កូវីតសម្លាប់ពិធីករមាឌធំ MC Boom និងចិនម្នាក់ទៀត
30-May-2025 / សុខភាពនិងកីឡា
ភ្នំពេញ៖ ពិធីករមាឌធំ លោកឈាន ប៊ុនធឿន ហៅ MC Boom ត្រូវបាននាយកណ្តុរជាមិត្តភក្តិបានប្រកាសថាបានទទួលមរណភាពដោយសារកូវីតកាលពីព្រឹកថ្ងៃទី២៥ ខែមីនាឆ្នាំ២០២១នេះបង្កើតឲ្យមានការភ្ញាក់ផ្អើលនិងមិនគួរឲ្យជឿក្រោយពីលោកមានមាឌធំ ហាក់មើលទៅមានសុខភាពមាំទាំ ។ តារាកំប្លែង និងចម្រៀង នាយកណ្តុរបានបញ្ជាក់នៅលើហ្វេសប៊ុកផ្ទាល់ខ្លួនថា “ពុទ្ធោអើយ! ពួកម៉ាកខ្ញុំស្លាប់បាត់ហើយដោយសារកូវីដ ពិតជាមិនគួរឲ្យជឿលឿនពេកហើយ”។
ករណីយ៍នេះបើយោងតាម របាយការណ៍ពីមន្ទីរពេទ្យមិត្តភាពខ្មែរ -សូវៀត បានឱ្យដឹងថា មាន បុរស២នាក់បានស្លាប់បាត់បង់ជីវិត ដែលមានដូចខាងក្រោម ៖
ទី១. (MC Boom មាន ឈ្មោះ ឈាន ប៊ុនធឿន ជនជាតិខ្មែរ ភេទប្រុស អាយុ៣៨ឆ្នាំ )មានអាសយដ្ឋាននៅភូមិសាមគ្គី សង្កាត់ត្រពាំងក្រសាំង ខណ្ឌពោធិសែនជ័យ រាជធានី ភ្នំពេញ នៅថ្ងៃទី ១៦ ខែមីនា ឆ្នាំ២០២១ បានរកឃើញតេស្តវិជ្ជមាន វីរុសកូវីដ-១៩ និងបានដាក់ឱ្យសម្រាកព្យាបាលនៅសណ្ឋាគារ Great Duke ហើយរហូតដល់ថ្ងៃទី២០ ខែមីនា ឆ្នាំ២០២១ ដោយសារមានអាការៈហត់ បុរសខាងលើ ត្រូវបានបញ្ជូនទៅសម្រាក ព្យាបាលនៅមន្ទីរពេទ្យមិត្តភាពខ្មែរ-សូវៀត ហើយនៅថ្ងៃដដែលនេះ ក្រុមគ្រូពេទ្យបានពិនិត្យសុខភាព និងធ្វើការថតសួតរបស់គាត់ បង្ហាញថា គាត់មានរលាកសួតទាំងសងខាងធ្ងន់ធ្ងរខ្លាំង និងខ្សោយសួតខ្លាំង និងបានប្រើប្រាស់ម៉ាស៊ីនជំនួយផ្លូវដង្ហើមនៅថ្ងៃដដែល នោះរហូតមកដល់ថ្ងៃចុងក្រោយនេះ ប៉ុន្តែដោយសារការរលាកសួតទាំងសងខាងធ្ងន់ធ្ងរខ្លាំងទៅៗ និងខ្សោយរសូតខ្លាំងទៅៗ អ្នកជំងឺ បានបាត់បង់ជីវិតនៅថ្ងៃទី២៥ ខែមីនា ឆ្នាំ២០២១ វេលាម៉ោង ០៧:៣៥នាទីព្រឹក ទោះជាមានការខិតខំប្រឹងប្រែងយកចិត្តទុកដាក់អស់ពីសមត្ថភាពពីសំណាក់ក្រុមគ្រូពេទ្យក៏ដោយ ។សូមបញ្ជាក់ថាលោកប៊ូមជាពិធីករសេរី( Freelance) តាមរោងការ និងធ្លាប់ធ្វើការជាមួយតារាកំប្លែង សេង ចិន្តា (ហៅអ៊ីត) និងមានស្រុកកំណើតនៅភូមិកណ្តាល ឃុំមានជ័យ ស្រុកឧដុង្គ ខេត្តកំពង់ស្ពឺ មានជំងឺធាត់កម្រិត១ និងលើសឈាម,។
