អធិការខណ្ឌដង្កោដឹកនាំកម្លាំងមកសុំសម្របសម្រួលជនរងគ្រោះដែលខ្លួនបានបាញ់របួស
06-November-2022 / សន្តិសុខសង្គម
ភ្នំពេញ៖ក្រោយពីសមត្ថកិច្ចខណ្ឌដង្កោ បានបើកការបាញ់ប្រហារ ទៅលើយុវជនម្នាក់បណ្តាលអោយរបួសធ្ងន់ បាក់ភ្លៅ និងបានវាយទាត់ធាក់ជាទម្ងន់កាបីថ្ងៃទី៤ធ្នូដែលក្រោយមកដឹងថាជា មន្ត្រីយោធានៅអង្គរក្ស និងត្រូវជាកូនឧត្តមសេនីយ៍យោធាផ្កាយបីម្នាក់ នៅថ្ងៃទី៧ ខែធ្នូ ឆ្នាំ២០១៨ លោកជឹម ស៊ីថា អធិការខណ្ឌដង្កោ បាននាំមន្ត្រីក្រោមឪវាទ ទៅសុំទៅសុំសម្របសម្រួល ជនរងគ្រោះដល់មន្ទីរពេទ្យ។
មន្ត្រីយោធានៅអង្គរក្ស និងត្រូវជាកូនឧត្តមសេនីយ៍យោធាផ្កាយបីម្នាក់ ត្រូវបានប៉ូលិសខណ្ឌដង្កោ និងខណ្ឌមានជ័យ មួយក្រុមដេញបាញ់ ចំណុចម្ដុំផ្សារដីថ្មី ក្នុងសង្កាត់ស្ទឹងមានជ័យ៣ ខណ្ឌមានជ័យ កាលពីម៉០ង៣រសៀលថ្ងៃទី៤ ខែធ្នូ ឆ្នាំ២០១៨ កំពុងតែធ្វើអោយកក្រើកពេញបណ្តាញសង្គមហ្វេសប៊ុក។ ជនរងគ្រោះឈ្មោះ ឯល ស៊ឹមសុភ័ក្ត្រ ជាមន្ត្រីយោធាស័ក្តិបី នៅបញ្ជាការដ្ឋានអង្គរក្ស ត្រូវប៉ូលិសបាញ់បាក់ភ្លៅខាងស្តាំ និងរបួសត្រង់ត្រគាក។ ជនរងគ្រោះបានបញ្ជូនទៅសង្គ្រោះនៅមន្ទីរពេទ្យរុស្ស៊ី រួចបញ្ជូនទៅមន្ទីរពេទ្យកាល់ម៉ែត្រ។សមត្ថកិច្ចបានចោទថា ក្រុមជនសង្ស័យទាំងពីរបានបើកការបាញ់តបលើសមត្ថកិច្ចចំនួន ៤គ្រាប់។
តែជនរងគ្រោះបានអះអាងថា ខ្លួនមិនបានបាញ់តដៃជាមួយប៉ូលិស ដូចជាការលើកឡើងរបស់ក្រមប៉ូលិសនោះទេ។ជនរងគ្រោះ បាន ឲ្យអ្នកយកព័ត៌មានដឹងថា ដំបូងលោក និងមិត្តភ័ក្ដិ ២នាក់ទៀតបានចេញពីហូបបាយថ្ងៃត្រង់ដោយលោកជិះម៉ូតូមួយពីរនាក់ និងមិត្តម្នាក់ទៀតជិះម្នាក់ឯងបើកទៅមុនបាត់។ខណៈពេលបើកតាមផ្លូវធម្មតាស្រាប់តែមានម៉ូតូឌ្រីមសង់មួយគ្រឿង បានបើកស្ទាក់ពីមុខគាត់ដែលជិះ Zoomer X ហើយម៉ូតូស្ទាក់នោះមិនបាននិយាយអ្វីច្រើនបែររកវ៉ៃលោក រួចក៏ចុះប្រតាយប្រតបគ្នាបានបន្តិច លោកក៏ទាញម៉ូតូជិះចេញទៅជាមួយមិត្តភ័ក្ដិ។ ពេលកំពុងជិះ ស្រាប់តែមានប៉ូលិសចំនួន ៤នាក់ មកដេញបាញ់លោកទំនងជាម៉ូតូស្ទាក់ទូរសព្ទហៅ។ លោកមានការភិតភ័យក៏ព្យាយាមជិះម៉ូតូគេចតាមផ្លូវតូចៗ ហើយប៉ូលិសបានបាញ់អស់ ៤គ្រាប់។
