បន្ទាប់ពីការវាយប្រហារលើទីក្រុងកៀវអ៊ុយក្រែន វាយបកទ្រង់ទ្រាយធំវិញ! មួយយប់ដល់ព្រឹក ដ្រូន ជាង ៤០០គ្រឿង ហោះសំដៅចូល ទីក្រុងមូស្គូ

ប្រទេសរុស្ស៊ី៖អភិបាលក្រុងមូស្គូ បានបង្ហាញទិន្នន័យថា ដ្រូនអ៊ុយក្រែន ជាង៤០០គ្រឿង បានហោះសំដៅមកវាយប្រហាររដ្ឋធានីរបស់ប្រទេសរុស្ស៊ី ពេញមួយយប់ដល់ព្រឹក ប៉ុន្តែក្នុងនោះ ដ្រូនភាគច្រើន ត្រូវស្ទាក់ជាប់ និងបាញ់កម្ទេចចោល។ 

ទូរទស្សន៍ RT បានដកស្រង់សម្តីអភិបាលក្រុងមូស្គូ លោក Sergey Sobyanin ដែលបញ្ជាក់ថា ការវាយប្រហារដោយហ្វូងដ្រូននេះ កើតឡើងពីចន្លោះម៉ោង ៨:៣០នាទីយប់ថ្ងៃអាទិត្យ ទី១៩ ដល់ម៉ោង ៥ព្រឹកថ្ងៃចន្ទ ទី២០ ខែកក្កដា។ទោះមិនបញ្ជាក់ថា តើមានដ្រូនប៉ុន្មានគ្រឿង ហោះធ្លាយចូលទៅវាយប្រហារបានដល់ទីក្រុងមូស្គូ ប៉ុន្តែលោក Sobyanin ប្រាប់ថា ដ្រូនភាគច្រើនត្រូវស្ទាក់ចាប់បាននៅពីចម្ងាយ ខណៈ ៨៥គ្រឿង ត្រូវបាញ់កម្ទេចពេលមកដល់ជិត រដ្ឋធានី។

កាលពីថ្ងៃសៅរ៍ រុស្ស៊ីក៏ប្រកាសដែរថា ដ្រូនអ៊ុយក្រែន បានសម្លាប់មនុស្ស ៨នាក់ និងជាង ៦០នាក់ទៀតត្រូវរបួស ក្នុងការវាយប្រហារទូទាំងប្រទេស ជាពិសេសបានកំណត់គោលដៅលើហេដ្ឋារចនាសម្ព័ន្ធថាមពល។យោងតាមការបញ្ជាក់ពីមន្ត្រីរុស្ស៊ី, ឃ្លាំងទំនិញខ្នាតយក្សចំនួនពីរ របស់ក្រុមហ៊ុនលក់ទំនិញអនឡាញឈានមុខ Wildberries ត្រូវដ្រូនអ៊ុយក្រែន វាយប្រហារ ហើយដ្រូន ក៏ទម្លាក់គ្រាប់លើដេប៉ូស្តុកប្រេងមួយកន្លែង នៅក្នុងទីក្រុង Noginsk ដែលស្ថិតនៅភាគខាងជើងទីក្រុង Elektrostal ផងដែរ។

តាមសេចក្តីរាយការណ៍របស់ NPR, ការវាយប្រហារនោះ បង្កជាអគ្គិភ័យឆាបឆេះយ៉ាងសន្ធោសន្ធៅ និងបង្ខំឲ្យមានការជម្លៀស មនុស្សជាបន្ទាន់ ចេញពីមន្ទីរពេទ្យសម្ភព និងអគារស្នាក់នៅរបស់ប្រជាពលរដ្ឋ ដែលស្ថិតនៅក្បែរនោះ។

ការវាយបកនេះបានកើតឡើងបន្ទាប់ពី មន្ត្រីអ៊ុយក្រែនបានប្រកាសនៅថ្ងៃទី១៩ ខែកក្កដា ថា រុស្ស៊ីបានបើកការវាយប្រហារដោយមីស៊ីលបាលីស្ទិកដ៏ធំបំផុតរបស់ខ្លួនប្រឆាំងនឹងប្រទេសនេះចាប់តាំងពីជម្លោះបានចាប់ផ្តើម។ប្រធានាធិបតីអ៊ុយក្រែន លោក Volodymyr Zelensky បានថ្លែងថា រុស្ស៊ីបានបាញ់មីស៊ីលជាង ៤០ គ្រាប់នៃប្រភេទផ្សេងៗគ្នា ដែលភាគច្រើនកំណត់គោលដៅរដ្ឋធានីគៀវ រួមជាមួយនឹងយន្តហោះគ្មានមនុស្សបើកវាយប្រហារជាង ១២០ គ្រឿង។

កងទ័ពអាកាសអ៊ុយក្រែនបាននិយាយថា ការការពារដែនអាកាសរបស់ខ្លួនបានបាញ់ទម្លាក់មីស៊ីលចំនួន ១៨ គ្រាប់ក្នុងចំណោម ៤១ គ្រាប់ និងយន្តហោះគ្មានមនុស្សបើកចំនួន ១០៨ គ្រឿងក្នុងចំណោម ១២៥ គ្រឿងដែលបាញ់ដោយរុស្ស៊ីកាលពីយប់មិញ ។

អាវុធដែលនៅសល់ – មីស៊ីលចំនួន ២៣ គ្រាប់ និងយន្តហោះគ្មានមនុស្សបើកចំនួន ១០ គ្រឿង បានវាយប្រហារទីតាំងចំនួន ២០ ភាគច្រើននៅក្នុងរដ្ឋធានីគៀវ។ មុននេះ អ្នកយកព័ត៌មាននៅកន្លែងកើតហេតុបានរាយការណ៍ពីការផ្ទុះជាច្រើនលើកច្រើនសារនៅទីក្រុងគៀវ ចាប់ពីល្ងាចថ្ងៃទី១៨ ខែកក្កដា រហូតដល់ព្រឹកព្រលឹមថ្ងៃទី១៩ ខែកក្កដា (ម៉ោងក្នុងស្រុក)។

កាសែត The Kyiv Independent បានរាយការណ៍ថា “ការផ្ទុះជាបន្តបន្ទាប់ជាច្រើនលើកច្រើនសារបានបន្លឺឡើងនៅក្នុងរដ្ឋធានីគៀវ នៅម៉ោងប្រហែល ១:៣០ ព្រឹក ថ្ងៃទី១៩ ខែកក្កដា ខណៈពេលដែលស៊ីរ៉ែនវាយប្រហារតាមអាកាសបានបន្លឺឡើងពាសពេញភាគកណ្តាល និងខាងកើតអ៊ុយក្រែន។ នៅម៉ោងប្រហែល ១:៤៧ ព្រឹក អ្នកយកព័ត៌មាននៅកន្លែងកើតហេតុបានថតសំឡេងផ្ទុះជាបន្តបន្ទាប់ទៀត”។

ទីក្រុងគៀវបានបញ្ជាក់ថា ការវាយប្រហារដោយមីស៊ីលផ្លោងជាច្រើនគ្រាប់ត្រូវបានតម្រង់ឆ្ពោះទៅរដ្ឋធានីចាប់ពីម៉ោង ១:២៤ ព្រឹក រហូតដល់ម៉ោងប្រហែល ២:៣៨ ព្រឹក។ នៅម៉ោងប្រហែល ១០ ព្រឹកថ្ងៃដដែលនោះ យន្តហោះគ្មានមនុស្សបើកបានបន្តការវាយប្រហាររបស់ពួកគេលើតំបន់នោះ៕