កាប់លើជនរងគ្រោះស្ទើរសុះសាច់ហើយបើករថយន្តគេចបុករថយន្តធំឆេះផ្អើលក្រុងប៉ោយប៉ែត !
24-July-2020 / សន្តិសុខសង្គម
បន្ទាយមានជ័យ៖មានករណីហឹង្សាមួយបានកើតឡើងកាលពីម៉ោងជាង១១យប់ថ្ងៃទី២០ខែតុលា២០១៩នៅចំណុចភូមិក្បាលស្ពាន២បណ្តាលឲ្យបុរសម្នាក់រងរបួសដណ្តើមចង្រឹតឯភាគីម្ខាងជាជនសង្ស័យបើករថយន្តរត់គេច តែចៃដន្យអាក្រក់បានបុករថយន្តធំពីក្រោយបណ្តាលឲ្យឆាបឆេះផ្អើលរាត្រីនៅក្រុងប៉ោយប៉ែត ។ ជនរងគ្រោះក្នុងហេតុការណ៍នេះមាន ឈ្មោះចែមប៊ុនធឿនភេទ ប្រុសអាយុ២៩ឆ្នាំមានទីលំនៅភូមិបាលិលេយ្យ01សង្កាត់ប៉ោយប៉ែត ។
ប្រភពពីកន្លែងកើតហេតុបានឲ្យដឹងថា ជនរងគ្រោះត្រូវភាគីម្ខាងមានគ្នា២នាក់ប្រើប្រាស់កាំបិតកាប់ស្ទើរសុះសាច់សង្ស័យជាករណីប៉ុនប៉ងមនុស្សឃាតព្រោះបើយោងតាមរបួស រងគ្រោះមិនសង្ឃឹមថា មានជីវិតនោះទេ ។
ជនសង្ស័យដែលកាប់លើជនរងគ្រោះ ត្រូវបាននគរបាលផ្នែកព្រហ្មទណ្ឌកម្រិតស្រាលនៃអធិការដ្ឋាននគរបាលក្រុងប៉ោយប៉ែតចាប់ខ្លួនបានភ្លាមៗនៅចំណុចកើតហេតុលើដងផ្លូវជាតិលេខ៥។
សមត្ថកិច្ចក្រុងប៉ោយប៉ែតបានឲ្យដឹងថា ជនសង្ស័យមាន២នាក់។ម្នាក់ឈ្មោះគា ចំរើនភេទប្រុសអាយុ៣០ឆ្នាំនិងម្នាក់ទៀត ឈ្មោះគា ចំណាប់ភេទប្រុសអាយុ២៨ឆ្នាំពួកគេជាបងប្អូនបង្កើតនិងគ្នា និងមានទីលំនៅឋាន ភូមិសាមគ្គីមានជ័យសង្កាត់និងក្រុងប៉ោយប៉ែត។
មុនពេលហេតុការណ៌កើតឡើងជនរងគ្រោះបានបើករថយន្តមួយគ្រឿងម៉ាកឡុចហ្សឺស៣៣០ទៅក្បែរចំណុចកើតហេតុដើម្បីទទួលយកមនុស្សម្នាក់ជាមិត្តភក្តិពេលដែលជនរងគ្រោះទទួលអ្នកដែលរងចាំនៅទីនោះស្រាប់តែភាគីបង្កបានយកកំប៉ុងស្រាបៀរ ដែលកំពុងផឹកស៊ីគប់លើរថយន្តជនរងគ្រោះ ភ្លាមនោះក៏កើតជាជម្លោះដោយពាក្យសម្តីរហូតកើតជាអំពើហឹង្សាតែម្តង ។
ជនរងគ្រោះបន្ទាប់ពីរងរបួសផ្ទៃមុខគេកាប់ត្រូវចំ១កាំបិត ក៏បើករថយន្តទៅរកសមត្ថកិច្ចឲ្យជួយអន្តរាគមន៏និងរកយុត្តិធម៌ ។ នៅពេលត្រឡប់ទៅកន្លែងកើតហេតុទៀតដោយសារសមត្ថកិច្ចជិះម៉ូតូយឺតៗរីជនរងគ្រោះបើករថយន្តលឿនទៅដល់កន្លែងកើតហេតុ មុនមិនដឹងថាប្រើពាក្យសម្តីយ៉ាងណា ក៏កើតហឹង្សាជាថ្មីទៀតត្រូវក្រុមជនសង្ស័យព្រួតវាយ និងកាប់ឲ្យមានស្នាមរបួសធ្ងន់ ដេកដួលនឹងដី ស្ទើបាត់បង់ជីវិតហើយទើបសមត្ថកិច្ចទៅដល់ចាប់បានជនសង្ស័យជាប្អូន។
ដោយឡែកជនបង្កជាបងបានបើករថយន្តបង្កើតបទល្មើសថ្មីមួយទៀតគឺ រថយន្តម៉ាក(Porsche) ដែលបើករត់គេចតែចៃដន្យអាក្រក់ក៏បុកគូថរថយន្តធំដឹទូកុងទីន័រលើដងផ្លូវជាតិលេខ៥ក្នុងភូមិគីឡូម៉ែត្រលេខ៤សង្កាត់ផ្សារកណ្តាលក្រុងប៉ោយប៉ែតបណ្តាលឲ្យរថយន្តម៉ាក (Porsche) ឆាបឆេះផ្អើលទាំងយប់ហើយជនសង្ស័យរងរបួសតិចតួច តែត្រូវសមត្ថកិច្ចក្របួចជាប់តែម្តង។
សាច់ញាតិជនរងគ្រោះដែលរងការកាប់បានឲ្យដឹងនាព្រឹកថ្ងៃទី២២តុលា២០១៩នេះ ថា ជនរងគ្រោះរងរបួសធ្ងន់មិនសង្ឃឹមថារួចផុតពីគ្រោះថ្នាក់នោះទេ ពេលនេះសាច់ញាតិបញ្ជូនបន្តយកទៅសង្គ្រោះនៅប្រទេសថៃនៅឡើយ ។ ចំណែកជនសង្ស័យសមត្ថកិច្ចប្រាប់ថាកំពុងសាកសួរដើម្បីកសាងសំណុំរឿងបញ្ជូនខ្លួនទៅអយ្យការសាលាដំបូងខេត្តបន្ទាយមានជ័យចាត់ការតាមផ្លូវច្បាប់ ។
តែទោះជាយ៉ាងណាជំវិញករណីហឹង្សាដ៌សាហាវនេះត្រូវលោកវរៈសេនីយ៌ឯក ធិនស៊ិនដេតអធិការនគរបាលក្រុងប៉ោយប៉ែតប្រាប់ថា ក្រោយសាកសួរនិងកសាងសំណុំរឿងបញ្ជូនជនសង្ស័យទៅស្នងការដ្ឋាននគរបាលខេត្ត ដើម្បីចាត់ការបន្តតាមនិតិវិធីច្បាប់មិនអាចដោះលែងបានទេ ៕
