នាក់
ម្សិលមិញ 4292 នាក់
សរុប 14113346 នាក់
ភ្នំពេញ៖នៅព្រឹកថ្ងៃសុក្រ ទី២៦ ខែមីនា ឆ្នាំ២០២១នេះ វ៉ាក់សាំងកូវីដ-១៩ ស៊ីណូវ៉ាក់ (Sinovac) របស់ចិនចំនួន ១.៥លានដូស បានដឹកមកដល់ប្រទេសកម្ពុជាយើងហើយ។ នេះគឺជាការបញ្ជាទិញរបស់រាជរដ្ឋាភិបាលកម្ពុជា ដើម្បីបង្កើនការចាក់ជូនប្រជាពលរដ្ឋក្នុងបេសកកម្មប្រយុទ្ធប្រឆាំងជំងឺកូវីដ-១៩។
ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ និងភាគីចិនតំណាងដោយឯកឧត្តម វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា ព្រមទាំងមានការចូលរួមពីមន្ត្រីនៃក្រសួងសុខាភិបាលផងដែររៀបចំទទួលនោះព្រលានយន្តហោះ។
វ៉ាក់សាំង Sinovac ដែលផលិតដោយក្រុមហ៊ុនចិន Sinovac Biotech មានតម្លៃ១០ដុល្លារក្នុង១ដូស។ វាមានលក្ខខណ្ឌប្រើប្រាស់ និងប្រសិទ្ធភាពមិនខុសប្លែកពីវ៉ាក់សាំង ស៉ីណូហ្វាម (Sinopharm) នោះទេ ហើយជីវិតវ៉ាក់សាំងថ្មីនេះ អាចប្រើប្រាស់បានក្នុងរយៈពេល៣៦ខែ ប៉ុន្តែក្រុមហ៊ុនណែនាំឱ្យចាក់ក្នុងរយៈពេល៦ខែ ដើម្បីកាន់តែទទួលបានប្រសិទ្ធភាព។
រាជរដ្ឋាភិបាលកម្ពុជា កំពុងចរចាដើម្បីទិញវ៉ាក់សាំងបង្ការជំងឺកូវីដ-១៩ ប្រភេទ Sinovac ប្រមាណ៤លានដូសបន្ថែមទៀត ពីភាគីចិន ដើម្បីចាក់ជូនប្រជាពលរដ្ឋឥតគិតថ្លៃតាមផែនការ។ រាជរដ្ឋាភិបាលកម្ពុជា មានគម្រោងចាក់ជូនប្រជាពលរដ្ឋឱ្យបានរហូតដល់ជាង ១០លាននាក់ ដើម្បីទប់ស្កាត់ការរីករាលដាលជំងឺកូវីដ-១៩ ប្រកបដោយប្រសិទ្ធភាព និងស្តារសេដ្ឋកិច្ចដែលរងផលប៉ះពាល់ឡើងវិញ។ ក្រៅពីវ៉ាក់សាំង Sinovac ដែលទើបមកដល់ ១.៥លានដូសនេះ តាមការគ្រោងទុកវ៉ាក់សាំងស៊ីណូហ្វាម (Sinopharm)ដែលជាជំនួយរបស់រដ្ឋាភិបាលចិន ចំនួន៧០ម៉ឺនដូសទៀត (៣០ម៉ឺនដូសសម្រាប់ក្រសួងការពារជាតិ និង៤០ម៉ឺនដូស សម្រាប់ក្រសួងសុខាភិបាល) នឹងមកដល់កម្ពុជា នាពេលខាងមុខនេះផងដែរ។
លោក វង្សី វិស្សុត ថ្លែងបន្តថា ការទទួលបានជាវ៉ាក់សាំងជាបន្តបន្ទាប់នេះ រាជរដ្ឋាភិបាលនៅតែបន្តប្រកាន់យកគោលការណ៍បុរេសកម្ម ដើម្បីទិញ និងទទួលវ៉ាក់សាំង ដែលមានភាពសមស្របបំផុតទៅនឹងតម្រូវការ និងស្ថានភាពជាក់ស្តែងរបស់កម្ពុជា ឱ្យបានឆាប់ និងឱ្យបានគ្រប់ចំនួន ឆ្លើយតបទៅតាមផែនការចាក់វ៉ាក់សាំង សម្រាប់ចាក់ជូនប្រជាជនកម្ពុជាឱ្យបានគ្រប់គោលដៅចំនួនជាង ១០លាននាក់។ ជាមួយគ្នានោះដែរ លោករដ្ឋលេខាធិការថា កម្ពុជា កំពុងសិក្សានិងទំនាក់ទំនងជាមួយក្រុមហ៊ុន Johnson and Johnson របស់សហរដ្ឋអាមេរិក ដើម្បីទិញវ៉ាក់សាំង Janssen ពីក្រុមហ៊ុនមួយនេះ ។
លោក វ៉ាង វិនធៀន ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិន ប្រចាំកម្ពុជា មានប្រសាសន៍ថា វ៉ាក់សាំង Sinovac ចំនួន ១លាន ៥សែនដូស ដែលកម្ពុជាទិញពីចិននេះ បានចំណាយពេលតែ ២សប្តាហ៍ប៉ុណ្ណោះ ដើម្បីបំពេញបែបបទទាំងឡាយ ដោយពិចារណាភាពជាក់ស្តែង និងចំណងមិត្តភាពរវាងចិន និងកម្ពុជា ហើយក្រុមហ៊ុនវ៉ាក់សាំង ក៏បានផ្តល់ក្នុងតំលៃពិសេសបំផុត ដែលជាកិច្ចសហប្រតិបត្តិការដ៏សំខាន់មួយទៀតរវាងកម្ពុជា និងចិន ក្នុងការប្រយុទ្ធប្រឆាំងនឹងជំងឺកូវីដ-១៩។អ្នកនាំពាក្យក្រសួងការបរទេសចិន លោកវ៉ាងវ៉េប៊ីន( Wang Wenbin) បានឲ្យដឹងថា បច្ចប្បន្នប្រទេសចិនកំពុងផ្តល់ជំនួយវ៉ាក់សាំង COVID-19 ដល់ប្រទេសកំពុងអភិវឌ្ឍន៍ចំនួន៥៣ នៅជុំវិញពិភពលោក។ នេះបើតាមទីភ្នាក់ងារសារព័ត៌មានស៊ីនហួរ នៅយប់ថ្ងៃចន្ទ ទី០៨ ខែកម្ភៈ ឆ្នាំ២០២១។