ចុងក្រោយរកឃើញទីតាំងឆបោកអនឡាញមួយកន្លែងនៅប៉ោយប៉ែតកាងដោយស្នងការរងនគរបាលខេត្តម្នាក់!

បន្ទាយមានជ័យ៖នៅរសៀលថ្ងៃទី​ ២១​ ខែ​ កញ្ញា​ ឆ្នាំ​ ២០២៦​ សមត្ថកិច្ច​កងរាជអាវុធហត្ថ​ខេត្តបន្ទាយ​មានជ័យ​ បាន​ឆ្មក់ត្រួត​ពិនិត្យ​អាគារជួលមួយ​ស្ថិតនៅកណ្ដាលក្រុង​ ប៉ោយប៉ែត​ ។ក្នុងប្រតិបត្តិការបង្ក្រាបនោះអ្វីដែលចាប់អារម្មណ៍គឺថាទីតាំងនោះ​ ជា​កម្មសិទ្ធិរបស់​លោកឧត្ដមសេនីយ៍ត្រី​ អ៊ុំ​ សុផល​ស្នងការរងនគរបាលខេត្តដែលត្រូវបានឃាត់ខ្លួនផងដែរ ។ 

ការឃាត់ខ្លួនបុរស់ម្ចាស់ទីតាំងនេះ បន្ទាប់ពីសមត្ថកិច្ចជំនាញចុះបង្ក្រាបទីតាំងពីរកន្លែងក្នុងនោះ អគារទី១ កម្ពស់ ៥ជាន់ មាន ១៧២បន្ទប់ និងហល១ និងអគារទី ២ កម្ពស់ ២ ជាន់ មាន ៥៩ បន្ទប់ និងហ ល៤ពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា(online scam)។លោក ទូច សុឃៈ អ្នកនាំពាក្យរងក្រសួងមហាផ្ទៃ បានថ្លែងប្រាប់ សារព័ត៌មាននៅព្រឹកថ្ងៃទី២២ ខែកញ្ញានេះថា ករណីនេះបច្ចុប្បន្ន អគ្គស្នងការដ្ឋាននគរបាលជាតិ កំពុងពិនិត្យនីតិវិធីនានា ឈានទៅផ្អាកការងាររបស់លោកឧត្ដមសេនីយ៍ត្រី អ៊ុំ សុផល ដើម្បីបើកផ្លូវឱ្យតុលាការបន្តនីតិវិធីតាមផ្លូវច្បាប់។

លេខាធិការដ្ឋាននៃគណៈកម្មការចំពោះកិច្ចប្រឆាំងការឆបោកតាមប្រព័ន្ធបច្ចេកវិទ្យា ហៅកាត់ថា គ.ប.ឆ.ប.បានឱ្យដឹងថា ក្នុងប្រតិបត្តិការបង្ក្រាបនោះសមត្ថកិច្ច រកឃើញ ជនជាតិថៃ ១៧៤នាក់ (ស្រី្ត ៦៧នាក់), បង់ក្លាដេស ១០នាក់ (ប្រុស), ឥណ្ឌូនេស៊ី ៨នាក់ (ប្រុស), ហ្វីលីពីន ៣នាក់ (ស្រី្ត), ចិន ២នាក់ (ប្រុស), ឥណ្ឌា ២នាក់ (ស្រី្ត ១នាក់), ម៉ាឡេស៊ី ១នាក់ (ប្រុស) ព្រមទាំងជនជាតិខ្មែរចំនួន ២៣នាក់ (ស្រី្ត ១៥នាក់)។

បច្ចុប្បន្ននេះ ជនបរទេសទាំងនោះ ត្រូវបានបញ្ជូនទៅមណ្ឌលកងវ៉ាខេត្ត , ស្នងការដ្ឋាននគរបាលខេត្ត និង នៅអធិការដ្ឋាននគរបាលក្រុងប៉ោយប៉ែត។ ក្នុងនោះដែរសមត្ថកិច្ចបានរឹបអូស និងដកហូតសម្ភារសង្ស័យមួយចំនួនបញ្ជូនទៅស្នងការដ្ឋាននគរបាលខេត្ត ដើម្បីឱ្យជំនាញបន្តនីតិវិធីច្បាប់ ព្រមទាំងបានសម្រេចបិទទីតាំងអគារទាំងពីរជាបណ្តោះអាសន្ន រហូតមានការជូនដំណឹងជាថ្មី។

ករណីមួយនេះមហាជនមានចម្ងល់ថាទីតាំងឆបោកតាមអនឡាញ(scam)នៅក្រុងប៉ោយប៉ែតនិងស្រុកម៉ាឡៃត្រូវបានសមត្តកិច្ចចុះបង្ក្រាបគគ្រឹកគគ្រេចចាប់មនុស្សរាប់ពាន់នាក់ដកហូរសម្ភារៈនិងបិទទីតាំងចុះហេតុម៉េចបានជាបណ្តោយទុកឲ្យទីតាំងរបស់លោកឧត្ដមសេនីយ៍ត្រី​ អ៊ុំ​ សុផល​នៅបន្តសកម្មភាពបានទៀត។មិនដឹងឬជាការបិទភ្នែក?។

ឡូវសូម្បីតែការចុះបង្ក្រាបក៏មិនប្រើកម្លាំងនគរបាលដែរបានន័យថាថ្នាក់លើមិនទុកចិត្តនគរបាលតែម្តង។តើករណីចឹងលោកស្នងការនគរបាលខេត្តបន្ទាយមានជយ័និងលោកឧត្តមសេនីយ៍ជីវផល្លីអគ្គស្នងការរងនគរបាលជាតិដែលដឹកនាំកម្លាំងចុះប្រតិបត្តិការនៅប៉ោយប៉ែតកន្លងមកគិតម៉េចដែរ?