បើកសវនាការដំបូង អតីតអភិបាលខេត្តតាកែវ លោក ឡាយ វណ្ណៈបដិសេធរឿងធ្វើឃាតស្រីស្នេហ៍!
27-March-2024 / សន្តិសុខសង្គម
ភ្នំពេញ៖ សាលាដំបូងរាជធានីភ្នំពេញនៅព្រឹកថ្ងៃទី២៣ ខែមករា ឆ្នាំ២០១៩ បានលើកយកសំណុំរឿងលោក ឡាយ វណ្ណ: អតីត អភិបាលខេត្តតាកែវនិងបងប្រុសរួមជាមួយមនុស្ស២នាក់ទៀត ដែលជាប់ចោទលើករណីឃាតកម្មស្រីកំណាន់គឺនាងចេវ សុវឌ្ឍនា ។
ប្រភពពីមន្ត្រីតុលាការឲ្យដឹងថា៖ សវនាការដឹកនាំដោយ លោក ហម ម៉េងសែ អនុប្រធានសាលាដំបូងនិងជាប្រធានក្រុមប្រឹក្សារជំនុំជម្រះបាន ធ្វើឡើង បន្ទាប់ពីបើកការស៊ើបសួរ អស់រយៈពេលជាង៩ខែរួចមក បន្ទាប់ពី លោក កូយ សៅ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចចេញដីកាឃុំខ្លួនលោក ឡាយ វណ្ណៈ អតីតអភិបាលខេត្តតាកែវ និង បក្ខពួក៣នាក់ទៀត ដាក់ពន្ធនាគារបណ្តោះអាសន្នកាលពីល្ងាចថ្ងៃទី៣ ខែមេសា ឆ្នាំ២០១៨ ។
សវនាការនាថ្ងៃដំបូងនេះ ជនជាប់ចោទឡាយ វណ្ណៈ បានសារភាពថាបានស្គាល់ចេវ សុវឌ្ឍនា នាអំឡុងឆ្នាំ២០១៦តាមរយៈមេគយខេត្តតាកែវ ដែល ជាប្រធាន ក្រុមការងារយុវជន ក្រៅប្រទេស ។ក្នុងរយៈពេលនៃការស្រលាញ់គ្នាលួចលាក់នេះលោកជាមួយនិងវឌ្ឍនាមានការរកាំរកូសគ្នាជាញឹកញាប់ដោយសារតែវឌ្ឍនា មាន ចិត្ត ប្រ ចាន់ហួងហែងច្រើន រហូតមានពេលខ្លះគាត់បានលេបថ្នាំប៉ុនប៉ងសម្លាប់ខ្លួន គំរាម លោក មិនអោយទៅប្រទេសម៉ារ៉ុកជាមួយនិងភរិយា ។
ថ្ងៃមួយលោកបានជ្រុលដៃទះកំភ្លៀងវឌ្ឍនា២ដៃដោយសារតែលោកខឹងវឌ្ឍនា ទៅតាមរក រឿង លោក ដល់ ផ្ទះ ឱពុកក្មេក លោក ដោយចោទថាលោកមានស្រីលាក់នៅក្នុងផ្ទះ ។រហូតដល់ថ្ងៃទី ២៥ ថ្ងៃទី ២៦មិនា ឆ្នាំ២០១៨ លោកមានទំនាស់ជាពាក្យសម្ដីតិចតួចជាមួយវឌ្ឍនាដោយសារតែនាងបានបង្ខំអោយលោកមករស់នៅក្នុងផ្ទះជាមួយរូបនាងតែម្ដង ក្នុងនោះវឌ្ឍនាបានស្នើអោយរូបលោកស្រលាញ់នាងដូចដើម ហើយទី២យកនាងជាប្រពន្ធទី២ ប៉ុន្តែនិយាយគ្នាមិនត្រូវលោកក៏ត្រឡប់ទៅផ្ទះវិញ ។
