មេគុកព្រៃស រងការចោទពីម្ចាស់គណនី«កញ្ចក់សង្គម»ថាបានគប់គិតឱ្យទណ្ឌិត ស្រី ស៊ីណាចេញទៅ សម្រាកនៅពេទ្យរុស្ស៊ីសាម៉ីខ្លួនបដិសេធចាត់ទុកថាជាឯកសារក្លែងក្លាយ!

ភ្នំពេញ៖រឿងភ្ញាក់ផ្អើលនេះកើតឡើងកណ្តាលយប់ដោយមានគណនីទើបបង្កើតថ្មី មួយឈ្មោះថា «កញ្ចក់សង្គម» បានផុសរូប និងហៅឈ្មោះរបស់ លោក នុត សវនា ប្រធានពន្ធនាគារព្រៃស(ម១) ចំៗ និងបានភ្ជាប់ជាមួយរូបទណ្ឌិត ស្រី ស៉ីណា រួមជាមួយលិខិត២ច្បាប់ ពោលជាលិខិតសំណើរបញ្ចូនអ្នកជំងឺទៅសង្គ្រោះបន្ទាន់ នៅមន្ទីពេទ្យមិត្តភាពខ្មែរសូវៀត អ្នកជំងឺ(ជនជាប់ឃុំ) ឈ្មោះ ស្រី ស៉ីណា ភេទប្រុស អាយុ៥៤ឆ្នាំ ពីបទឃាតកម្ម កម្រិតទោស៣១ឆ្នាំ ដោយរោគវិនិច្ឆ័យរបស់មន្រ្តីពេទ្យមណ្ឌលអប់រំកែប្រែទី១បញ្ជាក់ថា មានជំងឺមហារីក និងបន្តចោទថា លោក នុត សវនា បានរៀបចំផែនការធ្វើរបាយការណ៍កុហកថ្នាក់ដឹកនាំដើម្បីស្នើសុំ ព្រះរាជក្រឹត្យលើក លែង ទោសក្រោមលក្ខខណ្ឌមនុស្សធម៌ ។ 

ម្ចាស់គណនីខាងលើបន្ថែមថា ៖ សំណួរសុំសួរថាតើឯកសារលោកមេគុកព្រៃសចុះ ហត្ថលេខា និង វ៉ៃត្រាមិនចុះ កាលបរិច្ឆេទ នេះវាត្រូវតាមច្បាប់ស្របតាមបទដ្ឋានគតិយុត្តិ បែបបទរដ្ឋបាលសារធារណៈដែរឬទេ ? ដោយជំងឺមហារីក របស់ទណ្ឌិតស្រី សុីណា រូបនេះវេជ្ជបណ្ឌិតមួយណាជាអ្នកបញ្ជាក់ ឬ ថ្លើមធំរំលោភអំណាចដោយខ្លួនឯង ។ ចំពោះករណីនេះខ្ញុំបាទសូមឲ្យសម្ដេចពុក និងសម្ដេចធិបតីផ្ដល់មេរៀនឱ្យមេគុករូបនេះ ជាពិសេស អង្គភាពពាក់ព័ន្ធ អង្គភាពប្រឆាំងអំពើពុក រលួយក្រសួងសុខាភិបាល ក្រសួងអធិការកិច្ច ក្រសួងយុត្តិធម៌និង ក្រសួងមហាផ្ទៃ មេត្តាចាត់វិធានការឲ្យបានតឹងរឹង ។លោក នុត សវនា អគ្គនាយករង និងជាប្រធានមណ្ឌលអប់រំកែប្រែទី១(ពន្ធនាគារព្រៃស) បានចេញមកបញ្ជាក់តាមរយៈទំព័រហ្វេសប៊ុករបស់លោកថា ការលើកឡើងរបស់គណនីហ្វេសប៊ុកឈ្មោះ «កញ្ចក់សង្គម» គឺជាការបំភ្លៃខុសពីការពិត។ លោកបញ្ជាក់ដោយខ្លីថា ទណ្ឌិត ស្រី ស៊ីណា មិនត្រូវបានបញ្ជូនទៅព្យាបាលនៅមន្ទីរពេទ្យក្រៅពន្ធនាគារឡើយ។

សូមជម្រាបថា ទណ្ឌិត ស្រី ស៊ីណា គឺជាឃាតករដែលបានបាញ់សម្លាប់ទៅលើគូដណ្តឹង២នាក់ គឺលោក ឡុង លីសុង អាយុ២៧ឆ្នាំ និងកញ្ញា ឃិន កញ្ចនា អាយុ២៦ឆ្នាំ ខណៈមនុស្ស២នាក់ផ្សេងទៀតរងរបួសនៅខណ្ឌច្បារអំពៅ រាជធានីភ្នំពេញ កាលពីរសៀលថ្ងៃទី១៧ ខែមិថុនា ឆ្នាំ២០២៤។ ករណីនេះ តុលាការបានផ្តន្ទាទោសទណ្ឌិតខាងលើរយៈពេល៣១ឆ្នាំ និងបង្គាប់ឱ្យសងសំណង២លានដុល្លារដល់ឪពុកម្ដាយជនរងគ្រោះដែលបានបាត់បង់ជីវិត និងសងសំណង៥០ម៉ឺនដុល្លារដល់អ្នករងរបួស។

សូមបញ្ជាក់ថាករណីអ្នកទោសមិនដេកគុកហើយទៅដេកពេទ្យមិនមែនទើបកើតលើកនេះទេ។ឧទាហរណ៍ករណីអតីតឧកញ៉ាគិតធាងដែលជាម្ចាស់ក្លឹបរ៉ុកដែលជាប់ពាក់ពន្ធការមានអាវុធខុសច្បាប់និងគ្រឿងញៀនក៌លោកមិនបានដេកគុកដែររហូតដល់ពេលកាត់ទោសជាប់តែ៤ឆ្នាំហើយព្យួរទៀត។ចឹងហើយបានជាឃើញលិខិតដែលលោកនុតសវនាថាក្លែងក្លាយមនុស្សជាច្រើនរសើប។ឡូវលោកនុតសវនាចេញមកបដិសេធថាក្លែងក្លាយមិនដឹងថាតើមានខាងណាមកអះអាងបន្ថែមថាវាក្លែងក្លាយមែន?។