វៀតណាមប្រឹងប្រែងដាក់ចេញវិធានការបញ្ចៀសការតម្លើងពន្ធគយអាមេរិក
06-June-2026 / សេដ្ឋកិច្ច
ប្រទេសវៀតណាម៖ នាយករដ្ឋមន្ត្រីវៀតណាមលោក ផាម មិញជិញ (Pham Minh Chinh) បាននិយាយកាលពីថ្ងៃសៅរ៍ថា រដ្ឋាភិបាលរបស់លោកមានបំណងចេញអាជ្ញាប័ណ្ណឱ្យបានឆាប់ឱ្យក្រុមហ៊ុន Starlink របស់មហាសេដ្ឋី Elon Musk ដើម្បីផ្តល់សេវាអ៊ីនធឺណិតតាមផ្កាយរណបនៅវៀតណាមស្ថិតក្រោមកម្មវិធីសាកល្បងមួយ។
យោងតាមទីភ្នាក់ងារព័ត៌មានរ៉យទ័របានរាយការណ៍ដោយដកស្រង់សម្ដីរបស់លោក Chinh ខណៈថ្លែងទៅកាន់អ្នកតំណាងក្រុមហ៊ុនអាជីវកម្មរបស់អាមេរិកជិត ៤០ក្រុមហ៊ុននៅទីក្រុងហាណូយថា វៀតណាមកំពុងចាត់វិធានការដើម្បីរក្សាតុល្យភាពអតិរេកពាណិជ្ជកម្មជាមួយសហរដ្ឋអាមេរិកឡើងវិញ ដោយលើកឡើងពីលទ្ធភាពនាំចូលយន្តហោះ អាវុធ ឧស្ម័នធម្មជាតិរាវ ទំនិញកសិកម្ម និងផលិតផលឱសថ។រដ្ឋាភិបាលទីក្រុងហាណូយកំពុងព្យាយាមគេចចេញពីវិធានការពន្ធគយអាមេរិកលើការនាំចេញដ៏ច្រើនរបស់ខ្លួន ដែលបានរួមចំណែកបង្កឱ្យមានអតិរេកពាណិជ្ជកម្មដ៏ច្រើនកាលពីឆ្នាំមុន ដែលធ្វើឱ្យប្រទេសនេះងាយរងគ្រោះទៅនឹងការគំរាមកំហែងដកហូតពន្ធតបតរបស់ប្រធានាធិបតី ដូណាល់ ត្រាំ ដែលចាប់ផ្តើមនៅក្នុងខែមេសា។
ទីភ្នាក់ងារព័ត៌មានរ៉យទ័រ រដ្ឋាភិបាលវៀតណាមបានឱ្យដឹងថា៖ «នាយករដ្ឋមន្ត្រី [វៀតណាម] បានណែនាំក្រសួងវិទ្យាសាស្ត្រនិងបច្ចេកវិទ្យាឱ្យចេញអាជ្ញាប័ណ្ណឱ្យបានលឿនទៅឱ្យក្រុមហ៊ុន Starlink ស្ថិតក្រោមមូលដ្ឋានសាកល្បង»។
សូមបញ្ជាក់ថាក្នុងកិច្ចប្រជុំនោះមានការអញ្ជើញចូលរួមក៏មានវត្តមានឧបនាយករដ្ឋមន្ត្រី លោក Ho Duc Phoc និងលោក Nguyen Chi Dung តំណាងថ្នាក់ដឹកនាំក្រសួង ស្ថាប័នមជ្ឈឹមនិងមូលដ្ឋាន សាជីវកម្ម និងសហគ្រាសធំៗរបស់វៀតណាម; ឯកអគ្គរដ្ឋទូតរងសហរដ្ឋអាមេរិកប្រចាំនៅវៀតណាមលោកស្រី Courtney Beale; សមាគម សាជីវកម្មនិងក្រុមហ៊ុនចំនួន៣៨ នៃសហរដ្ឋអាមេរិក។
នាយករដ្ឋមន្ត្រីលោក ហ្វាម មិញជីញ បាន អះអាងថា វៀតណាមជានិច្ចកាលបង្កលក្ខខណ្ឌអំណោយផលសម្រាប់សហគ្រាសអាមេរិក ដោយឈរលើគោលការណ៍ “ផលប្រយោជន៍ចុះសម្រុង ហានិភ័យចែករំលែក” ; ដោយសម្របសម្រួលផលប្រយោជន៍រដ្ឋ ប្រជាជន និងសហគ្រាស។ នាយករដ្ឋមន្ត្រី លោក ហ្វាម មិញជីញ មានប្រសាសន៍ថា៖ “យើងខ្ញុំមានបំណង់ប្រាថ្នាមួយចំនួន។ ទី១ គឺការរួមចំណែកជំរុញទំនាក់ទំនងល្អប្រសើររវាងប្រទេសទាំងពីរឲ្យកាន់តែល្អប្រសើរ កាន់តែប្រសិទ្ធភាព។ ទី២ គឺការបង្កើនការវិនិយោគគុណភាពខ្ពស់បន្ថែមទៀត ជាពិសេសការផ្ទេរបច្ចេកវិទ្យា និងការបណ្តុះបណ្តាលធនធានមនុស្ស ជាពិសេសទាក់ទងនឹងបញ្ហាវិទ្យាសាស្ត្រ និងការច្នៃប្រឌិតក្នុងវិស័យកំពុងរីកចម្រើន។ ទី៣ គឺបន្តពង្រឹងកិច្ចសហប្រតិបត្តិការរវាងសហគមន៍ធុរកិច្ចនៃប្រទេសទាំងពីរ ដើម្បីបង្កើតលក្ខខណ្ឌសម្រាប់សហគ្រាសវៀតណាមចូលរួមក្នុងខ្សែសង្វាក់តម្លៃសកល និងជាពិសេសចូលរួមនៅក្នុងខ្សែសង្វាក់ផ្គត់ផ្គង់សកលរបស់សហគ្រាសអាមេរិក។ ទី ៤ សុំស្នើរឱ្យសហគមន៍ធុរកិច្ចអាមេរិកមានសំឡេងទៅកាន់រដ្ឋបាលថ្មីរបស់លោកប្រធានាធិបតី Donald Trump ដើម្បីទទួលស្គាល់សេដ្ឋកិច្ចវៀតណាមជាសេដ្ឋកិច្ចទីផ្សារ”។
កាលពីខែកុម្ភៈ សភាវៀតណាមបានអនុម័តគម្រោងបណ្ដោះអាសន្នមួយដើម្បីអនុញ្ញាតឱ្យក្រុមហ៊ុនអ៊ីនធឺណិតតាមផ្កាយរណបនានាផ្តល់សេវាកម្មក្នុងប្រទេសវៀតណាមដែលក្នុងគម្រោងនេះ ក្រុមហ៊ុនទាំងនោះនឹងរក្សាការគ្រប់គ្រងពេញលេញលើក្រុមហ៊ុនបុត្រសម្ព័ន្ធក្នុងស្រុករបស់ខ្លួន ពោលគឺជាបុរេលក្ខខណ្ឌដែលកំណត់ដោយលោក Musk ។ការណ៍នេះបង្ហាញឱ្យឃើញពីការផ្លាស់ប្តូរគោលជំហរភា្លមៗរបស់វៀតណាមអំពីភាពជាម្ចាស់កម្មសិទ្ធិលើក្រុមហ៊ុនផ្តល់សេវាអ៊ីនធឺណិតតាមផ្កាយរណប ដោយសារប្រទេសកុម្មុយនិស្តតែងតែរក្សាដែនកំណត់យ៉ាងតឹងរ៉ឹងលើកម្មសិទ្ធិគ្រប់គ្រងរបស់ជនបរទេសទៅលើវិស័យសេដ្ឋកិច្ចជាច្រើនដែលខ្លួនចាត់ទុកថាមានភាពរសើប។មន្ត្រីអាមេរិកម្នាក់ដែលបានចូលរួមក្នុងកិច្ចប្រជុំកាលពីថ្ងៃសៅរ៍បាននិយាយថា ការពិភាក្សា «នឹងសង្ឃឹមថានឹងដោះស្រាយបញ្ហាដែលមិនទាន់សម្រេច» សម្រាប់ក្រុមហ៊ុនអាមេរិកនៅក្នុងប្រទេសវៀតណាម។ នេះបើយោងតាមទីភ្នាក់ងារព័ត៌មានរ៉យទ័រ។
សូមបញ្ជាក់ថាសហរដ្ឋអាមេរិកគឺជាទីផ្សារនាំចេញដ៏ធំបំផុតរបស់វៀតណាមក្នុងរយៈពេល២០ ឆ្នាំកន្លងមក ។វៀតណាមបានក្លាយជាដៃគូពាណិជ្ជកម្មធំជាងគេទី៧ របស់សហរដ្ឋអាមេរិក ក៏ដូចជាដៃគូធំបំផុតនៅក្នុងតំបន់អាស៊ានផងដែរ។ ទំហំពាណិជ្ជកម្មរវាងប្រទេសទាំងពីរ(វៀតណាមអាមេរិក)ក្នុងឆ្នាំ ២០២៤ នឹងឈានដល់ជិត ១៥០ ពាន់លានដុល្លារអាមេរិក ដែលក្នុងនោះការនាំចេញរបស់វៀតណាមទៅកាន់សហរដ្ឋអាមេរិកនឹងមានចំនួន ១៣៧ ពាន់លានដុល្លារ (កើនឡើង ១៩% ធៀបនឹងរយៈពេលដូចគ្នាក្នុងឆ្នាំ ២០២៣) ហើយការនាំចេញរបស់អាមេរិកទៅកាន់វៀតណាមនឹងកើនឡើងដល់ជាង ១៣ ពាន់លានដុល្លារ (កើនឡើង ៣៣%)...៕
