ទាហានថៃ ប្រកាសត្រៀមដណ្តើមយកដីដែលពលរដ្ឋខ្មែរកំពុងរស់នៅឱ្យបាន នៅថ្ងៃទី១០ តុលាដោយមិនស្តាប់ការតវ៉ារបស់កម្ពុជា
16-April-2026 / សន្តិសុខសង្គម
ប្រទេសថៃ៖ផ្ទុយពីជំហរអ្នកនាំពាក្យកងទព័ថៃដែលអះអាងកាលពីថ្ងៃទី៥តុលាថាគេនឹងចូលប្រជុំRBCតាមការអញ្ជើញរបស់ភាគីកម្ពុជាកងទ័ពភូមិភាគទី១របស់ថៃនៅថ្ងៃចន្ទទី០៦ខែតុលាឆ្នាំ២០២៥ និយាយថា ខ្លួននឹងមិនចូលរួមកិច្ចប្រជុំគណៈកម្មាធិការព្រំដែនតំបន់ (RBC)កម្ពុជា-ថៃ នាពេលខាងមុខទេ លុះត្រាតែយោធភូមិភាគទី៥របស់កម្ពុជា បង្ហាញផែនការបណ្តេញជនស៊ីវិលកម្ពុជា ចេញពីតំបន់ជម្លោះចំនួនបី ដែលខ្លួនអះអាងថាស្ថិតនៅក្នុងខេត្តស្រះកែវប្រទេសថៃ។ នេះបើតាមការចុះផ្សាយដោយសារព័ត៌មានThe Nation។
នៅក្នុងរបាយការណ៍ស្ថានភាពប្រចាំថ្ងៃរបស់ខ្លួនចុះថ្ងៃចន្ទ ទី០៦ តុលាឆ្នាំ២០២៥ កងទ័ពភូមិ១ បាននិយាយថា ខ្លួនបានស្នើសុំឱ្យយោធភូមិភាគទី៥កម្ពុជា រៀបចំផែនការបណ្តេញជនស៊ីវិលកម្ពុជាចេញពី ភូមិបានណងចាន់(Ban Nong Chan) និងបានណងយ៉ាកែវ( Ban Nong Ya Kaeo) ក្នុងស្រុកគោកស៊ុង( Khok Sung )និង បានខ្លងផែង(Ban Khlong Phaeng) នៅស្រុកតាផ្រាយ៉ា( Ta Phraya )ខេត្តស្រះកែវ មុនពេលចូលរួមកិច្ចប្រជុំ RBC ។
ដោយឡែកមេបញ្ជាការកងកម្លាំងពិសេសអារញ្ញប្រាថេតក៏បាននិយាយថា បារម្ភពីអំពើហិង្សានៅថ្ងៃទី ១០ ខែតុលា ខណៈដែលខាងកម្ពុជាបានចល័តកុមារ និងមនុស្សចាស់មកកៀកតំបន់របងព្រំដែន។ លោកបានព្រមានថា កងទ័ពថៃ អាចនឹងមិនទទួលខុសត្រូវ ប្រសិនបើមានគ្រោះថ្នាក់កើតឡើង។
លោកវរសេនីយ៍ឯក ឆៃណារ៉ុង កាស៊ី (Col. Chainarong Kasee) មេបញ្ជាការកងកម្លាំងពិសេសអារញ្ញប្រាថេត នៃមជ្ឈមណ្ឌលប្រតិបត្តិការយោធាភូមិភាគទី ១ បានលើកឡើងនៅថ្ងៃអាទិត្យទី៥តុលានេះថា លោកនឹងរក្សាអធិបតេយ្យភាពរបស់ប្រទេសថៃ នឹងដណ្តើមយកមកវិញនូវតំបន់ណាមួយដែលកំពុងត្រូវបានរំលោភបំពាន។
លោកបានបញ្ជាក់ថា ទោះបីជាវិធីសាស្រ្ត និងពេលវេលានៃភាពជោគជ័យនេះនៅមិនទាន់ដឹងក៏ដោយ ក៏លោកបញ្ជាក់ថា ក្នុងនាមជាជនជាតិថៃ និងជាទាហានថៃ លោកត្រូវតែបំពេញកាតព្វកិច្ចឱ្យអស់ពីសមត្ថភាព និងមិនធ្វើឱ្យប្រជាជនខកចិត្តឡើយ ដោយបានស្នើសុំឱ្យពួកគេផ្តល់ការគាំទ្រផ្នែកសីលធម៌។
