ប៉ូលិសលើកលែងការផាកពិន័យចំពោះបទល្មើសចរាចណ៍រថយន្ត និងម៉ូតូ លើចំណុចមួយចំនួន
26-March-2024 / សន្តិសុខសង្គម
ភ្នំពេញ៖ សមត្ថកិច្ចចរាចរណ៍ នឹងធ្វើការលើកលែងការផាកពិន័យចំពោះបទល្មើសចរាចណ៍រថយន្ត និងម៉ូតូ លើចំណុចមួយចំនួន ដោយគ្រាន់តែធ្វើការអប់រំជំនួសវិញ។បទល្មើសទាំងនោះ ដូចជាបទល្មើមិនគោរពភ្លើងសញ្ញាចរាចរណ៍ មិនពាក់ខ្សែក្រាវ៉ាត់ និងនិយាយទូរសព្ទក្នុងពេលកំពុងបើកបរជាដើម។
លោកលោកវរសេនីយ៍ទោ ម៉ាន សុផាន់ណា នាយការិយាល័យនគរបាលចរាចណ៍ផ្លូវគោក នៃនាយកដ្ឋាននគរបាលចរាចណ៍ និងសណ្តាប់ធ្នាប់សាធារណៈ តាមរយៈសារសម្លេងដែលទទួលបាននៅព្រឹកថ្ងៃទី២០ ខែមិថុនា ឆ្នាំ២០២២បានឱ្យដឹងថា ពាក់ព័ន្ធនឹងការអនុវត្តការរឹតបន្តឹងច្បាប់ចរាចរណ៍ផ្លូវគោកតាមអនុក្រឹតលេខ៣៩ និងដោយយោងតាមខ្លឹមសារនៃកិច្ចប្រជុំថ្ងៃទី១៧ ខែមិថុនា ឆ្នាំ២០២២ ក្រោមវត្តមាននាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានធ្វើការណែនាំដល់ស្នងការទាំង ២៥រាជធានី-ខេត្ត ពាក់ព័ន្ធនឹងការផាកពិន័យរថយន្តដែលពីមុនមានចំនួន ៩ចំណុច ត្រូវកាត់បន្ថយមកធ្វើការអប់រំចំនួន ៥ចំណុច និងផាកពិន័យតែ ៤ចំណុចវិញ។
ចំពោះចំណុចដែលសមត្ថិកិច្ចធ្វើរការអប់រំមិនផាកពិន័យមាន ទី១ មិនគោរពភ្លើងចរាចរណ៍ និងស្លាកសញ្ញាចរាចរណ៍ ទី២ល្មើសបទវ៉ាជែង ទី៣ មិនពាក់ខ្សែរក្រវ៉ាតសុវត្ថិភាព ទី៤ ការដឹកលើសចំណុះ(ត្រូវរើទម្លាក់ទំនិញចុះតាមច្បាប់កំណត់) និងទី៥ ការប្រើប្រាស់ទូរសព្ទក្នុងពេលបើកបរ។ ចំណែកបទល្មើសដែលត្រូវធ្វើការពិន័យបន្តទៀតមាន ៤ចំណុច ទី១ ល្មើសល្បឿនកំណត់ ទី២ បើកបរក្នុងស្ថានភាពស្រវឹង ទី៣ គ្មានបណ្ណបើកបរ និងទី៤ គ្មានស្លាកលេខ គ្មានបណ្ណសម្គាល់យានយន្ត។
ចំពោះម៉ូតូមានចំនួន ៧ចំណុចគឺ សមត្ថកិច្ចធ្វើការលើកលែងដោយគ្រាន់តែធ្វើការអប់រំ ៤ចំណុច រួមមាន ទី១ មិនគោរពភ្លើង និងស្លាកសញ្ញាចរារចរណ៍ ទី២ ការល្មើសការវ៉ាជែង ទី៣ ការប្រើប្រាស់ទូរសព្ទក្នុងពេលបើកបរ និងទី៤ គ្មានកញ្ចក់សម្រាប់មើលក្រោយ។ រីឯ៣ចំណុចដែលនៅបន្តធ្វើការពិន័យមានការមិនពាក់មួកសុវត្ថិភាព បើកបរក្នុងស្ថានភាពស្រវឹង និងម៉ូតូគ្មានស្លាកលេខ និងបណ្ណសម្គាល់ម៉ូតូ។
