ក្រសួងមហាផ្ទៃ រកឃើញភាពមិនប្រក្រតីនៃចំណាយថវិការឃុំសង្កាត់ក្នុងខេត្តកំពង់ឆ្នាំងចំនួន៥និងណែនាំឱ្យចាត់វិធានការជាបន្ទាន់ លើមន្ត្រីទាំងឡាយណា ដែលគប់គិតគ្នា

ភ្នំពេញ៖ អគ្គនាយកដ្ឋានរដ្ឋបាល ក្រសួងមហាផ្ទៃ បានឲ្យដឹងថា ថ្មីៗនេះ មានការផ្សព្វផ្សាយតាមបណ្តាញសារព័ត៌មាន និងបណ្តាញសង្គមនានាជាច្រើន ពាក់ព័ន្ធភាពមិនប្រក្រតី នៃដំណើរការរៀបចំ និងអនុវត្តគម្រោងមូលនិធិរបស់រដ្ឋបាលឃុំទឹកហូត ស្រុករលាប្អៀរ ខេត្តកំពង់ឆ្នាំង ដែលបង្គោល និងអំពូលសូឡាមានតម្លៃរហូតដល់ ៨,០០០,០០០រៀល ក្នុង១ដើម ដែលតម្លៃនេះខ្ពស់ជាង តម្លៃទីផ្សារហួសហេតុ។ 

តាមសេចក្ដីប្រកាសព័ត៌មាន នៅថ្ងៃទី១២ ខែសីហា ឆ្នាំ២០២៦នេះ បានឲ្យដឹងទៀតថា ពាក់ព័ន្ធនឹងករណីនេះ កន្លងមក អគ្គនាយកដ្ឋានរដ្ឋបាល ក្រសួងមហាផ្ទៃ បានចាត់មន្ត្រីជំនាញឱ្យចុះពិនិត្យស៊ើបអង្កេតស្រាវជ្រាវ ដោយរកឃើញមានភាពមិនប្រក្រតី នៃដំណើរការរៀបចំនិងអនុវត្តគម្រោង មូលនិធិរបស់រដ្ឋបាលឃុំចំនួន៥នៃខេត្តកំពង់ឆ្នាំង ក្នុងនោះក៏មានរដ្ឋបាលឃុំទឹកហូត ស្រុករលាប្អៀរ ខេត្តកំពង់ឆ្នាំងផងដែរ។

ផ្អែកលើមូលដ្ឋាននេះ ក្រសួងមហាផ្ទៃ បានធ្វើការណែនាំដល់រដ្ឋបាលខេត្តកំពង់ឆ្នាំង ឱ្យចាត់វិធានការជាបន្ទាន់លើមន្ត្រីទាំងឡាយណា ដែលមានការពាក់ព័ន្ធគប់គិតគ្នា ក្នុងការរៀបចំ និងអនុវត្តគម្រោងមូលនិធិឃុំ ទាំង៥ខាងលើ មិនបានត្រឹមត្រូវតាមគោលការណ៍ច្បាប់និងនីតិវិធីកំណត់ ដោយត្រូវចាត់វិធានការវិន័យឬ ទណ្ឌកម្មឱ្យបានម៉ឺងម៉ាត់បំផុតស្របតាមច្បាប់និងលិខិតបទដ្ឋានគតិយុត្តជាធរមាន។

សូមបញ្ជាក់ថាដើមហេតុដំបូងគឺចេញពីការរកឃើញរបស់អ្នកកាសែតករណីយ៍គម្រោងអភិវឌ្ឈន៍ឃុំទឹកហូតស្រុករលាប្អៀដែលក្នុងនោះមានការដាក់បង្គោលសូឡា១ដើមតម្លៃ៨លានរៀលខុសពីតម្លៃទីផ្សារច្រើនពេក។ករណីយ៍នេះអភិបាលខេត្តកំពង់ឆ្នាំង លោក ស៊ុន សុវណ្ណារិទ្ធិនៅថ្ងៃទី១១សីហា បានទទួលស្គាល់ថា លោកបានឃើញការរិះគន់ និងការចោទសួររបស់ប្រជាពលរដ្ឋលើករណីនេះ ហើយបានណែនាំឱ្យមន្ត្រីជំនាញចុះទៅសាកសួរ និងប្រមូលព័ត៌មានបន្ថែម ដើម្បីឱ្យដឹងច្បាស់ពីស្ថានភាពជាក់ស្តែង។បន្ទាប់មកនៅព្រឹកថ្ងៃទៅ១២សីហាសម្តេចធិបតីនាយករដ្ឋមន្ត្រីក៏បានប្រកាសចេញពីខេត្តស្ទឹងត្រែងឲ្យស្រាវជ្រាវរកករណីយ៍បង្គោលសូឡា១ដើមតម្លៃ៨លានរៀលនេះផងដែរ។

លោកអភិបាលខេត្តបានលើកឡើងថា តាមការយល់ឃើញតម្លៃ ៨លានរៀលសម្រាប់បង្គោលភ្លើងសូឡាមួយដើម ហាក់មិនសមទំនងគ្នា ប៉ុន្តែថា មុននឹងចាត់វិធានការយ៉ាងណា លោករង់ចាំលទ្ធផលពីការចុះពិនិត្យ និងសាកសួរជាមុនសិន។