ហ្វេសប៊ុកហុកណេវគុណមួយសំពៅទោសមួយចូលទៅរលាយបាត់បង់ត្រូវឃាត់ខ្លួនតាមការទាមទា
05-September-2026 / សន្តិសុខសង្គម
ភ្នំពេញ៖បុរសម្នាក់ដែលមានទ្រឹស្តីហុយដូចសំឡីគរខាងយុទ្ធសាស្ត្រគ្រប់ជ្រុងជ្រោយអប់រំសតិអារម្មណ៍តាមហ្វេសប៊ុកឈ្មោះហុកណេវបន្ទាប់ពីកម្ពុជាឆ្លងកាត់សង្គ្រាមឈ្លានពានថៃពីរលើកកាលពីឆ្នាំ២០២៥ត្រូវនគរបាលឃាត់ខ្លួនហើយ!
ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញនៅថ្ងៃទី២៤កញ្ញាបានសសេរ ថា៖ «ខ្ញុំបាទសូមគោរពជម្រាបជូនមហាជន មេត្តាជ្រាបថា ពាក់ព័ន្ធនឹងបុរសម្នាក់ឈ្មោះពិត គឹម ភិរម្យ (ជាម្ចាស់គណនីហ្វេសប៊ុកឈ្មោះ Hok Nave) ដែលកំពុងតែមានការជជែកវែកញែករឿងបែកធ្លាយសំឡេង និងប៉ះពាល់ដល់កិត្តិយសវីរបុរសកងទ័ព ព្រមទាំងប្អូនស្រី ដោយមានសំណូមពរពីមហាជនឱ្យសមត្ថកិច្ចមានចំណាត់ការលើជននោះ។ ជាការពិតណាស់ សមត្ថកិច្ចយើងខ្ញុំបានធ្វើការឃាត់ខ្លួនបុរសរូបនោះ កាលពីល្ងាចថ្ងៃទី២៣ ខែកញ្ញា ឆ្នាំ ២០២៦ រួចរាល់ហើយ និងកំពុងបន្តនីតិវិធីតាមផ្លូវច្បាប់។ សូមអរគុណ!» ។
ជនសង្ស័យឈ្មោះពិត គឹម ភិរម្យ ជាម្ចាស់គណនេយ្យហ្វេសប៊ុកឈ្មោះ Hok Nave ត្រូវបានកម្លាំងសមត្ថកិច្ចឃាត់ខ្លួនបាន ពាក់ព័ន្ធការបែកធ្លាយសម្លេងនៅលើបណ្តាញទំនាក់ទំនងសង្គម ដោយបានប្រើពាក្យពេជន៍ម៉ាក់ងាយធ្ងន់ធ្ងរលើវីរជនកងទ័ពកម្ពុជា នៅសមរភូមិមុខ ។
គួរជម្រាបថា សម្លេងបែកធ្លាយ ដោយប្រើពាក្យពេជន៍ម៉ាក់ងាយធ្ងន់ធ្ងរលើវីរជនកងទ័ពកម្ពុជានៅសមរភូមិមុខ នេះ បានទទួលការខឹងសម្បា និងមិនអាចទទួលយកបាននោះឡើយ ពីសំណាក់មហាជនលើបណ្តាញសង្គម ប្រជាពលរដ្ឋគ្រប់មជ្ឈដ្ឋាន ពិសេសគឺវីរកងទ័ព និងវីរកងនគរបាលកម្ពុជា ដែលកំពុងបំពេញភារកិច្ចដ៏ឧដ្តុងឧត្តមក្នុងបុព្វហេតុការពារបូរណភាពទឹកដីរបស់ប្រទេសជាតិ ពីការឈ្លានពានពីសំណាក់រដ្ឋបរទេសជិតខាង ។
ពាក្យពេជន៍ពុំសមរម្យរបស់បុគ្គលខាងលើរូបនេះ បានភ្ជាប់ខ្លឹមសារថា « ការជួយជំនួយដល់កងទ័ពគ្មានចំណេញអ្វីនោះឡើយ , កងទ័ពទាំងនោះ គ្មានតម្លៃអ្វីទេ នាំតែបំបង់បាយ តិចចង់បាននេះ តិចចង់បាននោះ , កងទ័ពគ្មានស្មោះត្រង់អីទេ គិតតែប្រយោជន៍រៀងៗខ្លួន , ពេលមានជំនួយស្បៀងច្រើន ចង់ហៅ ឧត្តមសេនីយ៍ឯក ស្រី ឌឹក មកទទួល ក៏បានដែរ ទទួលជាលក្ខណៈវីអាយភីទៅទៀត .ល។
