នៅអង្គររថយន្តស៊េរីទំនើបៗ ច្រើនគ្រឿង នឹងប្រមូលផ្ដុំគ្នាក្នុងមហាព្រឹត្តិការណ៍ Gumball 3000 Rally In Cambodia
06-June-2026 / ទេសចរណ៏និងវប្បធម៌
ភ្នំពេញ៖ ក្រសួងទេសចរណ៍ រួមសហការជាមួយក្រសួង-ស្ថាប័នពាក់ព័ន្ធ ក្រុមហ៊ុន ជីប ម៉ុង និងសហការរៀបចំមហាព្រឹត្តិការណ៍ Gumball 3000 Rally In Cambodia ដោយមានរថយន្តស៊េរីទំនើបៗជាច្រើនគ្រឿងចូលរួម នៅរមណីយដ្ឋានវប្បធម៌ប្រវត្តិសាស្ត្រអង្គរ ខេត្តសៀមរាបនាពាក់កណ្តាលខែសីហាខាងមុខ។
លោក គុជ បញ្ញាសា រដ្ឋលេខាធិការក្រសួងទេសចរណ៍ អមដោយលោក ទៀ ស្យាម ស្ថាបនិក Cambodia Car Cultures ឧកញ៉ា លាង ពៅ (ភីធើរ) សមាជិកក្រុមប្រឹក្សាភិបាលក្រុមហ៊ុន ជីប ម៉ុង ឧកញ៉ា ខេមរៈ សិរីមន្ត លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា រួមជាមួយតំណាងអាជ្ញាធរជាតិអប្សរា រដ្ឋបាលខេត្តសៀមរាប មន្ទីរទេសចរណ៍ ក្រុមការងារ GUMBALL 3000 មកពីចក្រភពអង់គ្លេស និងមន្ត្រីក្រសួងទេសចរណ៍ កាលពីថ្ងៃទី៣១ ខែកក្កដា ឆ្នាំ២០២៤ កន្លងទៅនេះបានចុះត្រួតពិនិត្យទីតាំងផ្ទាល់នៅសហគមន៍ទេសចរណ៍កំពង់ឃ្លាំង រមណីយដ្ឋានវប្បធម៌ ប្រវត្តិសាស្ត្រអង្គរនាបរិវេណខាងមុខប្រាសាទអង្គរវត្ត និងប្រាសាទបាយ័ន និងមន្ទីពេទ្យកុមារអង្គរ ដើម្បីសំណេះសំណាលជាមួយតំណាងសហគមន៍ និងភាគីពាក់ព័ន្ធអំពីចូលរួមប្រមូលមូលនិធិសប្បុរសធម៌ និងទីតាំងសម្រាប់ត្រៀមបំបែក អគ្គទកម្មពិភពលោកហ្គីណេស ក្នុងព្រឹត្តិការណ៍ GUMBALL 3000 ដែលនឹងរៀបចំឡើងឆាប់ៗនេះឱ្យប្រព្រឹត្តទៅដោយរលូន និងជោគជ័យ។
សម្រាប់កិច្ចប្រជុំត្រៀមរៀបចំព្រឹត្តិការណ៍ខាងលើនេះនាព្រឹកថ្ងៃទី១ ខែសីហា ឆ្នាំ២០២៤ នៅសាលាខេត្តសៀមរាប លោក គុជ បញ្ញាសា រដ្ឋលេខាធិការក្រសួងទេសចរណ៍ បានបញ្ជាក់ថា ព្រឹត្តិការណ៍ Gumball 3000 Rally In Cambodia គឺជាព្រឹត្តិការណ៍អន្តរជាតិប្រចាំឆ្នាំដ៏ធំមួយដែលមានការប្រមូលផ្ដុំនូវរថយន្តទំនើបៗប្រមាណ១៥០គ្រឿង បើកបរដោយបុគ្គលមានឥទ្ធិពលជាង២៥០នាក់មកពីជុំវិញពិភពលោក ធ្វើដំណើរពីប្រទេសមួយទៅប្រទេសមួយក្នុងតំបន់រួមទាំងកម្ពុជាផងដែរ។
ព្រឹត្តិការណ៍ដ៏អស្ចារ្យមិនធ្លាប់មាននេះ នឹងមានការដាក់តាំងបង្ហាញរថយន្តទំនើបជាច្រើនរយគ្រឿង អមជាមួយការប្រគំតន្ត្រីខ្នាតអន្តរជាតិ ដែលមានគោលបំណងសំខាន់ៗចំនួន៤៖ ការជំរុញវិស័យទេសចរណ៍កម្ពុជាតាមរយៈកញ្ចប់ទស្សនកិច្ច បើកបរដោយខ្លួនឯង (Self-drive tour) ការចូលរួមចំណែកបរិច្ចាគក្នុងកិច្ចការសប្បុរសធម៌ ការបើកឱកាសជំនួបធុរកិច្ចរវាងវិនិយោគគិនជាតិ-អន្តរជាតិ និងការបង្កើតកំណត់ត្រាពិភពលោកហ្គីណេសនៅតំបន់អង្គរ។ព្រឹត្តិការណ៍នេះមានរយៈពេល៣ថ្ងៃលើទឹកដី «កម្ពុជា៖ ព្រះរាជាណាចក្រអច្ឆរិយៈ ផ្តល់ភាពកក់ក្តៅ» របស់យើង គឺចាប់ពីថ្ងៃទី១៥-១៧ ខែកញ្ញា ឆ្នាំ២០២៤ នៅរាជធានីភ្នំពេញ និងខេត្តសៀមរាប ដែលនឹងចូលរួមចំណែកយ៉ាងសំខាន់ក្នុងការជំរុញការផ្សព្វផ្សាយវិស័យទេសចរណ៍កម្ពុជាឱ្យបានទូលំទូលាយទៅកាន់ពិភពលោក។
និយាយដោយឡែក ការជ្រើសរើសយកខេត្តសៀមរាបសម្រាប់ការរៀបចំព្រឹត្តិការណ៍នេះវា គឺជាចូលរួមផ្សព្វផ្សាយសក្តានុពលនៃវិស័យទេសចរណ៍ក្នុងទឹកដីប្រវត្តិសាស្ត្រសៀមរាបអង្គរលើឆាកអន្តរជាតិ និងផ្សព្វផ្សាយយុទ្ធនាការ «ឆ្នាំទស្សនាសៀមរាប ២០២៤» តាមរយៈបុគ្គលល្បីមកពីជុំវិញពិភពលោក។ នៅលើទឹកដីខេត្តសៀមរាប ព្រឹត្តិការណ៍នេះនឹងមានរយៈពេល២ថ្ងៃ គឺនៅថ្ងៃទី១៦-១៧ ខែកញ្ញា ដោយអនុញ្ញាតឱ្យសាធារណជនចូលរួមទស្សនាកម្សាន្តដោយសេរី និងបរិច្ចាគធនធាន ផ្ទាល់ខ្លួនទោះតិចឬច្រើនទៅតាមលទ្ធភាព ដើម្បីជាការរួមចំណែកជួយដល់កុមារកម្ពុជានៅមន្ទីរពេទ្យកុមារអង្គរ។
ទីតាំងសំខាន់ៗ សម្រាប់ព្រឹត្តិការណ៍នេះ រួមមាន៖ ទីតាំងព្រលានយន្តហោះសៀមរាបចាស់ និងច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យជាដើម៕
