ប្រតិភូសហគមន៍អឺរ៉ុបមកស្រុកខ្មែររកមើលបញ្ហាសិទ្ធមនុស្ស!?
ភ្នំពេញ៖ កាលពីថ្ងៃទី៦មិថុនាប្រតិភូសហគមអឺរ៉ុបដឹកនាំលោក Jean-Christophe Belliard អគ្គលេខាធិការរងនៃ មន្ទីរការបរទេសសហភាពអឺរ៉ុប (EU) បានជួបលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសខ្មែរដែលទោះបីជាមិនប្រាប់ថាមិនមែនមកពិភាក្សាពី ការដកប្រព័ន្ធអនុគ្រោះពន្ធ គ្រប់ប្រភេទលើកលែងតែអាវុធ (EBA) ពីកម្ពុជាក៏ដោយក៏វាជាការស្វែងយល់ដើម្បីទៅរកដែរ ។
លោក កេត សោផាន់ អ្នកនាំពាក្យក្រសួងការបរទេសខ្មែរបាននាំប្រសាសន៍ថា នេះគឺជាបេសកកម្មក្នុងការ កសាងទំនុកចិត្តរវាងកម្ពុជា-សហភាពអឺរ៉ុប ។
អ្នកនាំពាក្យ ថា “ការមកកម្ពុជាលើកនេះ របស់លោកគណៈប្រតិភូ មិនមែនមកក្នុងបេសកកម្ម EBA នោះទេ ។ មកនេះ គឺត្រូវបានស្ថានទូតបារាំង នៅភ្នំពេញបានអញ្ជើញ មកចូលរួមសន្និសីទ ហើយលោកនឹងថ្លែងសុន្ទរកថា ស្ដីពីទំនាក់ទំនងរវាងសហគមន៍អឺរ៉ុប និងអាស៊ាន ហើយលោកមកជួបជាមួយ ឯកឧត្ដមឧបនាយករដ្ឋមន្ត្រីនេះ គឺមិនមែនមកនិយាយរឿង EBA ទេ” ។តែអ្នកនាំពាក្យគូសបញ្ជាក់ថា ការពិភាក្សានេះ ភាគីទាំងពីរ បានឯកភាពគ្នានឹងខិតខំបន្តកិច្ចសន្ទនា ដើម្បីរកដំណោះស្រាយ ក្នុងការរក្សា EBA សម្រាប់កម្ពុជាបន្តទៅទៀត ។
នៅថ្ងៃទី៧ មិថុនាលោក ចច អេដហ្កាឯកអគ្គរដ្ឋទូតសហភាពអឺរ៉ុបប្រចាំកម្ពុជាប្រាប់កាសែតបរទេសថា បេសកកម្មស្វែងរកការពិតរបស់សហភាពអឺរ៉ុបមក កម្ពុជា ដែលជាផ្នែកមួយ នៃដំណើរការពិគ្រោះយោបល់មុននឹងឈានទៅរកការសម្រេចព្យួរប្រព័ន្ធអនុគ្រោះពន្ធ EBA គ្រោងនឹងចេញសេចក្ដីថ្លែងការណ៍សង្ខេបអំពីដំណើរបេសកកម្មស្វែងរកការពិតលើកនេះ នៅដើមសប្ដាហ៍ក្រោយ នៅពេលបិទបញ្ចប់បេសកកម្មរបស់ខ្លួន។
លោកថា សហភាពអឺរ៉ុប តែងតែ ស្ដាប់ដោយយកចិត្តទុកដាក់ទៅនឹងអ្វីដែលអាជ្ញាធរកម្ពុជាបានប្រាប់ពួកគេ ពាក់ព័ន្ធនឹងកង្វល់នានាជុំវិញបរិបទ EBA នេះ។ លោកថា កង្វល់របស់សហភាពអឺរ៉ុបគឺពាក់ព័ន្ធជាពិសេសទៅនឹងវិស័យនានាដែលកម្ពុជា ទំនងជាបានរំលោភអនុសញ្ញាអង្គការពលកម្មអន្តរជាតិ និងគោលការណ៍ស្នូលរបស់អង្គការសហប្រជាជាតិទាក់ទងទៅនឹងការគោរពសិទ្ធិមនុស្ស ដែលជាផ្នែកមួយនៃលក្ខខណ្ឌក្នុងការផ្ដល់ប្រព័ន្ធអនុគ្រោះពន្ធរបស់អឺរ៉ុបនេះ។ លោក ចច អេដហ្កា សង្កត់ធ្ងន់ៗថា ដំណើរការបេសកកម្មនេះ គឺផ្ដោតលើបញ្ហាសិទ្ធិមនុស្ស និងសិទ្ធិការងារសុទ្ធសាធ និងថាមិនមែនជារឿងនយោបាយនោះឡើយ។
សូមបញ្ជាក់ថា កាលពីថ្ងៃទី១៣ ខែកុម្ភៈ ឆ្នាំ២០១៩ សហភាពអឺរ៉ុប បានចាប់ផ្តើមនីតិវិធីជាផ្លូវការ ផ្អាកជាបណ្តោះអាសន្ន លើប្រព័ន្ធអនុគ្រោះពន្ធលើមុខ ទំនិញគ្រប់ប្រភេទលើកលែងតែអាវុធដែលនឹងមានប្រសីទ្ធិភាពអនុវត្តន៍នាខែកុម្ភៈ ឆ្នាំ២០២០ ប្រសិនបើរកឃើញថា កម្ពុជាអនុវត្តមិនត្រឹមត្រូវ ទៅរកភាពល្អប្រសើរគ្រប់គ្រាន់ លើបញ្ហាសិទ្ធិមនុស្ស និងប្រជាធិបតេយ្យ ។
សូមបញ្ជាក់ថា ប្រទេសដែលទទួលបានការ អនុគ្រោះពន្ធលើគ្រប់មុខទំនិញ លើកលែងសព្វាវុធ ពីសហភាពអឺរ៉ុបមាន ៤៩ប្រទេស ។ ក្នុងនោះបណ្ដាប្រទេសនៅអាហ្វ្រិក មានចំនួនច្រើនជាងគេ។ ជាមួយគ្នានេះដែរ ក្រៅពីផ្អាកនីតិវីធីអនុវត្ត បណ្តោះអាសន្នដកពន្ធកម្ពុជា មីយ៉ាន់ម៉ាក៏រងការគំរាមកាត់ពន្ធផងដែរ ។
ក្នុងករណីសហភាពអឺរ៉ុប សម្រេចជាផ្លូវការដក EBA ពីកម្ពុជា គឺទីផ្សារអឺរ៉ុប នៅតែបើកចំហសម្រាប់កម្ពុជាដដែល ប៉ុន្តែគ្រាន់តែមានបន្ថែម តម្លៃពន្ធដារមួយចំនួនប៉ុណ្ណោះ។ សម្តេចតេជោហ៊ុនសែនប្រមុខរាជរដ្ឋាភិបាលបាលកម្ពុជាធ្លាប់នប្រកាសថាបើសហគមអឺរ៉ុបលុបចោលគឺគ្មានអ្វីត្រូវនិយាយជាមួយកម្ពុជាទេ។គណបក្សប្រឆាំងក៏ខ្ទេចដែរ?៕