អភិបាលខេត្តស្រះកែវ បានដាក់ឳសានុវាទផុតកំណត់ត្រឹមថ្ងៃទី ១០ ខែតុលា សម្រាប់ជនជាតិកម្ពុជាទាំងអស់ដែលអះអាងសិទ្ធិនៅតាមព្រំដែនស្រះកែវ ត្រូវតែចាកចេញពីតំបន់នោះ។មេ យោធភូមិភាគទី៥របស់កម្ពុជា បានឆ្លើយតបកាលពីថ្ងៃអាទិត្យ ទី០៥ ខែតុលាឆ្នាំ២០២៥ ថា ខ្លួនមិនអាចធ្វើតាមសំណើនេះបានទេ។
អាជ្ញាធរកម្ពុជា បានអះអាងថា តំបន់ដែលថៃគ្រោងដណ្តើមយកនៅថ្ងៃទី ១០ តុលានេះ គឺភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ជាទីតាំងដែលពលរដ្ឋរស់នៅ និងប្រកបការងារកសិកម្មជាង ៣០ឆ្នាំមកហើយ។ ទីតាំងនេះ គឺជាទឹកដីខ្មែរពិតប្រាកដ។
សូមបញ្ជាក់ថាភូមិជោគជ័យជាភូមិសមរភូមិក្តៅមួយ ដែលថៃបានរាយបន្លាលួសឈ្លានពានចូលទឹកដីកម្ពុជា។ ភូមិយុទ្ធសាស្រ្តជាប់ព្រំដែនថៃនេះ បច្ចុប្បន្នមានពលរដ្ឋរស់នៅប្រមាណ ៧៣២ គ្រួសារ។លោក ប៉ែន ឫទ្ធី មេភូមិជោគជ័យ ក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យបានប្រាប់ថា ភូមិនេះមានចម្ងាយប្រមាណ ២០ គីឡូម៉ែត្រពីទីប្រជុំជនក្រុងប៉ោយប៉ែត ពោលបើធ្វើដំណើរតាមផ្លូវជាតិលេខ ៥៨ គឺនៅត្រង់បង្គោលលេខ ២០ តែម្តង។
មេភូមិថា «ការរាយបន្លាលួសរបស់យោធាថៃបានព័ទ្ធផ្ទះប្រជាពលរដ្ឋខ្មែរចំនួន ៦ ខ្នង រួមទាំងដីនិងស្រែចម្ការមួយចំនួនទៀត»។«បើគិតពីចម្ងាយពីទីតាំងចាស់ដែលជាទឹកដីកម្ពុជាធ្លាប់ឈរជើង មកដល់ទីតាំងរាយបន្លាលួសមានចម្ងាយប្រហែល ១៤៥ ម៉ែត្រ»។
ភូមិជោគជ័យស្ថិតនៅក្នុងចំណោមភូមិទាំង ១១ នៅក្នុងដែនដីរដ្ឋបាលរបស់ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ភូមិនេះមានភូមិសាស្រ្តប្របតាមបណ្តោយព្រំដែនកម្ពុជាថៃតាមបណ្តោយផ្លូវជាតិលេខ ៥៨ ។
កាលពីពេលថ្មីៗនេះ ក្រសួងការពារជាតិកម្ពុជាបានធ្វើការឆ្លើយតបទៅការបង្ហាញផែនទីរូបភាពផ្កាយរណបដែលគូសដោយឯកតោភាគីពីភាគីថៃ ដែលផ្សាយពីខ្សែបន្ទាត់ព្រំដែននៅតំបន់ភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យនៅចន្លោះបង្គោលព្រំដែនលេខ៤៤ និងលេខ៤៧។លោកឧត្តមសេនីយ៍ទោ ឆេង ឃុន នាយករងនាយកដ្ឋានភូមិសាស្ត្រ ក្រសួងការពារជាតិបានពន្យល់ថា ផែនទីដែលត្រូវបានបង្ហាញនិងផ្សព្វផ្សាយដោយអ្នកនាំពាក្យរងយោធាថៃ និងប្រព័ន្ធផ្សព្វផ្សាយថៃដែលបង្ហាញពីខ្សែបន្ទាត់ព្រំដែនឯកតោភាគីគឺខុសលក្ខណៈបច្ចេកទេស និងបង្កឱ្យមានការយល់ច្រឡំ។
