ធនាគារពិភពលោកព្រមានពីសេដ្ឋកិច្ចកម្ពុជាធ្លាក់ចុះពេលគ្មានEBAតែសម្តេចតេជោអះអាងជាមួយមន្ត្រីចិនថាគ្មានបញ្ហាកម្ពុជាត្រៀមហើយ!
ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានប្រាប់ទៅកាន់មិត្តចិនលោក ឈិន យន់ ប្រធានសមាគមទំនាក់ទំនងអន្តរជាតិចិន នៅថ្ងៃទី២៤ ខែមេសា ឆ្នាំ២០១៩ ថា ទោះបីសហភាពអឺរ៉ុប (EU) លើកយកបញ្ហាការអនុគ្រោះពន្ធ គ្រប់ប្រភេទលើកលែងតែអាវុធ (EBA) មកដាក់សម្ពាធលើកម្ពុជា ក៏កម្ពុជាមិនអាចយកអធិបតេយ្យភាព ទៅដោះដូរឡើយ។សម្តេចតេជោអះអាងបែបនេះនៅក្នុងជំនួបនៅវិមានសន្តិភាព ។
សម្តេចតេជោបន្ដថា ពាណិជ្ជករ និងអ្នកវិនិយោគទាំងអស់ បានដឹងហើយពី EBA នឹងត្រូវកាត់ផ្តាច់ដោយស្វ័យប្រវត្តិ ពេលសេដ្ឋកិច្ចកម្ពុជា កាន់តែរីកចម្រើនខ្ពស់។ EBA ផ្តល់ឲ្យមកប្រទេស ស្ថិតក្នុងស្ថានភាពក្រីក្របំផុត ដូច្នេះគ្មានអ្វីត្រូវបារម្ភឡើយ ព្រោះទស្សនវិស័យកម្ពុជា គឺឈានឆ្ពោះទៅរកវឌ្ឍនភាពរីកចម្រើន ហើយចូលរួមបង់ពន្ធដារ ទៅប្រទេសដទៃដូចគេដូចឯង។លោក ឈិន យន់មន្ត្រីចិន បានគាំទ្រទាំងស្រុងចំពោះសម្តចតេជោ ដែលមានទស្សនវិស័យ ដឹកនាំលើផ្លូវវិជ្ជមាន ក្នុងការធ្វើឲ្យប្រទេសជាតិ កាន់តែឆាប់រីកចម្រើនទៅមុខ។ លោកបានសន្យា បន្តកៀងគរប្រមូលអ្នកវិនិយោគិន ពីចិនមកកម្ពុជាកាន់តែច្រើនទៀត ។
សូមបញ្ជាក់ថាថ្មីៗនេះធនាគារពិភពលោក ព្រមានពីហានិភ័យនៃការកាត់ផ្ដាច់ប្រព័ន្ធអនុគ្រោះពន្ធរបស់អឺរ៉ុបលើកម្ពុជា ដោយជំរុញឲ្យរដ្ឋាភិបាលមានវិធានការត្រៀមជាមុនបន្ថែមទៀត។ក្នុងការផ្សព្វផ្សាយរបាយការណ៍បច្ចុប្បន្នភាពសេដ្ឋកិច្ចអាស៊ីខាងកើត និងប៉ាស៊ីហ្វិកនាថ្ងៃនេះ ធនាគារពិភពលោកប្រចាំកម្ពុជាបានលើកឡើងថា ការកាត់ផ្ដាច់ប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធចំពោះកម្ពុជា វាទំនងនឹងធ្វើឲ្យកំណើននៃការនាំចេញរបស់កម្ពុជាទៅកាន់សហភាពអឺរ៉ុបថយចុះ។
កម្ពុជាពឹងផ្អែកខ្លាំងលើការនាំចូលពីចិននោះការធ្លាក់ចុះសេដ្ឋកិច្ចចិនក្នុងកាលៈទេសៈណាមួយនោះ វានឹងជះឥទ្ធិពលមកលើសេដ្ឋកិច្ចកម្ពុជាផងដែរ។ «នៅទីបំផុត ការកើនឡើងយ៉ាងរហ័សនៃការហូរទុនចូល និងការផ្ដល់ឥណទាន ដែលបានធ្វើឲ្យវិស័យសំណង់ និងអចលនទ្រព្យទទួលបានការលូតលាស់ខ្លាំងកន្លងមក នឹងជះឥទ្ធិពលទៅលើវិស័យហិរញ្ញវត្ថុរបស់ប្រទេសផងដែរ។»
