ភ្ញៀវទេសចរនៅខេត្តសៀមរាប ធ្លាក់ចុះខ្លាំង, ខណះសណ្ឋាគារខ្លះបិទទ្វារ សណ្ឋាគារខ្លះខាតរាប់ម៉ឺនដុល្លារ!
06-June-2026 / ទេសចរណ៏និងវប្បធម៌
ភ្នំពេញ៖ របាយការណ៍របស់គ្រឹះស្ថានអង្គរ បានបង្ហាញថា ក្នុងខែកក្កដា កន្លងទៅនេះ ភ្ញៀវចូលទស្សនាប្រាសាទអង្គរមានជិត ១៥ម៉ឺននាក់ ដែលចំនួននេះធ្លាក់ចុះជិត ២០ភាគរយ បើធៀបឆ្នាំ២០១៨។
រយៈពេល៧ខែឆ្នាំ២០១៩វិញ ទទួលបានភ្ញៀវជិតជិត ១.៤លាននាក់ តែចំនួននេះធ្លាក់ចុះជាង ១០ភាគរយ បើធៀបរយៈពេលដូចគ្នានៅឆ្នាំ២០១៨។ការធ្លាក់ចុះភ្ញៀវនេះ បានធ្វើឱ្យប្រតិបត្តិករទេសចរណ៍ក្នុងខេត្តសៀមរាប ជួបនូវវិបត្តិយ៉ាងធ្ងន់ធ្ងរក្នុងនោះសណ្ឋាគារខ្លះត្រូវបិទទ្វារ ហើយសណ្ឋាគារខ្លះខាតរាប់ម៉ឺនដុល្លារអាមេរិក នា ក្នុងរដូវខ្សត់ភ្ញៀវ (Low Season) ឆ្នាំ២០១៩ ។នេះបើតាមលោក ហ្វីលីព កៅ ប្រធានក្លឹបទេសចរណ៍ខេត្តសៀមរាប។
លោក ហ្វីលីព កៅ បានលើកឡើងនៅក្នុងជំនួបប្រតិបត្តិករទេសចរណ៍លើកទី ៤៨កាល ពីរាត្រីថ្ងៃសុក្រ ១កើត ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣០ខែសីហា ឆ្នាំ២០១៩នៅសណ្ឋាគារឡូទុសប្លង់ខេត្តសៀមរាបថា គ្រាន់តែសណ្ឋាគាររបស់លោកចំនួន៣កន្លែងក្នុងខេត្តសៀមរាប ខាតមួយខែខ្ទង់ ១០ម៉ឺនដុល្លារ ហើយមានសណ្ឋាគារមួយចំនួនត្រូវបិទទ្វារ។
ក្នុងខេត្តសៀមរាបបច្ចុប្បន្នមានបន្ទប់សណ្ឋាគាររហូតដល់ទៅប្រមាណ ២ម៉ឺនបន្ទប់ តែក្នុងមួយ យប់ មានភ្ញៀវចន្លោះពី ២ ទៅ៣ពាន់នាក់ប៉ុណ្ណោះ ជាហេតុនាំឱ្យបន្ទប់សណ្ឋាគារជាច្រើននៅសល់។ទោះជាំយ៉ាងណាលោក ហ្វីលីព កៅ សម្រាលថា៖ «ការធ្លាក់ចុះហ្នឹងវាតែងតែធ្លាក់ចុះនៅក្នុងរដូវ Low Season ហ្នឹង។ ប៉ុន្តែមិនដែលធ្លាក់ខ្លាំងដូចឆ្នាំនេះទេ ឆ្នាំនេះស្ងាត់ខ្លាំងមិនធ្លាប់មាន»។