ការផ្ទុះករណីខាងលើនេះ បានទាញឱ្យអ្នកលេងបណ្តាញសង្គមចាប់អារម្មណ៍ជាខ្លាំង ព្រោះតែបុគ្គលរូបនេះក៏ធ្លាប់ទទួលបានជំនួយពីសប្បុរសជន ដើម្បីរៀបចំអាហារនិងសម្ភារៈផ្សេងៗជូនវីរកងទ័ពដែរ តែក្រោយខ្នងបែរជានិយាយមាក់ងាយលើកងទ័ពទៅវិញ។ មហាជនបានរិះគន់ជាហូរហែ ដែលភាគច្រើនមិនអាចទទួលយកបានចំពោះពាក្យសម្តីដែលបុគ្គលនេះបាននិយាយ។
ក្រៅពីនិយាយមាក់ងាយកងទ័ព ថ្មីៗនេះក៏មាននារីម្នាក់បានអះអាងតាមការផ្សាយលើបណ្ដាញសង្គមថា បុគ្គលឈ្មោះ ហុក ណាវី បានប្រើសម្តីប្រមាថបៀតបៀនកេរ្តិ៍ខ្មាស និងបំពានកិត្តិយស លើប្អូនស្រីរបស់នាង ដែលជាទង្វើមិនអាចទទួលយកបានដាច់ខាត ខណៈដែលពេលនេះប្អូនស្រីរបស់នាងកំពុងរងសម្ពាធផ្លូវចិត្តយ៉ាងខ្លាំង។ ដូច្នេះនាងបានស្នើដល់មេធាវីស្ម័គ្រចិត្តសម្តេចតេជោ សូមជួយរកយុត្តិធម៌ជូនប្អូននាងផង និងស្នើឱ្យមានចំណាត់ការផ្លូវច្បាប់លើបុគ្គលនេះឱ្យខានតែបាន។
បន្ទាប់ពីមានសារចែកចាយលើបណ្ដាញសង្គមដូចបានរៀបរាប់ខាងលើ បុគ្គលឈ្មោះ ហុក ណាវី ក៏បានបង្ហោះសារជាសំណេរតាមគណនីហ្វេសប៊ុកផ្ទាល់ខ្លួន ដោយបានសុំទោសចំពោះពាក្យសម្ដី និងការប្រព្រឹត្តរបស់ខ្លួន ធ្វើឱ្យប៉ះពាល់ដល់កិត្តិយស សេចក្ដីថ្លៃថ្នូរ និងអារម្មណ៍របស់មេទ័ព និងវីរជនកងទ័ពទាំងអស់។ ជាមួយនេះ បុគ្គល ហុក ណាវី ក៏បានទទួលស្គាល់ផងដែរថា សំឡេងដែលបែកធ្លាយនោះពិតជាសំឡេងរបស់ខ្លួនប្រាកមែន ដោយបាននិយាយកាលពីថ្ងៃទី១២ ខែកញ្ញា ឆ្នាំ ២០២៦ គឺខ្លួនបានជជែកតាមហ្វេសប៊ុកជាមួយបុគ្គលម្នាក់ក្នុងលក្ខណៈជាការជជែកគ្នា និងការផ្ដល់យោបល់ផ្ទាល់ខ្លួន។
ដោយឡែក សំឡេងខ្លីៗចំនួន៣ផ្សេងទៀត ដែលមានពាក្យពាក់ព័ន្ធនឹងការហូបចុក ផឹកស្រា និងការសប្បាយ បុគ្គល ហុក ណាវី ថាសំឡេងទាំងនោះជាការជជែកជាមួយមនុស្សផ្សេងគ្នា និងនៅក្នុងបរិបទផ្សេងគ្នា ហើយលោកយល់ថា ការយកសំឡេងទាំងនោះមកកាត់តភ្ជាប់គ្នា អាចធ្វើឱ្យបរិបទដើមមានការយល់ឃើញខុសពីការពិត។
យ៉ាងណាមិញ លោកបានសុំទោសចំពោះក្រុមការងារ និងអ្នកដែលបានជឿទុកចិត្តលោក ចំពោះពាក្យសម្ដី និងសារមួយចំនួនដែលមិនសមរម្យ បានធ្វើឱ្យប៉ះពាល់ដល់កិត្តិយស និងការជឿទុកចិត្ត។ លោកថាពិតជាមានវិប្បដិសារី និងសោកស្ដាយចំពោះកំហុសឆ្គងនេះ។ ដូច្នេះលោកសុំឱកាសមួយដើម្បីកែប្រែខ្លួន ហើយយកកំហុសនេះធ្វើជាមេរៀន។តែការសុំទោសមិនអាចកាត់បន្ថយកំហឹងអ្នកលេងបណ្តាញសង្គមបានឡើយ។ចំណាត់ការរបស់លោកឧត្តមសេនីយ៍ជួនណារិន្ទត្រូវបានមើលឃើញថាត្រឹមត្រូវព្រោះមិនមានការអនុវត្តន៍ច្បាប់ស្តង់ដា២ឡើយ។
