វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5941 នាក់
ម្សិលមិញ 8227 នាក់
សរុប 14132822 នាក់
កំពង់ស្ពឺ៖ថ្លែងនៅព្រឹកថ្ងៃទី២៣ឧសភាឆ្នាំ២០១៨ក្នុងជំនួបជាមួយកម្មករ-កម្មការិនីក្នុងខេត្តកំពង់ស្ពឺសម្តេចនាយករដ្ឋមន្ត្រីហ៊ុន សែន បានបញ្ជាក់ថាប្រសិនបើអ្នកគាំទ្រអតីតបក្សសង្គ្រោះជាតិទៅបោះឆ្នោតកាន់តែតិចនោះគឺនឹងផ្តល់លទ្ធផលកាន់តែល្អដល់បក្សប្រជាជនក្នុងការឈ្នះឆ្នោត។៖“បើនិយាយពីបច្ចេកទេសនៃអ្នកបោះឆ្នោតខ្ញុំគួរតែរុញទូកបណ្តោយទឹកឲ្យអ្នកតែម្តងទៅ ផ្តាំផ្ញើទៅអ្នកពួកអ្នកប្រឆាំងទៅកាន់តែតិចសន្លឹកឆ្នោតកាន់តែល្អសម្រាប់គណបក្សកាន់អំណាច អាហ្នឹងនិយាយឲ្យពិតប៉ុន្តែខ្ញុំមិនចង់ធ្វើបញ្ហាហ្នុងទេខ្ញុំចង់ឲ្យប្រជាពលរដ្ឋចេះប្រើសិទ្ធិ។
សម្តេចហ៊ុន សែនឲ្យដឹងថាសមាជិកគណបក្សប្រជាជនកម្ពុជាមានចំនួនដល់ទៅជាង៥លាននាក់ល្មមទទួលបានលទ្ធផលល្អនៅក្នុងការបោះឆ្នោតនាពេលខាងមុខ។ទាកទងនិងការទទួលឬមិនទទួលស្គាល់លទ្ធផលសម្តេចលើកថាការទទួលស្គាល់លទ្ធផលបោះឆ្នោត គឺមិនមានច្បាប់ណាកំណត់ថាទាល់តែមានចំនួនអ្នកបោះឆ្នោតប៉ុណ្ណេះឬប៉ុណ្ណោះនោះឡើយ។
លោកសម រង្ស៊ី តាមរយៈហ្វេសប៊ុកកាលពីថ្ងៃទី២២ ឧសភាបានបង្ហាញពីលទ្ធផលនៃការបោះឆ្នោតនៅប្រទេសវេណេស៊ុយអេឡាដែលមានអ្នកបោះឆ្នោតតែ៤៧ភាគរយហើយអ្នកមិនទៅបោះឆ្នោតមានចំនួនប្រមាណ៥៣ភាគរយ។ លោកសម រង្ស៊ីបានចាត់ទុកថាវាគឺជោគជ័យដែលកើតចេញមកពីការអំពាវនាវបក្សប្រឆាំងវេណាស៊ុយអេឡាឲ្យពលរដ្ឋធ្វើពហិការការបោះឆ្នោត។សម្រាប់លោកសម រង្ស៊ីទិដ្ឋភាពបែបនេះក៏នឹងកើតមាននៅប្រទេសកម្ពុជាដែរគឺនៅក្រោយការបោះឆ្នោតជាតិថ្ងៃទី២៩ កក្កដាដែលលោកថាសហគមន៍អន្តរជាតិនឹងច្រានចោលលទ្ធផលបោះឆ្នោតហើយភ្ជាប់ជាមួយនឹងទណ្ឌកម្មថែមទៀត។
ក៏ប៉ុន្តែសម្តេចតេជោ សែន បានប្រាប់ថាកុំយកកម្ពុជាទៅប្រៀបធៀបនឹងវេណេស៊ុយអេឡាព្រោះស្ថានភាពមិនដូចគ្នាឡើយ។ ព្រោះសមាជិកគណបក្សប្រជាជនកម្ពុជាមានជាង៥លាននាក់គឺជាចំនួនមួយជាងពាក់កណ្តាលនៃចំនួនអ្នកដែលមានឈ្មោះទៅបោះឆ្នោតទៅហើយ។ដូច្នេះតាមរយៈនេះភាគរយនៃអ្នកទៅបោះឆ្នោតនឹងលើសពីពាក់កណ្តាលដែលខុសពីវេណេស៊ុយអេឡាបើទោះបីថ្នាក់ដឹកនាំអតីតបក្សប្រឆាំងអំពាវនាវឲ្យពលរដ្ឋកុំទៅបោះឆ្នោតក៏ដោយ។សម្តេចហ៊ុន សែនបាន ហៅការអំពាវនាវនេះថាជាការបំពានសិទ្ធិរបស់ប្រជាពលរដ្ឋហើយលោកជឿជាក់ថាពលរដ្ឋខ្មែរនឹងមិនធ្វើតាមការអំពាវនាវនេះដោយបោះបង់សិទ្ធិរបស់ខ្លួនទេ។ផ្ទុយមកវិញពួកគេនឹងទៅបោះឆ្នោតនៅថ្ងៃទី២៩ ខែកក្កដាឆ្នាំ២០១៨ខាងមុខនេះ៕