ចាប់ផ្តើមដាក់កម្មករជាង១ម៉ឺននាក់ដែលទៅស្រុកចូលឆ្នាំមកវិញម៉ាដុំៗ
27-March-2024 / សុខភាពនិងកីឡា
ភ្នំពេញ ៖ កម្មករ-និយោជិត ក្នុងរាជធានីភ្នំពេញប្រមាណជា ១៥,០០០នាក់មិនគោរបបទបញ្ជារដ្ឋាភិបាលលេខ០២(ហាមឈប់ទៅចូលឆ្នាំ) ដែលទើបត្រឡប់មកពីចូលឆ្នាំថ្មីប្រពៃណីជាតិនៅស្រុកកំណើត ត្រូវបានរៀបចំដាក់ឱ្យនៅដាច់ដោយឡែក រយៈពេល១៤ថ្ងៃដើម្បីតាមដានសុខភាពរកជំងឺកូវីដ-១៩ ។
ទាក់ទងករណីយ៍នេះក្នុងសន្និសីទព័ត៌មាន ស្តីពីបច្ចុប្បន្នភាពជំងឺកូវីដ-១៩ នៅកម្ពុជានាព្រឹកថ្ងៃទី២០ ខែមេសា ឆ្នាំ២០២០នេះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានថ្លែងឱ្យដឹងថា ក្រសួងសុខាភិបាល ក្រសួងការងារ និងបណ្តុះបណ្តាលវិជ្ជាជីវៈ និងអាជ្ញាធរមូលដ្ឋាន បានសហការយ៉ាងតឹងរឹងរៀបចំដាក់កម្មករ និយោជិត ត្រឡប់មកពីស្រុកកំណើតឱ្យនៅដាច់ដោយឡែករយៈពេល១៤ថ្ងៃ ដើម្បីតាមដានសុខភាពរកជំងឺកូវីដ-១៩។
លោក ម៉ម ប៊ុនហេង បានបញ្ជាក់នៅក្នុងសន្និសីទព័ត៌មានថា «ចំពោះបងប្អូនដែលបានសម្រុកធ្វើដំណើរទៅស្រុកកំណើតមុនពេលបុណ្យចូលឆ្នាំថ្មីប្រពៃណីជាតិ ហើយត្រូវវិលត្រឡប់មកលំនៅឋាន ឬចូលមកធ្វើការនៅតាមទីកន្លែងរោងចក្រ សហគ្រាស ក្រសួងស្ថាប័ន ឬមន្ទីររៀងៗខ្លួននោះ ត្រូវអនុវត្តន៍វិធានការតាមដានសុខភាពផ្ទាល់ខ្លួន ដាក់ខ្លួនឱ្យនៅដាច់ដោយឡែកចំនួន១៤ថ្ងៃ ឬអាចធ្វើការតាមផ្ទះ តាមអនឡាញក្នុងរយៈពេលធ្វើចត្តាឡីស័ក្តិចំនួន១៤ថ្ងៃនេះ»។
លោក ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថាក្នុងកំលុងពេលបុណ្យចូលឆ្នាំថ្មីសប្តាហ៍មុននេះ កម្មករ និយោជិត បម្រើការងារនៅតាមរោងចក្រ សហគ្រាសប្រមាណជា ៩៥ភាគរយ នៅបម្រើការងារជាធម្មតា មានតែ៥ភាគរយប៉ុណ្ណោះបានសម្រាកការងារ ឬទៅស្រុកកំណើតរបស់ពួកគេ។ ប៉ុន្តែ ក្នុងនោះក៏មានកម្មករធ្វើការងារលើវិស័យសំណង់ និងតាមវិស័យផ្សេងៗមួយចំនួនទៀត ពួកគេបានសម្រុកទៅស្រុកកំណើតមុនពេលរាជរដ្ឋាភិបាល ដាក់ចេញវិធានការបិទការធ្វើដំណើរឆ្លងខេត្ត នៅយប់ថ្ងៃទី០៩ ខែមេសា ទៅទៀត។
លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ថាក្រោយដំណើរមណ្ឌលចត្តាឡីស័កនេះ មានកម្មករពីនាក់ បានចេញរោគសញ្ញាខ្លះៗ ដែលគេសង្ស័យថាជាករណីកូវីដ១៩។សំណាកកម្មករទាំងពីរនាក់នោះ បានយកទៅពិនិត្យ នៅវិទ្យាស្ថានប៉ាស្ទ័រហើយ។
លោក ហេង សួរ មិនបានបញ្ជាក់ពីកន្លែងស្នាក់នៅរបស់កម្មករទាំពីរនាក់នោះ ថានៅទីណាឡើយ ដោយទុកជាការសម្ងាត់។
ការសម្រុកចេញទៅស្រុកកំណើតរបស់កម្មករ-និយោជិតមួយចំនួនទៅលេងស្រុកកំណើត ក្នុងឱកាសបុណ្យចូលឆ្នាំថ្មីនេះ នាំឱ្យមានការព្រួយបារម្ភខ្លាំងខ្លាចពួកគេបានឆ្លងជំងឺកូវីដ-១៩ ពីកន្លែងណាមួយ ហើយនាំមកចម្លងដល់កម្មករ និយោជិតដទៃដែលបំពេញការងារជាមួយពួកគេ។ អាជ្ញាធរនៅក្នុងរាជធានីភ្នំពេញ ដែលជាតំបន់ប្រមូលផ្តុំទៅដោយរោងចក្រនោះ បានរៀបចំអគារសាលារៀន ដើម្បីដាក់កម្មករ និយោជិតឱ្យនៅដាច់ដោយឡែករយៈពេល១៤ថ្ងៃ មុនពេលពួកគេចូលធ្វើការងារវិញ។
លោក មាន ចាន់យ៉ាដា អភិបាលរងរាជធានីភ្នំពេញ បានឲ្យដឹងថា កម្មករ កម្មការិនីជាង ១៥,០០០នាក់នេះ មាននៅក្នុងខណ្ឌពោរធិ៍សែនជ័យប្រមាណ ៧,២៥៨នាក់ ខណ្ឌដង្កោប្រមាណ ២,៣៤១នាក់ ខណ្ឌកំបូលប្រមាណ ១,២៥១នាក់ ខណ្ឌមានជ័យប្រមាណ ២,១១៦នាក់ ខណ្ឌសែនសុខប្រមាណ ១,០៦៨នាក់ ខណ្ឌព្រែកព្នៅប្រមាណ ៧៦នាក់ ខណ្ឌច្បារអំពៅប្រមាណ ៨៧នាក់ ខណ្ឌឫស្សីកែវប្រមាណ១,៣០២នាក់ ខណ្ឌទួលគោកប្រមាណ ៧១នាក់ ខណ្ឌចំការមនប្រមាណ ៩៥នាក់ ខណ្ឌដូនពេញមានប្រមាណ ២នាក់ និង ខណ្ឌជ្រោយចង្វារប្រមាណ ៦០នាក់។
អភិបាលរងរាជធានីភ្នំពេញ បានឱ្យដឹងដែរថា សាលារាជធានីភ្នំពេញបានត្រៀមសាលារៀនចំនួន ៣៧សាលា ដែលមានបន្ទប់ចំនួ ៦៩៩បន្ទប់ សម្រាប់ដាក់កម្មករ និយោជិតទាំងអស់នេះ។លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានឱ្យដឹងនៅក្នុងសន្និសីទព័ត៌មាននាព្រឹកថ្ងៃនេះផងដែរថា ក្រៅតែពីរាជធានីភ្នំពេញ នៅតាមបណ្តាខេត្តដែលមានរោងចក្រ សហគ្រាសនោះ ក៏មានកម្មករ និយោជិតមួយចំនួនត្រូវបានដាក់ឱ្យនៅដាច់ដោយឡែករយៈពេល១៤ថ្ងៃផងដែរ។
