នាយករដ្ឋមន្ត្រីផ្តល់ដំបូន្មានដល់សហភាពសហព័ន្ធយុវជនកម្ពុជា
26-February-2023 / ផ្សេងៗ
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ ផ្តាំផ្ញើទៅយុវជនថា ត្រូវបន្តរួមចំណែកការពារនូវសន្តិភាព ស្ថេរភាពនយោបាយ កុំឱ្យរឿងរ៉ាវអតីតកាលត្រឡប់មកវិញ ទោះតម្លៃណាក៏ដោយកុំឱ្យបដិវត្តន៍ពណ៌កើតមាននៅកម្ពុជា។
នៅក្នុងឱកាស អញ្ជើញជាអធិបតីបិទមហាសន្និបាត តំណាងទូទាំងប្រទេស លើកទី៤ របស់សហភាពសហព័ន្ធយុវជនកម្ពុជា (ស.ស.យ.ក) នៅសណ្ឋាគារសុខាភ្នំពេញនៅរសៀលថ្ងៃទី២៧ ខែវិច្ឆិកា ឆ្នាំ២០១៨សម្តេចតេជោ ហ៊ុន សែន បញ្ជាក់ថា៖ «កិច្ចការសំខាន់តែពីរទេ ដែលក្តាប់វាឱ្យជាប់ក្នុងដៃជាផែទីចង្អុលផ្លូវ៖ទី១ គឺបន្តរួមចំណែកការពារនូវសន្តិភាព ស្ថិរភាពនយោបាយ កុំឱ្យរឿងរ៉ាវអតីតកាលវិលត្រឡប់មកវិញ។ រឿងនេះគឺជារឿងដាច់ខាត តម្លៃណាក៏ដោយត្រូវធ្វើ កុំឱ្យបដិវត្តន៍ពណ៌កើតនៅកម្ពុជាឱ្យសោះ»។
សម្តេចតេជោ ហ៊ុន សែន បានបន្តថា គ្មានការទទួលបានផលប្រយោជន៍ណាមួយដោយមិនបានបង់ថ្លៃនោះទេ គឺមានតែពួកប្រឆាំងផ្គាប់មុខតែប៉ុណ្ណោះដែលដេករងចាំស្រមើលស្រមៃទទួលផលពីការដួលរលំនៃរដ្ឋអំណាចរបស់សម្តេច។ ប៉ុន្តែពួកអ្នកទន្ទឹងរង់ចាំពីការដួលរលំ នៃរបបសម្តេចព្រះនរោត្តម សីហនុ ក៏សុទ្ធតែទទួលបានការបរាជ័យរួចទៅហើយ ហើយអ្នកដែលទន្ទឹងរងចាំការដួលរលំរបស់របប លន់ ណុល ក៏ទទួលបរាជ័យរួចទៅហើយ អ្វីដែលយើងទទួលបានគឺតែងតែទទួលបាននូវការបង់ថ្លៃជានិច្ចគ្រាន់តែតិច ឬច្រើនតែប៉ុណ្ណោះ។
សម្តេចតេជោ ហ៊ុន សែន បានរំលឹកថា ទម្រាំមានថ្ងៃនេះ មានមនុស្សស្លាប់ច្រើនណាស់ ដើម្បីជាតិមាតុភូមិកម្ពុជា គឺស្លាប់ដោយទទួលរង នូវអំពើព្រៃផ្សៃបំផុត គឺដោយសារគេវ៉ៃ គេបាញ់ និងទម្លាក់គ្រាប់បែកគ្រប់បែបយ៉ាង ប៉ុន្តែមានមួយប៉ែកស្លាប់ដោយសារកាលះបង់ ដើម្បីការពារសេចក្តីសុខជូនប្រជាជន ដើម្បីការរស់រានមានជីវិត។ ហើយសម្តេចបានយកជីវិតរបស់សម្តេច ទៅប្តូរយកនូវស្ថានភាពដូចពេលបច្ចុប្បន្ននេះ។
សម្តេចតេជោនាយករដ្ឋមន្ត្រីកម្ពុជា ក៏បានអំពាវនាវដល់យុវជនឱ្យបន្តរួមគ្នាប្រឹងប្រែងជួយអភិវឌ្ឍន៍សេដ្ឋកិច្ច និងសង្គម និងមិនត្រូវយកអធិបតេយ្យជាតិទៅដោះដូរជាមួយជំនួយនោះឡើយ។សម្តេចតេជោ ហ៊ុន សែន បានបញ្ជាក់ថា៖ «ខ្ញុំបញ្ជាក់សារជាថ្មីកម្លាំងប្រដាប់អាវុធ និងរដ្ឋបាលស៊ីវិលអព្យាក្រឹត បានតែចំពោះមុខគណបក្សនយោបាយទេ តែមិនអនុញ្ញាតិឱ្យអព្យាក្រឹតរវាងរដ្ឋាភិបាល ជាមួយគណបក្សនយោបាយ ដែលប៉ុនប៉ង់ ផ្តួររំលំ គេបង្កើតកម្លាំងប្រដាប់អាវុធ និងរដ្ឋបាលដើម្បីការពាររដ្ឋឡើយ សូមកុំភាន់ច្រឡំលើចំណុចនេះឱ្យសោះ»។
សម្តេចតេជោ ហ៊ុន សែន ណែនាំថា សូមកុំខ្លាចចំពោះក្រុមអ្នកប្រឆាំង ព្រោះបើមិនប្រឆាំង គឺមិនមែនឈ្មោះជាអ្នកប្រឆាំងនោះឡើយ ប៉ុន្តែប្រឆាំងយ៉ាងណាក៏ដោយត្រូវតែគោរ និងឱ្យតម្លៃលើផលប្រយោជន៍របស់ប្រជាពលរដ្ឋជាធំ ដើម្បីភាពរីកចម្រើនរបស់ប្រជាតិទាំងមូល ហើយសកម្មភាពប្រឆាំងណាមួយក៏ត្រូវតែដាក់គោលការណ៍ឱ្យបានច្បាស់លាស់ មិនមែននាំគ្នាប្រឆាំង ដើម្បីតែប្រយោជន៍បុគ្គលណាមួយនោះទេ។
សម្តេចតេជោ ក៏បានផ្តាំដល់យុវជនថា ចាប់អ្វីត្រូវចាប់ឱ្យប្រាកដ ហើយត្រូវពង្រឹងសមត្ថភាពខ្លួនងើបឡើង ក្នុងនាមជាប្រជាជាតិស្មើមុខ ស្មើមាត់ជាមួយប្រជាជាតិដទៃ។ សម្តេចតេជោ នាយករដ្ឋមន្ត្រីកម្ពុជា ក៏បានផ្តាំផ្ញើទៅយុវជនខ្មែរទាំងអស់កុំឆ្វេងកុំស្តាំ ត្រូវរកចំណុចកណ្តាលមួយ ដើម្បីភាពជោគជ័យរបស់ខ្លួន ស្របតាមភាពឈ្លាសវ៉ៃរបស់ខ្លួនមាន នៅក្នុងសម័យឌីជីផលនេះ៕