លុះដល់ថ្ងៃទី ២៦មិនា ពេលចេញពីប្រជុំលោកក៏បានអោយអ្នកបើកបរជូនលោកមកផ្ទះវឌ្ឍនាម្ដងទៀតដើម្បីហូបបាយជុំគ្នា ប៉ុន្តែពេលទូរស័ព្ទទៅស្រាប់តែវឌ្ឍនាបានមកដល់ភ្នំពេញទៅហើយដោយសារនាងយល់ច្រលំថាមកហូបបាយនៅផ្ទះនាងបឹងស្នោ ។ ពេលនោះនាងក៏បានមកវិញជាមួយចាន់ រីនិងប្ដី ។
ពេលមកដល់ជួបគ្នានៅព្រលប់នោះពួកលោកបាននិយាយគ្នាម្ដងទៀត ប៉ុន្តែនិយាយគ្នាមិនត្រូវសោះលោកក៏ត្រឡប់ទៅវិញ ពេលនោះវឌ្ឍនាបានិយាយពីលើជណ្ដើរមកថា បើថ្ងៃនេះបងចេញផុតពីមាត់ទ្វារផ្ទះបងនឹងលែងបានជួបមុខអូនរហូតហើយ ពេលនោះលោកនៅតែដើរចេញ ទៅឡើងឡានមកផ្ទះវិញ ។ លុះពេលមកដល់ផ្ទះស្រាប់តែចាន់ រី ទូរស័ព្ទមកប្រាប់ថា វឌ្ឍនា យក កាំបិតអាដៃប៉ុន្តែនាងនិងប្ដីបានដណ្ដើមយកកាំបិទហើយ ។
មួយសន្ទះក្រោយមកស្រាប់តែចាន់ រី ទូរស័ព្ទមកម្ដងទៀតថា វឌ្ឍនាចងកសម្លាប់ខ្លួនហើយ។ ពេលនោះលោកមិនជឿទេ ប៉ុន្តែបានអោយសា ម៉ៃទៅមើល ពេលទៅដល់សាម៉ៃប្រាប់តាមទូរស័ព្ទថាបងស្រីចងកសម្លាប់ខ្លួនមែន ។ លោកតក់ស្លុតហើយបានប្រាប់អោយសាម៉ៃយកទូរស័ព្ទរបស់វឌ្ឍនាមកទុកដោយសារក្នុងទូរស័ព្ទមានថតរូបលោកជាមួយវឌ្ឍនាយ៉ាងច្រើនខ្លាចធ្លាក់ដល់ដៃអ្នកកាសែត ។ បន្ទាប់មកលោកក៏បានអោយអ្នកបើកបរម្នាក់ទៀតជូនលោកមកភ្នំពេញមើលកូនឈឺនិងប្រាប់រឿង វឌ្ឍានាចងកសម្លាប់ខ្លួនអោយប្រពន្ធដឹង ។ ក្នុងពេលនោះដែរស្រាប់តែម្ដាយវឌ្ឍនានិងកូនទី២បានទូរស័ព្ទមកលោកប្រាប់ពីរឿងវឌ្ឍនាចងក ពេលនោះលោកក៏សុំប្រពន្ធមកតាកែវវិញដើម្បីចាត់ចែងសុំយកសាកសពមកធ្វើបុណ្យនៅភ្នំពេញ ។
សវនាការនេះបានសាកសួរ លោកឡាយ វណ្ណៈ បានត្រឹមប៉ុណ្ណឹងប្រធានក្រុមប្រឹក្សាជំនុំជំរះក៏បានសម្រេចផ្អាកសវនាការដោយសារដល់ម៉ោងបញ្ចប់ទៅហើយ ដោយសវនាការបន្ទាប់តុលាការនឹងជូនដំណឹងពេលក្រោយ ។
សូមបញ្ជាក់ថា ជនជាប់ចោទក្នុងរឿងនេះមាន៤នាក់រួមមាន៖ ទី១៖ លោក ឡាយ វណ្ណៈ អតីតអភិបាលខេត្តតាកែវអាយុ៤៥ឆ្នាំជាប់ចោទប្រកាន់ពីបទឃាតកម្ម ប្រព្រឹត្តនៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨ តាមមាត្រា១៩៩ នៃក្រមព្រហ្មទណ្ឌ។
