មេដឹកនាំសាសនាធំៗចំនួនបីនៅខេត្តកោះកុងបញ្ចេញប្រតិកម្មបដិសេដមិនទទួលស្គាល់លោកស្រីវ៉ា រ៉ាវី ជាប្រធានមន្ទីរធម្មការនិងកិច្ចការសាសនាខេត្ត

កោះកុង:លោកស្រី វ៉ា រ៉ាវី ដែលបច្ចុប្បន្នកំពុងកាន់មុខតំណែងជាប្រធានស្តីទីនៃមន្ទីរធម្មការនិងកិច្ចការសាសនាខេត្តកោះកុងតពីឳពុកដែលចូលនិវត្តន៍កាលពីឆ្នាំ២០១៥កន្លងទៅ ពេលនេះកំពុងត្រូវបានមេដឹកនាំសាសនាធំៗចំនួនបីនៅក្នុងខេត្តកោះកុង រួមមានព្រះតេជគុណ ហេង សំបូរ ព្រះមេគុណខេត្ត លោក វណ្ឌ សាលី គណៈអ៊ីមាំខេត្តនិងលោកហួរ សារឿន តំណាងឲ្យគ្រឹះសានា ប្រចាំខេត្ត បានចុះហត្ថលេខានិងត្រាលើលិខិតរួមគ្នា ផ្ញេីជូនថ្នាក់ដឹកនាំកំពូលៗនៅក្នុងខេត្ត ដោយសំណើរបដិសេដមិនទទួលស្គាល់លោកស្រី វី រ៉ាវី ធ្វើជាប្រធាន មន្ទីរឡើយ ប្រសិនជាមានការតែងតាំងនាពេលពេលខាងមុខ។

លិខិតដែលចុះហត្ថលេខាកាលពីថ្ងៃទី២២ខែឧសភាឆ្នាំ២០១៨នោះ បានគូសបញ្ចាក់ហេតុផលឲ្យដឹងថា មូលហេតុដែលនាំឲ្យមេដឹកនាំសាសនាធំៗទាំងបីនៅក្នុងខេត្ត បដិសេធមិនទទួលស្គាល់ ដោយសារការដឹកនាំរបស់គាត់នាពេលកន្លងមក អសមត្ថភាពនិងមានកំហុសមួយចំនួន ដូចជា-ការដឹកនាំកន្លងមក ពុំយល់ពីកិច្ចការសាសនា ខ្វះសីលធម៌ ចរិយាធម៌និងប្រើពាក្យសំដីមិនសមរម្យធ្វើប៉ះពាល់ដល់អ្នកប្រារព្វសាសនាផ្សេងៗ អសមត្ថភាពក្នុងការទំនាក់ទំនងជាមួយមេដឹកនាំសាសនានៅក្នុងខេត្ត។ បានប្រមាថ និងបង្កការលំបាក ធ្វើឲ្យរាំងស្ទះយ៉ឺតយ៉ាវដល់ការងារផ្សេងៗរបស់គណៈសង្ឃខេត្ត។ក្រៅពីនេះ ក៏បានបង្កជម្លោះ ធ្វើឲ្យបែកបាក់សាគ្គីផ្ទៃក្នុងនិងធ្វើឲ្យមន្រ្តីជាច្រើនសំដែងការមិនពេញចិត្ត ចំពោះទង្វើរដឹកនាំរបៀបផ្តាច់មុខរបស់គាត់ ដែលមានឳពុកជាទីប្រឹក្សាក្រសួងនិងកូនជាប្រធានមន្ទីរស្តីទី ធ្វើអី្វៗស្រេចតែអំពើរចិត្ត ដូចជាការចាយវាយថវិការដ្ឋនិងការយកសម្ភារៈមន្ទីរទៅប្រើប្រាស់ជាលក្ខណៈផ្ទាល់ខ្លួនមិនដែលឲ្យមន្រ្តីក្រោមឱវាទបានដឹងជាដើម។

សូមបញ្ជាក់ថាះមន្ទីរធម្មការនិងកិច្ចការសាសនាខេត្តកោះកុង ត្រូវបានគេចាត់ទុកថា គឺជាមន្ទីរមួយដែលអំណាចតត្រកូលព្រោះលោកដួង សាវឿន ជាឳពុក បានកាន់អំណាចធ្វើជាប្រធានមន្ទីរមួយនេះជាង៣០ឆ្នាំ ក្រោយពីចូលនិវត្តន៍នៅឆ្នាំ២០១៥ គាត់ក៏បានរត់ការតំណែងខាងលើឲ្យកូនស្រីរបស់គាត់គ្រប់គ្រងបន្តជាប្រធានមន្ទីរស្តីទី រហូតដល់សព្វថ្ងៃ ដែលធ្វើឲ្យមជ្ឈដ្ឋាននានាសំដែងការមិនពេញចិត្តនិងសំណូមពរយ៉ាងទទូច ដល់ថ្នាក់ដឹកនាំខេត្តព្រមទាំងក្រសួងធម្មការនិងកិច្ចការសាសនាដែលមានឯ.ឧ ហ៊ឹម ឆែម ជារដ្ឋមន្រ្តី មេត្តា ពិនិត្យនិងពិចារណាឡើងវិញផង។