ដំណើររឿង នៃការទទួលបានសញ្ជាតិខ្មែរ គោរមវន្ដអ្នកឧកញ៉ា និងតំណែងទីប្រឹក្សាក្រសួង-ថ្នាក់ដឹកនាំកម្ពុជា របស់អ្នកជំនួញជនជាតិចិន ឈ្មោះ ចេន ហ្ស៊ី (Chen Zhi)

ភ្នំពេញ៖ហ្វេសប៊ុកមួយឈ្មោះLUYបានបង្ហាញភស្តុតាងមួយចំនួនអំពីដំណើររឿងដែលឧក្រឹដ្ឋជនឆបោកតាមអនឡានកំរឹតអន្តរជាតិមានវត្តមាននៅកម្ពុជាហើយទទួលបានការគាំទ្រពីថ្នាក់ដឹកនាំកម្ពុជា៖ 

១-ខែកុម្ភៈ ឆ្នាំ២០១៤ ៖ លោក ចេន ហ្ស៊ី (Chen Zhi) ជនជាតិចិន សញ្ជាតិចិន កើតថ្ងៃទី១៦ ខែធ្នូ ឆ្នាំ១៩៨៧ នៅខេត្តហ្វូចៀន សាធារណរដ្ឋប្រជាមានិតចិន ទទួលបានការត្រាស់បង្គាប់ផ្ដល់សញ្ជាតិខ្មែរ តាមសញ្ជាតូបនីយកម្ម ដោយព្រះរាជក្រឹត្យលេខ នស/រកត/០២១៤/២០៩ ចុះថ្ងៃទី១៧ ខែកុម្ភៈ ឆ្នាំ២០១៤ ។

២-ខែកុម្ភៈ ឆ្នាំ២០១៦ ៖ លោក ចេន ហ្ស៊ី ដែលជាប្រធានក្រុមប្រឹក្សាភិបាលក្រុមហ៊ុន Prince Holding Group ទទួលបានការត្រាស់បង្គាប់តែងតាំងជា ឧកញ៉ា ដោយព្រះរាជក្រឹត្យលេខ នស/រកត/០២១៦/១៧៨ ចុះថ្ងៃទី១១ ខែកុម្ភៈ ឆ្នាំ២០១៦ ។

៣-ខែកុម្ភៈ ឆ្នាំ២០១៧ ៖ លោក ចេន ហ្ស៊ី ទទួលបានការត្រាស់បង្គាប់តែងតាំង និងផ្ដល់ឋានៈជា ទីប្រឹក្សាក្រសួងមហាផ្ទៃ មានឋានៈស្មើ អនុរដ្ឋលេខាធិការ ដោយពុំទទួលប្រាក់បៀវត្ស ដោយព្រះរាជក្រឹត្យលេខ នស/០២១៧/១៨៧ ចុះថ្ងៃទី២៣ ខែកុម្ភៈ ឆ្នាំ២០១៧ ពោលគឺមានឋានៈជា «ឯកឧត្តម» ។

៤-ខែធ្នូ ឆ្នាំ២០១៩ ៖ ឯកឧត្តម ចេន ហ្ស៊ី ទទួលបានការត្រាស់បង្គាប់តែងតាំង និងផ្ដល់ឋានៈជា ទីប្រឹក្សាសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ មានឋានៈស្មើ រដ្ឋលេខាធិការ ដោយពុំទទួលប្រាក់បំណាច់មុខងារ ដោយព្រះរាជក្រឹត្យលេខ នស/រកត/១២១៩/១៨០២ ចុះថ្ងៃទី០៥ ខែធ្នូ ឆ្នាំ២០១៩ ។

៥-ខែឧសភា ឆ្នាំ២០២០ ៖ ឯកឧត្តម ចេន ហ្ស៊ី ទទួលបានការត្រាស់បង្គាប់តែងតាំង និងផ្ដល់ឋានៈជា ទីប្រឹក្សាសម្ដេចអគ្គមហាពញាចក្រី ហេង សំរិន ប្រធានរដ្ឋសភា នីតិកាលទី៦ មានឋានៈស្មើ រដ្ឋមន្ដ្រី ដោយព្រះរាជក្រឹត្យលេខ នស/០៥២០/៥២១ ចុះថ្ងៃទី១៥ ខែឧសភា ឆ្នាំ២០២០ ។

៦-ខែមិថុនា ឆ្នាំ២០២០ ៖ ឯកឧត្តម ចេន ហ្ស៊ី ទទួលបានការត្រាស់បង្គាប់តែងតាំង និងផ្ដល់ឋានៈជា ទីប្រឹក្សាផ្ទាល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា មានឋានៈស្មើ រដ្ឋមន្ដ្រី ដោយពុំទទួលប្រាក់បំណាច់មុខងារ ដោយព្រះរាជក្រឹត្យលេខ នស/រកត/០៦២០/៥៩៥ ចុះថ្ងៃទី០៣ ខែមិថុនា ឆ្នាំ២០២០ ។

៧-ខែកក្កដា ឆ្នាំ២០២០ ៖ ឧកញ៉ា ចេន ហ្ស៊ី ទទួលបានការត្រាស់បង្គាប់ផ្ដល់គោរមងារជា អ្នកឧកញ៉ា ដោយព្រះរាជក្រឹត្យលេខ នស/រកត/០៧២០/៧២៣ ចុះថ្ងៃទី១០ ខែកក្កដា ឆ្នាំ២០២០ ។

៨-ខែសីហា ឆ្នាំ២០២៣ ៖ ឯកឧត្តម ចេន ហ្ស៊ី ទទួលបានការត្រាស់បង្គាប់តែងតាំង និងផ្ដល់ឋានៈជា ទីប្រឹក្សាផ្ទាល់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត (បច្ចុប្បន្ន សម្ដេចមហាបវរធិបតី ហ៊ុន ម៉ាណែត) នាយករដ្ឋមន្ដ្រី នៃព្រះរាជាណាចក្រកម្ពុជា មានឋានៈស្មើ រដ្ឋមន្ដ្រី ដោយពុំទទួលប្រាក់បំណាច់មុខងារ ដោយព្រះរាជក្រឹត្យលេខ នស/រកត/០៨២៣/២០៣៣ ចុះថ្ងៃទី២៥ ខែសីហា ឆ្នាំ២០២៣ ។

៩-ខែមេសា ឆ្នាំ២០២៤ ៖ អ្នកឧកញ៉ា ចេន ហ្ស៊ី (Chen Zhi) ទទួលបានការត្រាស់បង្គាប់តែងតាំងជា ទីប្រឹក្សាសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នីតិកាលទី៥ ដោយពុំទទួលប្រាក់បំណាច់មុខងារ ដោយព្រះរាជក្រឹត្យលេខ នស/រកត/០៤២៤/៣៧៩ ចុះថ្ងៃទី១៩ ខែមេសា ឆ្នាំ២០២៤ ។

១០-ខែមករា ឆ្នាំ២០២៦ ៖ ឯកឧត្តម អ្នកឧកញ៉ា ចេន ហ្ស៊ី (Chen Zhi) ត្រូវបានសមត្ថកិច្ចចាប់ខ្លួនដកសញ្ជាតិខ្មែរហើយ បញ្ជូនទៅកាន់សាធារណរដ្ឋប្រជាមានិតចិន ពាក់ព័ន្ធនឹងអំពើឧក្រិដ្ឋកម្មឆ្លងដែន នៅថ្ងៃទី៦ ខែមករា ឆ្នាំ២០២៦ ៕ (ប្រភពហ្វេសប៊ុកLUY)