, ទី២៖ លោក ឡាយ ណារិទ្ធ ស្នងការរងនគរបាលខេត្តតាកែវ ត្រូវជាបងប្រុស លោក ឡាយ វណ្ណៈ, ទី៣៖ឈ្មោះ ម៉េន សាម៉ៃ អ្នកបើកឡានឲ្យលោក ឡាយ វណ្ណៈ និងទី៤៖ ឈ្មោះ ជឹម វុធ ហៅ ថូត ជាអ្នកបំរើនៅផ្ទះនាង ចេវ សុវឌ្ឍនា។ ចំណែកមនុស្សពីរនាក់ទៀតត្រូវបានអនុញ្ញាតឱ្យត្រឡប់ទៅផ្ទះវិញមានឈ្មោះ ឈ្មោះ ចាន់ រី ភេទស្រី និងឈ្មោះ តាក់ រតនា ជាអ្នកបើកឡានឱ្យលោក ឡាយ ណារិទ្ធ។
លោក ឡាយ ណារិទ្ធ អាយុ៤៦ឆ្នាំ ឈ្មោះ ម៉េន សាម៉ៃ ភេទប្រុស អាយុ៣៦ឆ្នាំ និង ឈ្មោះ ជឹម វុធ ហៅថូត ភេទប្រុស អាយុ៤១ឆ្នាំ ជាប់ចោទប្រកាន់ពីបទលាក់បំបាំងតម្រុយ ប្រព្រឹត្តនៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨ តាមមាត្រា៥៣២ នៃក្រមព្រហ្មទណ្ឌ។
យោងតាមច្បាប់ក្រមព្រហ្មទណ្ឌ បានចែងថា មាត្រា១៩៩: បទឃាតកម្ម៖ អំពើសម្លាប់មនុស្សដោយចេតនា ដោយប្រើអាវុធ ឬមិនប្រើអាវុធ ដោយគ្មានស្ថានទម្ងន់ណាមួយដូចបានកំណត់ក្នុងមាត្រា២០០ (បទឃាតកម្មគិតទុកជាមុន) ដល់មាត្រា២០៥ (បទឃាតកម្មដោយមានទារុណកម្ម អំពើឃោរឃៅ ឬអំពើរំលោភសេពសន្ថវៈ) នៃក្រមនេះ គឺជាឃាតកម្ម។
ឃាតកម្មត្រូវផ្ដន្ទាទោសដាក់ពន្ធនាគារពី ១០(ដប់)ឆ្នាំ ទៅ១៥(ដប់ប្រាំ)ឆ្នាំ។ មាត្រា៥៣២៖ បទលាក់បំបាំងតម្រុយ៖ អំពើកែប្រែ លុបបំបាត់ ឬលាក់បំបាំងតម្រុយ ឬស្លាកស្នាមនៅលើទីកន្លែងនៃបទឧក្រិដ្ឋ ឬបទមជ្ឈិម ក្នុងគោលបំណងធ្វើជាឧបសគ្គដល់ការស្វែងរកឲ្យឃើញនូវការពិត ត្រូវផ្ដន្ទាទោសដាក់ពន្ធនាគារពី ១(មួយ)ឆ្នាំ ទៅ៣(បី)ឆ្នាំ និងពិន័យជាប្រាក់ពី ២,០០០,០០០(ពីរលាន)រៀល ទៅ៦,០០០,០០០(ប្រាំមួយលាន)រៀល។ក្រោយពីសួរនាំលោកឡាវយណ្ណៈរួចសវនាការបានបន្តទៅថ្ងៃក្រោយទៀតព្រោះមិនទាន់អស់គ្នា!។
ជនរងគ្រោះឈ្មោះ ចេវ សុវឌ្ឍនាអាយុ ៣៦ឆ្នាំមានកូន ៣នាក់ក្នុងបន្ទុក។ដំបូងឡើយត្រូវបានរកឃើញថាស្លាប់ដោយចងកដែល សមត្ថកិច្ចខេត្តតាកែវ អះអាងកាលពីពេលនោះថា ជនរងគ្រោះ ធ្វើ អត្តឃាតខ្លួនឯង។ ប៉ុន្តែក្រោយការស៊ើបអង្កេតរបស់សមត្ថកិច្ចក្រសួងមហាផ្ទៃមួយក្រុមបង្ហាញថាស្ត្រីជនរងគ្រោះត្រូវបានធ្វើឃាតទៅវិញ ទើបរឿងក្ដីត្រូវបានសើរើ ហើយតុលាការរាជធានីភ្នំពេញបានបញ្ជាអោយសមត្ថកិច្ចចាប់លោកឡាយ វណ្ណៈ លោកឡាយ ណារិទ្ធ ម៉េម សាម៉ៃ និងជឹម វុធ មកដាក់ឃុំខ្លួន។
