ទំនិញគេចពន្ធនិងខូចគុណភាពបន្តនាំចូលកម្ពុជាតាមច្រកព្រំដែនកម្ពុជា-ថៃចាំយាម!
26-March-2024 / ព័ត៌មានជាតិ
ខេត្តកោះកុង៖ ទំនិញគេចពន្ធឬបង់ពន្ធមិនគ្រប់ជាច្រើនប្រភេទ នៅតែបន្តនាំចូលពីប្រទេសថៃតាមច្រកព្រំដែនខេត្តកោះកុង ពិសេសច្រកព្រំដែនកម្ពុជា-ថៃ ច្រកចាំយាម ដែលស្ថាបន័គយខេត្តមានលោកសំកុសលជាអ្នកគ្រប់គ្រង។ប្រជាពលរដ្ឋ និងអាជីវករប្រកបរលក់ដូរបន្តិចបន្តួចនៅក្បែរច្រកទ្វារចាំយាមខេត្តកោះកុង បានអះអាងថា រាល់ថ្ងៃនេះ ឃើញមន្ត្រីស្ថាប័នពាក់ព័ន្ធមួយចំនួន ប្រចាំការនៅច្រកចាំយាមខេត្តកោះកុងរួមមាន៖
មន្ត្រនគរបាលប្រចាំច្រកទ្វារចាំយាម មន្ត្រីសាខាកាំកុងត្រូលខេត្តកោះកុង និងមន្ត្រីសាខាគយ និងរដ្ឋាករខេត្តកោះកុងជាដើមហាក់មានភាពធូរលុង ក្នុងសកម្មភាពចុះត្រួតពិនិត្យទំនិញនាំចូលតាមច្រកព្រំដែនចាំយាមក្រៅតែពីរង់ចាំទទួលការបង់លុយពីឈ្មួញ ឬពីអាជីវករបង់ជូន មន្ត្រីស្ថាប័នជំនាញនីមួយៗ គឺចប់រឿង ។
អ្នករកស៊ីនិយាយថា៖ កន្លងមកមន្ត្រីជំនាញនៅតាមស្ថាប័នខ្លះ ប្រចាំការនៅច្រកទ្វារចាំយាម បានត្រួតពិនិត្យតែទៅលើឯកសារនាំចូលទំនិញ ឬទទួលត្រឹមសំណូកលុយកាក់ ដែលឈ្មួញនាំចូលទំនិញទាំងនោះ បង់ជូនស្ថាប័ននីមួយៗ ដែលឈរជើងប្រចាំការមាត់ច្រកទ្វារព្រំដែនតែប៉ុណ្ណោះ ប៉ុន្តែពួកគេមិនបានត្រួតពិនិត្យទំនិញនាំចូល ដឹកតានរទេះ ពិសេសរថយន្តធំៗទាំងនោះឲ្យបានត្រឹមត្រូវនោះទេ។ទោះជាយ៉ាងណា ប្រជាពលរដ្ឋរស់នៅខេត្តកោះកុងនិយាយថា ទាល់តែមានការអនុញ្ញាត ឬឃុបឃិតពីមន្ត្រីជំនាញប្រចាំការនៅច្រកទ្វារអន្តរជាតិចាំយាម ពិសេសស្ថាប័នគយ និងរដ្ឋាករខេត្តកោះកុង ព្រមទាំងមន្ត្រីសាខាកាំកុងត្រូលខេត្តកោះកុងជាដើម ទើបឈ្មួញទាំងនោះ អាចនាំចូលទំនិញគេចពន្ធ និងទំនិញខូចគុណភាពចេញពីប្រទេសថៃ ចូលមកកម្ពុជា ដោយគ្មានការហាមឃាត់។