ធនាគារពិភពលោកបានឲ្យអនុសាសន៍ថា ក្នុងស្ថានភាពបែបនេះ កម្ពុជាគួរមានវិធានការចាំបាច់មួយចំនួន ដូចជា រក្សាបៀវត្សសាធារណៈកុំឲ្យរីកមាឌតទៅទៀត ត្រូវមានវិធានការត្រៀមឆ្លើយតបវិបត្តិហិរញ្ញវត្ថុ និងដាក់កំហិតដល់ធនាគារក្នុងការផ្ដល់កម្ចីឲ្យផ្នែកសំណង់ រួមជាមួយនឹងការកាត់បន្ថយថ្លៃដើមក្នុងពាណិជ្ជកម្ម ដែលរួមមាន ការកាត់បន្ថយថ្លៃអគ្គិសនី និងថ្លៃចំណាយដឹកជញ្ជូនផងដែរ។
កាលពីខែមករា សម្តេចនាយករដ្ឋមន្ត្រី តេជោហ៊ុន សែន បានប្រកាសពីវិធានការទប់ទល់នឹងការដកហូតប្រព័ន្ធអនុគ្រោះពន្ធពីកម្ពុជា រួមមាន ការដកកាំកុងត្រូលចេញពីព្រំដែន ការលុបចោលស្ថាប័ននាវាចរកាំសាប និងការិយាល័យក្រសួងនៅថ្នាក់ស្រុកមួយចំនួន ការបញ្ចុះថ្លៃអគ្គិសនី និងឈប់យកពន្ធលើសហគ្រាសកសិកម្មរយៈពេល៥ឆ្នាំ ជាមួយនិងវិធានការសម្រួលដល់ពាណិជ្ជកម្មមួយចំនួនទៀតដែលថា នឹងជួយឲ្យកម្ពុជាអាចរស់បាន បើទោះបីគ្មានប្រព័ន្ធអនុគ្រោះពន្ធពីប្រទេសលោកសេរីក៏ដោយ។សមតេចតេជោបញ្ជាក់ថា៖ «យុទ្ធនាការពង្រឹងឯករាជ្យរបស់កម្ពុជា មានចំណុចមួយចំនួន អាចនឹងជួយឲ្យវិស័យធុរៈកិច្ចរបស់យើង បើទោះបីជាគ្មានភាពអនុគ្រោះ ក៏កម្ពុជានៅតែរស់!។
កាលពីខែកុម្ភៈ ឆ្នាំ២០១៩នេះ សហភាពអឺរ៉ុបបានប្រកាសរាប់ថ្ងៃថយក្រោយលើវិធានការព្យួរជាបណ្ដោះអាសន្នប្រព័ន្ធអនុគ្រោះពន្ធពាណិជ្ជកម្ម EBA ពីកម្ពុជា ក្រោយពីប្លុកលោកសេរីមួយនេះរកឃើញថា រដ្ឋាភិបាលបានបរាជ័យក្នុងការស្តារស្ថានភាពសិទ្ធិមនុស្ស និងលទ្ធិប្រជាធិបតេយ្យនៅក្នុងប្រទេស។សម្ដេចតេជោ ហ៊ុន សែន បានបញ្ជាក់ប្រាប់ចិនថា អំពីកំណែទម្រង់ស៊ីជម្រៅរបស់កម្ពុជា មានជាបន្តបន្ទាប់ ជាពិសេសក្នុងវេទិការាជរដ្ឋាភិបាល និងវិស័យឯកជនកន្លងទៅថ្មីៗ ដែលបានជួយកាត់បន្ថយ ការចំណាយយ៉ាងច្រើន ដល់អ្នកវិនិយោគ ដើម្បីក្រុមហ៊ុនមានលទ្ធភាពបង់ពន្ធ នាំចេញចូលងាយស្រួល ចំណាយតិចក្នុងការផលិត និងដឹកជញ្ជូន នឹងបានទទួលមកវិញ នូវប្រាក់ចំណេញកាន់តែច្រើន។
ក្នុងព្រឹត្តិបត្រស្ថិតិបំណុលកម្ពុជាចេញផ្សាយកាលពីថ្ងៃ២៦ ខែមីនា ក្រសួងសេដ្ឋកិច្ចឱ្យដឹងថា គិតរហូតមកត្រឹមឆ្នាំ២០១៨ ម្ចាស់បំណុលដែលធំជាងគេរបស់កម្ពុជា គឺប្រទេសចិនដែលគ្រប់គ្រងបំណុលជិត ៥០ភាគរយ ដែលមានតម្លៃប្រមាណ ៣ពាន់ ៤រយលានដុល្លារអាមេរិកនៃបំណុលសរុបជាង ៧ពាន់លានដុល្លារអាមេរិក ។
សហភាពអឺរ៉ុប បានចាប់ផ្តើមនីតិវិធីជាផ្លូវការ លើការផ្អាកជាបណ្តោះអាសន្ន ការអនុគ្រោះពន្ធលើទំនិញ គ្រប់ប្រភេទលើកលែងតែអាវុធ កាលពីថ្ងៃទី១៣ ខែកុម្ភៈ ឆ្នាំ២០១៩ មុននឹងអាចឈានទៅរកការព្យូរ នៅខែកុម្ភៈ ឆ្នាំ២០២០ ប្រសិនបើរកឃើញថា កម្ពុជាអនុវត្តមិនត្រឹមត្រូវទៅរក ភាពល្អប្រសើរគ្រប់គ្រាន់ ទៅលើបញ្ហាសិទ្ធិមនុស្ស និងប្រជាធិបតេយ្យ៕