«ខ្សែដែលមានពណ៌ក្រហម និងខ្សែពណ៌ខៀវនៅលើផែនទីរូបភាពផ្កាយរណបរបស់ថៃនេះ គឺមិនមែនជាខ្សែព្រំដែនផ្លូវការដែលបានឯកភាពគ្នានោះទេ ប៉ុន្តែវាគឺជាខ្សែតភ្ជាប់ដែលភាគីថៃយកមកគូសក្រៅផ្លូវការជាឯកតោភាគីប៉ុណ្ណោះ ហើយប្រើប្រាស់ដើម្បីពន្យល់ទៅសាធារណជនឱ្យមានការយល់ច្រឡំ និងទាមទារឱ្យកម្ពុជាទទួលស្គាល់ថាជាខ្សែព្រំដែនដែលបានឯកភាពគ្នាទ្វេភាគី»។
បើកផ្អែកលើផែនទីរបស់ថៃ តាមការអង្កេតរបស់ក្រុមការងារមូលដ្ឋាននៅលើដីជាក់ស្ដែង នៅចន្លោះបង្គោលព្រំដែនលេខ ៤៤ ដល់បង្គោលលេខ៤៧ ឃើញថា ប្រជាពលរដ្ឋថៃបានកាន់កាប់និងអាស្រ័យផលចូលមកក្នុងទឹកដីកម្ពុជា ព្រមទាំងមានផ្លូវកៅស៊ូថៃស្ថាបនាចូលក្នុងទឹកដីកម្ពុជាផងដែរ។
ក្រសួងការពារជាតិកម្ពុជាបានបន្ថែមថា ចំពោះប្លង់បង្ហាញពីទីតាំងភូមិសាស្ត្រ និងបង្គោលព្រំដែន ដែលអ្នកនាំពាក្យរងយោធាថៃក៏ដូចជារដ្ឋបាលខេត្តស្រះកែវ និងបណ្តាញព័ត៌មានថៃ យកមកបង្ហាញនិងផ្សព្វផ្សាយមានចុះហត្ថលេខាដោយលោក ឡាយ សៀងលី (អតីតប្រធានក្រុមវាស់វែងខាងកម្ពុជា) និងវរៈសេនីយ៍ឯក ឆាខន ប៊ុនផាក់ឌី (អតីតប្រធានក្រុមវាស់វែងខាងថៃ) គឺជាប្លង់ដែលបញ្ជាក់អំពីទីតាំងបង្គោលព្រំដែនប៉ុណ្ណោះ។
លោកឧត្តមសេនីយ៍ទោ ឆេង ឃុន បញ្ជាក់ថា ជារួម កម្ពុជានិងថៃមានមូលដ្ឋានគ្រប់គ្រាន់និងច្បាស់លាស់ទាំងមូលដ្ឋានច្បាប់ យន្តការស្ថាប័ន និងវិធានបច្ចេកទេសសម្រាប់ដោះស្រាយបញ្ហាព្រំដែនរវាងប្រទេសទាំងពីរ ជាពិសេសផែនទីមាត្រដ្ឋាន ១/២០០.០០០ យោងតាមអនុសញ្ញាឆ្នាំ១៩០៤ និង សន្ធិសញ្ញាឆ្នាំ១៩០៧ ព្រមទាំងមានការបោះបង្គោលព្រំដែនជាមួយគ្នាបានចំនួន ៧៤ បង្គោល ហើយភាគីទាំងពីរ កម្ពុជា-ថៃ បានទទួលស្គាល់ និងបញ្ជាក់ឡើងវិញនៅក្នុង MOU ឆ្នាំ២០០០។
លោកបន្ថែមថា ក្នុងការដោះស្រាយបញ្ហាព្រំដែននេះ កម្ពុជាប្រកាន់ជំហរការពារអធិបតេយ្យរបស់ខ្លួនដោយគោរពតាមផែនទីមាត្រដ្ឋាន១/២០០.០០០ និង មិនចង់បានទឹកដីថៃឡើយ ហើយស្នើភាគីថៃគោរពនូវអធិបតេយ្យរបស់កម្ពុជាវិញដូចគ្នា។លោកអ៊ុំរាត្រី អភិបាលខេត្តបន្ទាយមានជ័យ ក៏បានដាក់លិខិតតវ៉ាទៅអភិបាលខេត្តស្រះកែវផងដែរ តែត្រូវថៃទាត់ចោល។បើចឹងគិតម៉េចវិញបើថៃប្រើច្បាប់ព្រៃចឹង?៕
