សមត្តកិច្ចវៀតណាម បង្ក្រាបសិប្បកម្មចំនួន ៣ កន្លែងក្នុងពេលដំណាលគ្នា ដែលប្រើប្រាស់សារធាតុគីមីពុលផលិតសណ្តែកបណ្តុះជាង ១​ ០០០ តោន លក់ចែកចាយលើទីផ្សារនៅក្រុងហូជីមិញ

វៀតណាម៖នៅថ្ងៃទី០១ ខែមិថុនា ឆ្នាំ២០២៦ គណៈកម្មាធិការនគរបាលទីក្រុងហូជីមិញ បានបង្ក្រាបសិប្បកម្មចំនួន ០៣ កន្លែង ក្នុងសង្កាត់ Thong Tay Hoi ពាក់ព្ធ័និងការប្រើប្រាស់សារធាតុគីមីបង្កការប៉ះពាល់សុខភាពក្នុងការផលិតសណ្តែកបណ្តុះ ដោយរកឃើញធុងជ័រខ្នាតធំចំនួន ៨៦០ធុង និងសារធាតុគីមីហាមឃាត់រាប់រយលីត្រ។ 

ក្រុមជនសង្ស័យ បានប្រើប្រាស់សារធាតុគីមីដើម្បីផលិតសណ្តែកបណ្តុះប្រមាណ ១ ០០០ តោន លក់ចែកចាយទៅលើទីផ្សារ ដែលបង្កផលប៉ះពាល់យ៉ាងធ្ងន់ធ្ងរដល់សុខភាពអ្នកប្រើប្រាស់។

ជនសង្ស័យចំនួន ០៤នាក់ ត្រូវបានចាប់ខ្លួន និងចោទប្រកាន់ជាផ្លូវការពីបទ «រំលោភលើបទប្បញ្ញត្តិសុវត្ថិភាពចំណីអាហារ» យោងតាមមាត្រា ៣១៧ នៃច្បាប់ព្រហ្មទណ្ឌវៀតណាម រួមមាន៖ឈ្មោះ Luu Van Thiep ឈ្មោះ Lam Van Hung ឈ្មោះ Nguyen Van Dinh និងឈ្មោះ Tran Van Nghia។

ក្រុមជនសង្ស័យ បានប្រើប្រាស់សារធាតុគីមីហាមឃាត់ 6-Benzylaminopurine លាយត្រាំសណ្តែកបណ្តុះ ដើម្បីឱ្យដើមធំថ្លោស គ្មានឫស និងស្រស់ស្អាត។ បើកដំណើរការតាំងពីឆ្នាំ២០២២ មក សិប្បកម្មទាំងនេះ ក្នុងមួយថ្ងៃៗបានផលិត បញ្ចេញលក់ប្រមាណ ៣តោន ទៅកាន់ផ្សារ និងហាងអាហារក្នុងខណ្ឌ Binh Thanh និង Go Vap ហើយចំនួនលក់ចេញសរុបមានលើសពី ១ ០០០តោន គិតជាទឹកប្រាក់ប្រហែលជិត ៣២ម៉ឺនដុល្លារ។

សូមជម្រាបជូនថា សារធាតុគីមីនេះអាចបង្កឱ្យពុលស្រួចស្រាវ រំខានប្រព័ន្ធរំលាយអាហារ ពិបាកដកដង្ហើម ខូចសួត និងអាចធ្វើឱ្យទារកក្នុងផ្ទៃពិការ ឬកើតជំងឺធ្ងន់ធ្ងរក្នុងរយៈពេលវែង។ បច្ចុប្បន្ន សមត្ថកិច្ចវៀតណាម កំពុងបន្តបើកការស៊ើបអង្កេតបន្ថែម ដើម្បីចាត់វិធានការតាមផ្លូវច្បាប់៕