វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2251 នាក់
ម្សិលមិញ 3717 នាក់
សរុប 14150584 នាក់
ភ្នំពេញ៖លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលនៅព្រឹកថ្ងៃ ២៣ កុម្ភៈ ២០២១បានសម្រាយមន្ទិលមួយចំនួនពាក់ព័ន្ធនឹងការជជែកវែកញែកពីប្រភពរាតត្បាតដំបូងនៃកូវីដ១៩ ថាមានប្រភពពីសត្វប្រចៀវនៅស្រុកខ្មែរ ។ «មិនទាន់មានការបញ្ជាក់ថា កូវីដ១៩មានប្រភពដំបូងចេញពីប្រទេសណានៅឡើយ សូមកុំទាន់សន្និដ្ឋានខុសពីអ្វីដែលគេរកឃើញ»។លោកស្រីអ្នកនាំពាក្យក្រសួងសុខាភិបាលអះអាងថា មានលេចឮការបកស្រាយថា កូវីដ១៩មានប្រភពចេញពីកម្ពុជា។ លោកស្រីបដិសេធនូវការបកស្រាយទាំងនោះ និងបានរំឭកពីការសិក្សាតូចមួយរបស់វិទ្យាស្ថានប៉ាស្ទ័រ ដែលរកឃើញវីរុសប្រហាក់ប្រហែលកូវីដ១៩ក្នុងខ្លួនសត្វប្រជៀវ២ក្បាល តាំងពីឆ្នាំ២០១០។
រឿងនេះនេះលោកស្រីបញ្ជាក់ថា៖ «ការសិក្សារបស់វិទ្យាស្ថានប៉ាស្ទ័រតាំងពីឆ្នាំ ២០១០ លើសត្វប្រជៀវនៅកម្ពុជា គ្រាន់តែរកឃើញវីរុសក្នុងខ្លួនសត្វប្រជៀវ ២ក្បាលក្នុងចំណោមមួយចំនួន។ ការសិក្សានេះគឺតូចទេ ប្រជៀវនោះមានវីរុសប្រហាក់ប្រហែលមេរោគសាស់( Sars )កូវីដដែរ តែមិនមែនកូវីដ១៩ទេ។ ខ្ញុំសូមបញ្ជាក់ កុំឲ្យមានការភាន់ច្រឡំ ព្រោះខ្ញុំឃើញការបកស្រាយមួយចំនួនថា កូវីដ១៩ចេញពីកម្ពុជា។ ការសិក្សាដែលរកឃើញ វាជាបងប្អូនជីដូនមួយរបស់ Sars កូវីដ។ គេមិនទាន់ដឹងទេថា ឪពុកម្តាយរបស់វីរុសនេះនៅឯណា»។
វិទ្យាស្ថានប៉ាស្ទ័រកម្ពុជា បានធ្វើការស្រាវជ្រាវជាច្រើនឆ្នាំមកហើយ ទៅលើសត្វប្រចៀវ និងមេរោគដែលឆ្លងដោយសារសត្វប្រចៀវនេះ។ ការសិក្សានេះ មិនមែនផ្តោតតែទៅលើមេរោគកូរ៉ូណាតែមួយនោះទេ គឺមានការសិក្សាទៅផ្នែកផ្សេងៗទៀត ព្រោះចង់ដឹងថា ការចម្លងពីសត្វប្រចៀវទៅមនុស្ស និងពីមនុស្សទៅសត្វប្រចៀវ និងជាពិសេសទៅទៀតនោះជាប្រភេទជំងឺកើតឡើងថ្មីៗ។ នេះបើតាមលោកស្រី ឡូរ៉ង់បារ៉ែល ប្រធានវិទ្យាស្ថានប៉ាស្ទ័រកម្ពុជា ក្នុងសន្និសីទសារព័ត៌មានស្តីពីការបំភ្លឺពីមន្ទីរពិសោធន៍លើបញ្ហាកូវីដ-១៩ នាព្រឹកថ្ងៃទី២៣ ខែកុម្ភៈ ឆ្នាំ២០២១ដែរ។
