ចិនប្រកាសពីការបន្តគំនិតផ្តួចផ្តើមខ្សែក្រវាត់ និងផ្លូវ ជាមួយយុទ្ធសាស្ត្របញ្ចកោណ ដើម្បីជំរុញកំណើនសេដ្ឋកិច្ចរយៈពេលវែង របស់កម្ពុជា

ប្រទេសចិន៖កម្ពុជា និងចិន បានឯកភាពកាលពីថ្ងៃសុក្រចុងសប្តារ៍កន្លងមក ក្នុងការតម្រឹម គំនិតផ្តួចផ្តើមខ្សែក្រវាត់ និងផ្លូវ (BRI) ជាមួយ យុទ្ធសាស្ត្របញ្ចកោណ ក្នុងគោលបំណងបង្កើតឱកាសថ្មីៗក្នុងវិស័យហេដ្ឋារចនាសម្ព័ន្ធ ឧស្សាហកម្ម កសិកម្ម បច្ចេកវិទ្យាឌីជីថល និងការអភិវឌ្ឍធនធានមនុស្ស ព្រមទាំងពង្រឹងបន្ថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។ 

លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោក ស៊ុន ចាន់ថុល ឧបនាយករដ្ឋមន្ត្រី និងអនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) បានជួបពិភាក្សាជាមួយលោក Wang Yi ប្រធានការិយាល័យគណៈកម្មការកិច្ចការបរទេស នៃគណៈកម្មាធិការមជ្ឈិមបក្សកុម្មុយនីស្តចិន និងជារដ្ឋមន្ត្រីការបរទេស។កិច្ចពិភាក្សានេះបានធ្វើឡើងនៅក្រៅកិច្ចប្រជុំផ្លូវការ ក្នុងឱកាសដំណើរទស្សនកិច្ចផ្លូវការរបស់លោក ហ៊ុន សែន ប្រធានព្រឹទ្ធសភា ទៅកាន់ប្រទេសចិន ចាប់ពីថ្ងៃទី២៥ ដល់ថ្ងៃទី២៧ ខែមិថុនា។

លោក ស៊ុន ចាន់ថុលឧបនាយករដ្ឋមន្ត្រី និងលោក Wang Yiរដ្ឋមន្ត្រីការបរទេសចិន ក៏ជាសហប្រធាន គណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន ផងដែរ។ ឯកអគ្គរាជទូតកម្ពុជាប្រចាំប្រទេសចិន លោក Wang Wenbin ឯកអគ្គរដ្ឋទូតចិនប្រចាំកម្ពុជា និងលោក គង់ វិមាន អគ្គលេខាធិការនៃអគ្គលេខាធិការដ្ឋាន CDCក៏បានវត្តមានក្នុងកិច្ចពិភាក្សា។

យោងតាមលោក ស៊ុន ចាន់ថុល ភាគីទាំងពីរបានគូសបញ្ជាក់ពីសារៈសំខាន់នៃការតម្រឹម គំនិតផ្តួចផ្តើមខ្សែក្រវាត់ និងផ្លូវ របស់ចិន ជាមួយ យុទ្ធសាស្ត្របញ្ចកោណរបស់កម្ពុជា ដែលមានគោលបំណងជំរុញកំណើនសេដ្ឋកិច្ចរយៈពេលវែង ប្រកបដោយចីរភាព និងបរិយាបន្ន។

ការតម្រឹមគោលនយោបាយទាំងពីរនេះ ត្រូវបានរំពឹងថានឹងបង្កើតសន្ទុះថ្មីសម្រាប់កិច្ចសហប្រតិបត្តិការក្នុងវិស័យអាទិភាព រួមមាន ការអភិវឌ្ឍហេដ្ឋារចនាសម្ព័ន្ធ ការពង្រីកវិស័យឧស្សាហកម្ម ការធ្វើទំនើបកម្មវិស័យកសិកម្ម បរិវត្តកម្មឌីជីថល និងការអភិវឌ្ឍធនធានមនុស្ស។

ភាគីទាំងពីរបានបង្ហាញទស្សនៈដូចគ្នាថា ការសម្របសម្រួលគោលនយោបាយឱ្យកាន់តែស៊ីសង្វាក់គ្នារវាងក្របខណ្ឌទាំងពីរ នឹងបង្កើតឱកាសថ្មីៗដែលមានសក្តានុពលខ្ពស់ និងពង្រឹងបន្ថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន។តាមសេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិអំពីលទ្ធផលដំណើរទស្សនកិច្ចរបស់សម្តេចតេជោ លោក ប្រាក់ សុខុន ក៏បាយវាយតម្លៃខ្ពស់ចំពោះជោគជ័យដ៏ត្រចះត្រចង់នៃ កិច្ចសន្ទនាយុទ្ធសាស្ត្រ ២+២ កម្ពុជា-ចិន លើកទី១ ដែលបានធ្វើឡើងនៅរាជធានីភ្នំពេញ កាលពីថ្ងៃទី២២ ខែមេសា។

សេចក្តីប្រកាសបានបញ្ជាក់ថា កម្ពុជានៅតែប្តេជ្ញាចិត្តយ៉ាងមុតមាំក្នុងការធ្វើការយ៉ាងជិតស្និទ្ធជាមួយចិន ដើម្បីពង្រីកទំនាក់ទំនងទ្វេភាគី ពង្រឹងមិត្តភាពដែកថែប និងលើកកម្ពស់ផលប្រយោជន៍រួមសម្រាប់ប្រជាជននៃប្រទេសទាំងពីរ។

ឮលោក Guo Jiakun អ្នកនាំពាក្យក្រសួងការបរទេសចិន លោក Wang Yi បានមានប្រសាសន៍ថា ប្រទេសចិននឹងបន្តធ្វើជាសសរស្តម្ភយុទ្ធសាស្ត្រដ៏រឹងមាំ ដៃគូសហប្រតិបត្តិការដែលអាចទុកចិត្តបាន និងជាមិត្តដែកថែបដែលមានជោគវាសនារួមជាមួយកម្ពុជា។សូមបញ្ជាក់ថាទម្រាំបានលទ្ធផលខាងលើកម្ពុជាបានបំពេញបំណងប្រទេសចិនជាច្រើនក្នុងនោះគឺការបង្ក្រាបការឆបោកតាមអនឡាញដោយចាប់បញ្ជូនមេក្លោងនិងជនជាតិចិនរាបើពាន់នាក់ដែលមកប្រើប្រាសប្រទេសកម្ពុជាប្រព្រឹត្តបទល្មើស។ករណីយ៍នេះទទួលបានការសាទរពីមេដឹកនាំកំពូលចិនគឺលោកស៊ីជិងពីង។