ពួកគេចោទសមត្ថកិច្ចជំនាញស្ថាប័នមួយចំនួន ដែលប្រចាំការនៅតាមច្រកព្រំដែនខេត្តកោះកុង មានច្រកទ្វារអន្តរជាតិកម្ពុជា-ថៃចាំយាមជាដើមថា បានទទួលផលប្រយោជន៍ពីឈ្មួញជាថ្នូរអនុញ្ញាត ឲ្យនាំចូលទំនិញគេចពន្ធជាច្រើនប្រភេទរួមមាន៖ មានម៉ូតូស៊េរីទំនើបៗ សម្ភារៈសំណង់ សម្ភារៈផ្ទះបាយ គ្រឿងសង្ហារឹម មុខម្ហូបសមុទ្រស្រស់ៗ ជង្គង់មាន់ខូចគុណភាព គ្រឿងសម្អាង ភេសជ្ជៈ ឬអាហារកំប៉ុងគ្រប់ប្រភេទ ដែលខូចគុណភាព និងជិតហួសកាលបរិច្ឆេទប្រើប្រាស់ជាដើម ហើយភាគច្រើននៃទំនិញនាំចូលតាមច្រកទាំងនេះបង់ពន្ធត្រឹមតែ២៥ទៅ៣០ភាគប៉ុណ្ណោះ ។
ឈ្មួញទាំងនោះអាចធ្វើអ្វីៗតាមអំពើចិត្តបានគឺវាត្រូវតែមានការឃុបឃិតបើកដៃពីសំណាក់លោក សំ កុសល ប្រធានសាខាគយខេត្តកោះកុង ដែលប្រើតួនាទីនិងអំណាចដើម្បីប្រមូលបលុយផ្ទុយពីច្បាប់ប្រឆាំងពុករលួយដោយគ្មានញញើត។ ប្រភពពីមន្ត្រីគយ មួយចំនួនក៏បានបង្ហើបឲ្យដឹងដែរថា លោក សំ កុសល ហ៊ានធ្វើអ្វីៗតាមអំពើចិត្តគឺដោយសារអាងមានខ្នងបង្អែកធំជាងលោក គុណ ញឹម ដែលជាអគ្គនាយកគយទៅទៀត ។អ្នកយកព័ត៌មាន មិនទាន់មានប្រភពទាក់ទង ប្រធានសាខាគយ និងរដ្ឋាករខេត្តកោះកុង និងប្រធានសាខាកាំកុងត្រូលខេត្តកោះកុង ជាពិសេស លោក ងុយ ជៀង ប្រធានច្រកទ្វារអន្តរជាតិចាំយាម ខេត្តកោះកុង ដើម្បីបំភ្លឺជុំវិញការចោទប្រកាន់ ដែលថា ច្រកទ្វារព្រំដែនអន្តរជាតិកម្ពុជា-ថៃចាំយាម មានបទល្មើសឈ្មួញទំនិញគេចពន្ធទេ ។
តែ អ្នកឃ្លាំមើលផែនការអភិវឌ្ឍសង្គម និងប្រជាពលរដ្ឋមានរបរលក់ដូររស់នៅខេត្តកោះកុង បានអះអាងថា រាល់ថ្ងៃនេះទំនិញគេចពន្ធជាច្រើនប្រភេទ ពិតជាបន្តនាំចូលតាមទាំងច្រកតាមផ្លូវសមុទ្រ និងច្រកទ្វារអន្តរជាតិចាំយាមស្ទើរជារៀងរាល់ថ្ងៃពិតប្រាកដមែន។
អ្នកឃ្លាំមើលសង្គម និងប្រជាពលរដ្ឋរស់នៅខេត្តកោះកុង បានស្នើដល់ លោកបណ្ឌិត គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា និងលោក ម៉ក ពេជ្ជរិទ្ធ អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម ពិសេស ឯកឧត្តម ឱម យ៉ិនទៀង ប្រធាន អង្គភាពប្រឆាំងអំពើពុករលួយ ជួយបញ្ជូនមន្ត្រីចុះស៊ើបអង្កេតចំពោះសកម្មភាពការងារ របស់ មន្ត្រីជំនាញប្រចាំការនៅច្រកព្រំដែនចាំយាមខេត្តកោះកុង ដើម្បីឲ្យប្រាកដថា តើអាចមានជាប់ពាក់ព័ន្ធ ការអនុញ្ញាតឲ្យឈ្មួញនាំចូលទំនិញគេចពន្ធ និងខូចគុណភាពតាមច្រកព្រំដែននេះខុសច្បាប់ ជាថ្នូរទទួលបានសំណូកពុករលួយដែរឬទេ?។
