បន្ទាប់ពីផ្ទុះរឿងអាស្រូវរហូតដកប្រធានជញ្ជីងផ្លូវជាតិលេខ៤មេជញ្ជីងធំបញ្ជាឲ្យឆ្មក់ចាប់បានយានយន្តដឹកជញ្ជូនលើសទម្ងន់ ១៥គ្រឿង

ភ្នំពេញ៖ ចាប់ពីថ្ងៃទី១៧ ដល់ ១៩ ខែឧសភា ឆ្នាំ២០២៦ ក្រោមការបញ្ជាពី លោក សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ និងជាប្រធានក្រុមការងារត្រួតពិនិត្យចល័តចម្រុះ លោក គឹម សាន់ អនុប្រធានក្រុមការងារ លោកម៉ី ម៉ារ៉ាឌី អនុប្រធានក្រុមការងារ និងសមាជិកក្រុមការងារចល័តចម្រុះ សហការជាមួយស្ថានីយជញ្ជីងរាជានុកូល ស្ថានីយកាំពី ស្ថានីយព្រៃព្នៅ ស្ថានីយព្រែកឯង ស្ថានីយបឹងឃុនឆាង ស្ថានីយរំចេក និងស្ថានីយថ្នល់ទទឹងបានចុះត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ បានត្រួតពិនិត្យយានយន្ត និងពិន័យ សរុបចំនួន ១៥គ្រឿង ដែលលើសទម្ងន់អនុញ្ញាតចន្លោះពី ៥តោន ដល់ ២៩តោន។ 

ក្រសួងសាធារណការ និងដឹកជញ្ជូន សូមក្រើនរម្លឹកដល់ម្ចាស់ក្រុមហ៊ុនដឹកជញ្ជូនធុនធ្ងន់ ម្ចាស់យានយន្តដឹកជញ្ជូនធុនធ្ងន់ និងអ្នកបើកបរយានយន្តធុនធ្ងន់ទាំងអស់ សូមចូលរួមគោរពច្បាប់ និងគោរពតម្រាយផ្លូវអនុញ្ញាតសម្រាប់យានយន្តចាប់ពីភ្លៅ៦ឡើង ដែលក្រសួងបានណែនាំឱ្យបានត្រឹមត្រូវ។សូមបញ្ជាក់ថានាថ្ងៃទី២០ ខែឧសភា ឆ្នាំ២០២៦នេះលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានចេញសម្រេចបញ្ចប់មុខតំណែងលោក គង់ សុភាព ពីប្រធានស្ថានីយជញ្ជីងអចល័តថ្នល់ទទឹង ខេត្តត្បូងឃ្មុំ ឱ្យមកបម្រើការងារនៅអង្គភាពដើមវិញដែរតែមិនប្រាប់ថាបញ្ជប់អាណ្ត្តិឬមានកំហុសអ្វីនោះទេ?។សកម្មភាពរបស់លោករដ្ឋមន្ត្រីក្រសួងសាធារណៈការចង់ឬមិនចង់គឺជាសកម្មភាពបោសសំអាតអំពើអសកម្មដែលមនុស្សក្រោមបង្គាប់លោកសេងឈួនបានធ្វើហើយទទួលរងការរិះគន់កន្លងមក។