វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 896 នាក់
ម្សិលមិញ 8227 នាក់
សរុប 14127777 នាក់
ថៃ៖ អំពើហិង្សាបានផ្ទុះឡើងរវាងក្រុមបាតុករ និងកម្លាំងប៉ូលីសថៃអំឡុងការតវ៉ាប្រឆាំងរដ្ឋាភិបាលនៅក្បែរនិវេសដ្ឋាននាយករដ្ឋមន្ត្រី ប្រាយុទ្ធ ចន្ទអូចា ក្នុងទីក្រុងបាងកក នៅវេលាម៉ោង៣រសៀលថ្ងៃទី២៨ ខែកុម្ភៈ ឆ្នាំ២០២១ បណ្ដាលឲ្យមនុស្សជាច្រើនរងរបួស និងត្រូវចាប់ខ្លួន។
កាសែតបាងកកប៉ុស្តិ៍ បាននិយាយថា៖ ថា ក្រុមបាតុករដែលភាគច្រើនជាយុវជនប្រមាណ១៥០០នាក់ បានជួបជុំគ្នានៅវិមានជ័យជម្នះនាទីក្រុងបាងកកនៅម៉ោងបីរសៀល ហើយក៏ដង្ហែរក្បួនទៅកាន់ទីបញ្ជាការកងពលតូចថ្មើរជើងលេខ១ ដែលជាកងអង្គរក្សគ្រប់គ្រងដោយព្រះមហាក្សត្រថៃ។ ក្រុមបាតុកម្មប្រឆាំងរដ្ឋាភិបាលថៃ បានចាប់ផ្ដើមកម្រើកសកម្មភាពជាថ្មីនៅចុងសប្ដាហ៍មុន។ គោលដៅរបស់បាតុករ គឺនិវេសនដ្ឋាននាយករដ្ឋមន្ត្រី ប្រាយុទ្ធ ចន្ទអូចា។ ព្រោះមិនខុសពីការតវ៉ាឆ្នាំមុនៗឡើយ ដោយពួកគេទាមទារឱ្យលោក ប្រាយុទ្ធ លាលែងពីតំណែង ដោយចោទលោកលើកំហុសជាច្រើនដូចជាអំពើពុករលួយ អសមត្ថភាពដោះស្រាយបញ្ហាសេដ្ឋកិច្ច និងកូវីដ-១៩ ជាដើម។
ក្រុមប៉ូលីសបង្ក្រាបកុបកម្មប្រមាណពីរពាន់នាក់ ត្រូវបានពង្រាយដើម្បីដោះស្រាយស្ថានការណ៍ដែលតានតឹង ហើយរនាំងត្រូវបានដាក់លើផ្លូវដើម្បីរារាំងបាតុករចូលទៅក្បែរផ្ទះលោក ប្រាយុទ្ធ។ អំពើហិង្សាបានផ្ទុះឡើងនៅម៉ោងប្រមាណ៦កន្លះល្ងាចរវាងបាតុករ និងប៉ូលិស។ ប៉ូលិសថៃបានបាញ់ឧស្ម័នបង្ហូរទឹកភ្នែក និងរថយន្តបាញ់ទឹកដើម្បីបំបែកបាតុករ ដែលបានចោលវត្ថុជាច្រើនដាក់ប៉ូលិសវិញ។ ប៉ូលិសថៃ ក៏បាញ់គ្រាប់កៅស៊ូជាច្រើនដែរ។ ចំណែកអ្នកតវ៉ាជាច្រើន រងរបួសក្នុងការប៉ះទង្គិចនេះ ហើយមនុស្សជាច្រើននាក់ ក៏ត្រូវបានចាប់ខ្លួនផងដែរ។
គួរបញ្ជាក់ថា ចំពោះការទាមទារឲ្យលោកនាយករដ្ឋមន្ត្រីថៃ លាលែងពីតំណែង ជាលក្ខខណ្ឌមួយក្នុងចំណោមការទាមទារសំខាន់ៗរបស់បាតុករដែលភាគច្រើនជាយុវជន។ ពួកគេក៏ទាមទារឱ្យលុបចោលរដ្ឋធម្មនុញ្ញតាក់តែងដោយយោធាដែលរួមបញ្ចូលការកាត់បន្ថយអំណាចស្ដេចផងដែរ។ ការនិយាយប៉ះពាល់ស្ថាប័នកំពូលថៃ នាំឱ្យមេដឹកនាំបាតុករជាច្រើន ត្រូវចោទប្រកាន់ពីបទប្រមាថស្ដេចដែលជាទោសដ៏ធ្ងន់ធ្ងរមួយ៕