យោងតាមរបាយការណ៍ពីគណៈកម្មាធិការជាតិសុវត្ថិភាពចរាចរណ៍ចរាចរណ៍ផ្លូវគោក បានឲ្យដឹងថា នៅក្នុងត្រីមាសទី១ ឆ្នាំ២០២២ ធៀបនឹងរយៈពេលដូចគ្នាឆ្នាំ២០២១ គ្រោះថ្នាក់ចរាចរណ៍កើនឡើងចំនួន ១០៦លើក ស្មើនឹង ១៤% ចំនួនអ្នកស្លាប់កើន ៦០នាក់ ស្មើនឹង ១៤% និងចំនួនអ្នករបួសកើន ១៤៩នាក់ ស្មើនឹង ១៣%។
មូលហេតុចម្បង ដែលបង្កឱ្យមានគ្រោះថ្នាក់គឺ ការបើកបរលើសល្បឿនកំណត់ ការមិនគោរពសិទ្ធិអាទិភាព ការមិនគោរពសញ្ញាចរាចរណ៍ ការវ៉ាជែង ការមិនប្រកាន់ស្តាំ ការបើកបរក្រោមឥទ្ធិពលគ្រឿងស្រវឹង ការមិនពាក់មួកសុវត្ថិភាព ការមិនពាក់ខ្សែក្រវាត់សុវត្ថិភាព ដែលសុទ្ធសឹងបង្កឡើងដោយកត្តាអ្នកបើកបរយានយន្តមួយចំនួន មិនគោរពច្បាប់ស្តីពី ចរាចរណ៍ផ្លូវគោក ខ្វះការប្រុងប្រយ័ត្ន ឬខ្វះការយោគយល់អធ្យាស្រ័យ។
តាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ស្តីពីការរឹតបន្ដឹងច្បាប់ស្ដីពីចរាចរណ៍ផ្លូវគោក នៅថ្ងៃទី២០ ខែមិថុនា ឆ្នាំ២០២២ ឲ្យដឹងថា ចំនួនគោលដៅសរុប ១០៧គោលដៅ មានយានយន្តចូលគោលដៅចំនួន ១.៦៥១គ្រឿង ម៉ូតូ ១.៤៤៩គ្រឿង ក្នុងនោះរកឃើញ យានយន្តល្មើសសរុបចំនួន ៣៧៥គ្រឿង មានម៉ូតូចំនួន ៣៦៤គ្រឿង ត្រូវបានផាកពិន័យតាមអនុក្រឹត្យលេខ៣៩.អនក្រ.បក នៅទូទាំងប្រទេស ។
ដោយឡែកក្នុងរយៈពេល២០ថ្ងៃ(ថ្ងៃទី០១-២០ខែមិថុនា) ការរឹតបន្ដឹងការអនុវត្តច្បាប់ស្ដីពីចរាចរណ៍ផ្លូវគោក យានយន្តចូលគោលដៅមានចំនួន ៣៣.៩៧៤គ្រឿង ក្នុងនោះរកឃើញយានយន្តល្មើសសរុបចំនួន ៤.៣០០គ្រឿង ម៉ូតូមានចំនួន ៣.៧៥៥គ្រឿង ត្រូវបានផាកពិន័យតាមអនុក្រឹត្យលេខ៣៩ អនក្រ.បក នៅទូទាំងប្រទេស ។របាយការណ៍ដដែលបានវាយតម្លៃរយៈពេល២០ថ្ងៃនៃខែមិថុនានេះ ឃើញថា ការអនុវត្តតាមអនុក្រឹត្យ ការផាកពិន័យយានយន្តល្មើស បានដំណើរការទៅយ៉ាងល្អប្រសើរ ទទួលបានការគាំទ្រ ពិសេសអ្នកប្រើប្រាស់ផ្លូវទាំងអស់ បានចូលរួមគោរពច្បាប់ចរាចរណ៍យ៉ាងល្អប្រសើរ ផងដែរ ៕