អ្នករកស៊ីលើវិស័យទេសចរដទៃទៀត បានឱ្យដឹងថា បច្ចុប្បន្ននេះភ្ញៀវទេសចរអឺរ៉ុប កូរ៉េនិងជប៉ុនបានធ្លាក់ខ្លាំងហើយបានភ្ញៀវទេសចរចិនចូលមកជំនួសភ្ញៀវទេសចរទាំងនេះ។ បើតាមប្រភពពីអ្នករកស៊ីលើវិស័យនេះ បានអះអាងថា ការធ្លាក់ភ្ញៀវនេះមានហេតុផលចម្បងមួយចំនួនដូចជា ក្នុងរដូវនេះអ្នកទេសចរអឺរ៉ុប មិនសូវជាដើរលេងឆ្ងាយ ហើយអ្នកទេសចរតំបន់អាស៊ីខ្លះទៀតបង្វែទិសដៅទៅលេងប្រទេសជិតខាងដូចជាថៃ និងវៀតណាមជាដើម។
លោក ហ្វីលីព កៅ ចង់ឃើញរាជរដ្ឋាភិបាលកម្ពុជា និងក្រសួងទេសចរណ៍ ក៏ដូចជាក្រសួងពាក់ព័ន្ធប្រញាប់រិះរកយន្តការប្រសើរណាមួយ ដើម្បីឆ្លើយតបការធ្លាក់ភ្ញៀវនេះ។ ដើម្បីដោះស្រាយបញ្ហានេះ លោក ហ្វីលីព កៅ ចង់ឱ្យរាជរដ្ឋាភិបាលលើកលែងថ្លៃទិដ្ឋាការសម្រាប់ភ្ញៀវទេសចរ ដែលវិធីនេះមានប្រទេសសមាជិកអាស៊ាន និងប្រទេសដទៃកំពុងអនុវត្តន៍ ដើម្បីទាក់ទាញភ្ញៀវ។ លោក ហ្វីលីព កៅ ក៏ចង់ឱ្យមានការសម្របសម្រួលបើកឱ្យភ្ញៀវនៅប្រទេសជិតខាងដូចជាថៃ និងឡាវផងដែរ អាចបើករថយន្តចូលមកលេងដល់ខេត្តសៀមរាបជាដើម។
ក្រុមអ្នករកស៊ីលើវិស័យទេសចរណ៍ក្នុងខេត្តសៀមរាប ក៏បានធ្វើការស្តីបន្ទោសទៅដល់ក្រសួងទេសចរណ៍ និងក្រសួងពាក់ព័ន្ធផងដែរពាក់ព័ន្ធបញ្ហាធ្លាក់ភ្ញៀវនេះ។ ពួកគេបានលើកឡើងថា ការធ្លាក់ភ្ញៀវនៅសៀមរាបក្នុងរដូវ Low Season មានច្រើនឆ្នាំមកហើយ តែហាក់គ្មានយុទ្ធសាស្ត្រណាមួយ ដើម្បីលើកទឹកចិត្តភ្ញៀវឱ្យមកលេងនៅកម្ពុជានោះឡើយ។លោក ហ្វីលីព កៅ បានពន្យល់ថា មូលហេតុដែលប្រតិបត្តិករទេសចរណ៍ចង់ឱ្យរាជរដ្ឋាភិបាលគួរពិចារណា លើកលែងទិដ្ឋាការដល់ភ្ញៀវទេសចរបរទេស ដោយសារតែកន្លងមក ប្រទេសវៀតណាម និងថៃ គេបានដោះស្រាយបញ្ហាធ្លាក់ចុះនៅក្នុងប្រទេសរបស់គេបានដោយជោគជ័យតាមវិធីនេះ។