នៅពេលបាញ់ត្រូវភ្លាម ខ្លួនចង់ប្រាប់ថា ខ្លួនក៏ជាសមត្ថកិច្ចដែរ តែគេមិនស្តាប់វ៉ៃយកៗ និងចាប់ដាក់ខ្នោះថែមទៀត។ ចំណែកកាំភ្លើងរបស់គាត់ “ជនគ្រោះ” ម៉ាកឡុក៩៨ មាន១២គ្រាប់។ជនរងគ្រោះក៏បានអំពាវនាវឲ្យថ្នាក់លើផ្ដល់យុត្តិធម៌ដល់រូបលោកដែរ។
ប្រភពពីសមត្ថកិច្ចដែលចុះប្រតិបត្តិការខាងលើនេះ បានបង្ហើបប្រាប់ក្រុមអ្នក ថា មុនពេលកើតហេតុជនសង្ស័យមានគ្នា ២នាក់ កំពុងផឹកស៊ីនៅសង្កាត់ព្រៃសរ ខណ្ឌដង្កោ ហើយពួកគេបានដកកាំភ្លើងម៉ាកឡុក សំញ៉ែងអ្នកក្បែរខ្លួន ស្របពេលនោះក៏មានកម្លាំងសមត្ថកិច្ចឃើញ។ ដោយគិតថាខ្លួនឯងជាជនសង្ស័យផង ក៏នាំគ្នាជិះម៉ូតូម្នាក់មួយគ្រឿងចេញពីកន្លែងផឹកស៊ី រត់រហូតផ្អើលទាំងកម្លាំងសមត្ថកិច្ចខណ្ឌដង្កោ សហការជាមួយកម្លាំងសមត្ថកិច្ចប៉ុស្ដិ៍ស្ទឹងមានជ័យ៣ ដេញតាមពីក្រោយ។
ខណៈមកដល់ផ្លូវទាល់ម្ដុំផ្សារដីថ្មី ក្នុងសង្កាត់ស្ទឹងមានជ័យ៣ ខណ្ឌមានជ័យ ជនសង្ស័យក៏ដកកាំភ្លើងបាញ់មកលើសមត្ថកិច្ចចំនួន ៤គ្រាប់ ហើយត្រូវសមត្ថកិច្ចបាញ់វិញមួយគ្រាប់ចំជើងម្ខាងបណ្ដាលឲ្យដេកដួលលើម៉ូតូ ហើយសមត្ថកិច្ចបានចាប់វ៉ៃខ្នោះ និងដកហូតកាំភ្លើងខ្លីម៉ាកឡុកមួយដើម។ ចំណែកបក្ខពួកម្នាក់ទៀតរត់គេចខ្លួនបាត់។
ក្រុមគ្រួសារជនរងគ្រោះ នឹងដាក់ប្តឹងក្រុមប៉ូលិសដែលបានជិះម៉ូតូដេញបាញ់លើលោកឯល ស៊ឹមសុភ័ក្ត្រ ទៅនាយឧត្តមសេនីយ៍ នេត សាវឿន អគ្គស្នងការនគរបាលជាតិ សម្តេចក្រឡសហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួង មហាផ្ទៃ និងតុលាការ ដើម្បីយុត្តិធម៌ ដើម្បីយកជនដៃដល់មកផ្តន្ទាទោសតាមច្បាប់។