អ្នកវិទ្យាសាស្ត្របានធ្វើការវិភាគទៅលើមេរោគ បានធ្វើការវិភាគ ពិនិត្យមើលទៅលើលក្ខណៈរបស់មេរោគ ដោយពិនិត្យទៅលើសំណាកចំនួន ១៣០ ក្នុងចំណោមនេះ ឃើញមានសំណាកចំនួន ២ ដែលវិជ្ជមានមេរោគកូរ៉ូណា ដែលមានលក្ខណៈស្រដៀង ជាមួយមេរោគកូវីដ-១៩ ដែលកើតឡើងនេះ។ ការស្រដៀងគ្នានេះ មិនមែនជាមេរោគតែមួយនោះទេ ព្រោះការចម្លង និងលក្ខណៈនៃការចម្លងមានភាពខុសគ្នា រវាងមេរោគកូរ៉ណា និងមេរោគកូវីដ-១៩។ ការរកឃើញនេះ មិនមែនរកឃើញតែក្នុងវិទ្យាស្ថានប៉ាស្ទ័រកម្ពុជាទេ គឺមានការរកឃើញនៅប្រទេសផ្សេងៗទៀតនៅលើពិភពលោក និងក្នុងតំបន់ផងដែរ ដូចជានៅប្រទេសចិន ប្រទេសថៃ ជាដើម។ ការរកឃើញនេះ មិនមានន័យថា មេរោគនេះកើតចេញពីប្រទេសកម្ពុជានោះទេ ហើយក៏មិនមែនជាការរកឃើញតែឯកឯងក្នុងប្រទេសកម្ពុជានោះដែរ។
ទាក់ទងរឿងប្រភពលោកស្រីឱវ៉ានឌីនបន្តថា៖ «គ្នានភស្តុតាងណាបញ្ជាក់ថា កូវីដ១៩មានប្រភពចេញពីកម្ពុជាទេ។លោកស្រីឱវ៉ាន់ឌីនរំលឹករឿងកូវីតដំបូងនៅស្រុកខ្មែរថា៖ ករណីកូវីដ១៩ដំបូង កាលពីថ្ងៃ ២៧មករា ២០២០ រកឃើញលើបុរសជនជាតិចិនដែលស្នាក់នៅខេត្តព្រះសីហនុ វាជាករណីនាំចូលពីខាងក្រៅ។ ចំណែកករណីទី២ កាលពីថ្ងៃ ៣កុម្ភៈ ២០២០ ករណីវិជ្ជមានលើបុរសខ្មែរដែលរស់នៅសៀមរាប (ឆ្លងពីជនជាតិជប៉ុន) វាក៏មិនមែនកើតនៅកម្ពុជានោះដែរ វានាំចូលពីខាងក្រៅទេ។ ករណីបំលែងថ្មីក៏មិនមែននៅកម្ពុជាដែរ វានាំចូលពីខាងក្រៅដូចគ្នា។ សូមបញ្ជាក់ថា លទ្ធផលធ្វើតេស្តសុទ្ធតែទទួលបានពីវិទ្យាស្ថានប៉ាស្ទ័រកម្ពុជា»។លោកស្រីសង្កត់ជាថ្មីថា៖ «ស្ថានភាពនៃការឆ្លង យើងអត់ដឹងថាវានៅទីណាទេ។ យើងមិនដឹងទេថាពេលណាវាផ្ទុះ។ ស្ថានភាពពេលនេះមិនសូវជាល្អ វាមានភាពស៊ាំញាំច្រើន»។
សូមបញ្ជាក់ថានៅព្រឹកថ្ងៃ ២៣កុម្ភៈនេះដែរ កម្ពុជារកឃើញករណីឆ្លងថ្មីចំនួន ២៥នាក់ទៀត (កូវីដ-១៩ បម្លែងខ្លួនថ្មី ០៣ករណី) ក្នុងនោះករណីឆ្លងសហគមន៍ ២៣នាក់ និងអ្នកដំណើរពីបរទេស ០២នាក់។ បើគិតត្រឹមថ្ងៃ ២៣កុម្ភៈ ២០២១ ដដែល អ្នកឆ្លងសរុបនៅកម្ពុជាមាន ៥៩៣នាក់ អ្នកជាសះស្បើយ ៤៧៥នាក់ អ្នកកំពុងព្យាបាល ១១៦នាក់៕