ជាក់ស្តែងករណីប្រទេសថៃដែលកាលពីឆ្នាំ២០១៨ មានករណីលិចកប៉ាល់នៅកោះភូកេត ភ្លាមៗរដ្ឋាភិបាលបានចេញគោលការណ៍មិនយកទិដ្ឋាការទេសចរចិន។ ដូច្នេះគេក៏ស្រូបទេសចរចិនបានច្រើន និងមានការកើនឡើងជាងពេលមុន។ សម្រាប់វៀតណាមវិញ តម្លៃនៃជើងហោះហើរមានតម្លៃធូរថ្លៃ បើធៀបទៅនឹងប្រទេសក្នុងតំបន់ជុំវិញ ហើយអ្នកដែលហោះហើរចូលប្រទេសនេះ ច្រើនមកពីអឺរ៉ុប និងជប៉ុន។ ថ្មីៗនេះ មានការគិតគូរពីការលើកលែងទិដ្ឋាការពីសហគមន៍អឺរ៉ុបទៀតផង។
លោកតុបសុភ័កអ្នកនាំពាក្យក្រសួងទេសចរណ៍បានឲ្យកាសែតដឹងតាមទូរស័ព្ទនៅរសៀលថ្ងៃទី៣១ខែសីហានេះថា ចរន្ដនៃភ្ញៀវទេសចរណ៍តែងតែមានឡើងមានចុះជាធម្មតាទេ ប៉ុន្ដែការធ្លាក់ចុះភ្ញៀវទេសចរណ៍ក្នុងខេត្តសៀមរាបនៅរដូវខ្សត់ភ្ញៀវនេះមិនមែនមានន័យថាកម្ពុជាធ្លាក់ចុះភ្ញៀវទេសចរទាំងស្រុងនោះទេ ទោះធ្លាក់ចុះនៅខេត្តសៀមរាបបន្ដិចមែនតែនៅខាងភូមិភាគឦសានប្រទេសនិងខាងខេត្តកំពុងសោមមានការកើតឡើងទៅវិញដូច្នេះចរន្ដបែបនេះវាមិនស្ថិតស្ថេរនៅតំបន់ណាមួយនោះឡើយ ។
ចំពោះវធានការនិងវិធីសាស្ដ្រមួយចំនួនសម្រាប់បង្កើនភ្ញៀវទេសចរណ៍ឲ្យមានការកើនឡើងនោះក្រសួងតែងតែគិតគូនិងប្រជុំរកដំណោះស្រាយជាបន្ដបន្ទាប់ដើម្បីឲ្យភ្ញៀវទេសចរណ៍មានការកាកើតឡើងចំនួន២ខ្ទង់មានន័យថាពី១០ទៅ១៥ភាគរយក្នុង១ឆ្នាំ ។ចំពោះការលើកឡើងថាឲ្យក្រសួងជួយបញ្ចុះតំលៃទិដ្ឋាការនោះ វាមិនមែនជាសមត្ថកិច្ចរបស់ក្រសួងនោះឡើយ តែទោះជាយ៉ាងណាក្រសួងមិនដែលថាមិនអើពើក្នុងកិច្ចការនេះទេ ។
ក្រោយពីផ្ទុះរឿងភ្ញៀវទេសចរណ៍ធ្លាក់ចុះនេះដែរគ្រឹះស្ថានអង្គរបានចេញសេចក្តីប្រកាសព័ត៌មានឲ្យដឹងថា៖ ក្នុងរយៈពេល៨ខែ ឆ្នាំ២០១៩ មានភ្ញៀវទេសចរ ចំនួន ១,៥៥១,៨៣៦នាក់ បានទិញបណ្ណចូលទស្សនា រមណីយដ្ឋានអង្គរវត្ត ដែលគិតជាថវិការ ប្រមាណ៦៩,៤៦៤,២១៧ដុល្លារ។
ក្នុងនោះ ថវិកាជាង៣លានដុល្លារ ឧបត្ថម្ភឲ្យមន្ទីរពេទ្យគន្ធបុប្ផា។ចំណែកក្នុងមួយខែសីហា វិញទទួលចំណូលជាង ៧លាន ដុល្លារដោយទទួល បានពីការលក់បណ្ណឲ្យភ្ញៀវ ចំនួន១៥៨,១២៤នាក់៕