២. បុរសជនជាតិចិន អាយុ ៤៣ឆ្នាំ ដែលមានអាសយដ្ឋាននៅសណ្ឋាគារឃុងយ័ន ឃុំសំពៅពូន ស្រុកកោះធំ ខេត្តកណ្តាល បានរកឃើញតេស្តវិជ្ជមានជំងឺកូវីដ-១៩ នៅថ្ងៃទី១១ ខែមីនា ឆ្នាំ២០២១ ហើយបានដាក់ឱ្យសម្រាកព្យាបាលនៅមន្ទីរពេទ្យជ័យជំនះ នៅថ្ងៃដដែលនោះហូតដល់ថ្ងៃទី១៨ ខែមីនា ឆ្នាំ ២០២១ អាការៈបុរសនេះមានសភាពហត់ខ្លាំងជាមួយនិងលទ្ធផលពីក្រុមគ្រូពេទ្យ ពិនិត្យឃើញថា មានការថយចុះនូវអុកស៊ីហ្សែនសម្រាប់ការដកដង្ហើមខ្លាំង ក៏បានបញ្ជូនបន្តព្យាបាលនៅមន្ទីរពេទ្យមិត្តភាពខ្មែរ-សូវៀត នៅថ្ងៃទី១៨ខែមីនាឆ្នាំ២០២១។ ការពិនិត្យសុខភាព និងការថតសួតបានបង្ហាញថាគាត់មានរលាកសួតទាំងសងខាងធ្ងន់ធ្ងរខ្លាំង និង ខ្សោយសូតខ្លាំង ហើយក្រុមគ្រូពេទ្យបានផ្តល់ការព្យាបាលតាមបច្ចេកទេស និងប្រើប្រាស់ម៉ាស៊ីនជំនួយការដកដង្ហើមបន្ថែមតាំងពីថ្ងៃ នោះមក ប៉ុន្តែទោះជាមានការខិតខំប្រឹងប្រែងអស់ពីសមត្ថភាពពីសំណាក់ក្រុមគ្រូពេទ្យក៏ដោយ ជាអកុសល មិនអាចជួយសង្គ្រោះ បាន ក៏បុរសនេះបានធ្វើមរណៈកាលនៅថ្ងៃទី២៥ ខែមីនា ឆ្នាំ២០២១ វេលាម៉ោង ០៧:៤៥នាទីព្រឹក ។ជាការសន្និដ្ឋានរបស់ក្រុមគ្រូពេទ្យ៖ បុរសទាំង២ខាងលើ គឺបានស្លាប់បាត់បង់ជីវិត ដោយសារជំងឺកូវីដ-១៩ វៃលុកលឿន ធ្វើ ឱ្យរលាកសួតទាំងសងខាងធ្ងន់ធ្ងរ និងខ្សោយសូតខ្លាំងពេក។
នៅព្រឹកថ្ងៃទី២៥ ខែមីនា ឆ្នាំ២០២១នេះ ក្រសួងសុខាភិបាល បានចេញសេចក្តីប្រកាសព័ត៌មាន បញ្ជាក់ពីការបន្តរកឃើញអ្នកឆ្លងកូវីដ-១៩ថ្មីរហូតដល់៥៥នាក់ ដែលសុទ្ធសឹងជាករណីឆ្លងក្នុងសហគមន៍ «ព្រឹត្តិការណ៍២០កុម្ភៈ» ខណៈអ្នកជំងឺចំនួន២៣នាក់បានជាសះស្បើយ និងអនុញ្ញាតឲ្យចេញពីមន្ទីរពេទ្យ។គិតត្រឹម ព្រឹកថ្ងៃទី២៥ ខែមីនា ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន ១៨៧២នាក់ ក្នុងនោះអ្នកជាសះស្បើយចំនួន ១០៥៦នាក់, អ្នកកំពុងសម្រាកព្យាបាលជំងឺចំនួន ៨០៩នាក់, ស្លាប់ចំនួន៥នាក់ និង២នាក់ទៀតស្លាប់ដោយសារការរើថ្នាំញៀនធ្ងន់ធ្ងរ និងស្ទះសរសៃឈាមបេះដូង ពេលកំពុងទទួលការព្យាបាលជំងឺកូវីដ-១៩៕
