រន្ទះបាញ់សម្លាប់ជាងថតរូបក្នុងវត្តម្នាក់និងរបួសសង្សារដែលកំពុងលេងកម្សាន្ដថ្ងៃចូលឆ្នាំ

ក្រចេះ៖ករណីរន្ទះបាញ់មួយបានកើតឡើង នាវេលាម៉ោងប្រមាណ ៥និង១៥នាទីល្ងាច ថ្ងៃទី១៥ ខែមេសា ឆ្នាំ២០២៦នៅចំណុចវត្តវិហារធំសរសរ១០០ ស្ថិតក្នុងភូមិសំបូរ ឃុំសំបូរ ស្រុកសំបូរ ខេត្តក្រចេះ បណ្តាលឲ្យបុរសម្នាក់ស្លាប់ និងនារីម្នាក់របួសស្រាល កំពុងសម្រាក់ព្យាបាលនៅមន្ទីរពេទ្យបង្អែកស្រុកសំបូរ។ 

លោក គង់ មេត្តា អភិបាលស្រុកសំបូរ បានឲ្យដឹងនៅព្រឹកថ្ងៃ១៦ ខែមេសា ឆ្នាំ២០២៦ នេះថា នៅមុនពេលកើតហេតុ នៅបរិវេណវត្តព្រះវិហារធំសសរ ១០០ មានកម្មវិធីចុងម៉ោង មានមនុស្សរាំលេងកំសាន្តច្រើន ស្រាប់តែអាកាសធាតុចាប់ផ្ដើមធ្លាក់ខ្យល់ ធ្លាក់ភ្លៀង ហើយជនរងគ្រោះគាត់គឺជាអ្នកកាន់ម៉ាស៊ីនថតឲ្យវត្តផងដែរ។ ពេលម៉ោងប្រមាណជា ៤ ជិត ៥ គាត់ក៏បានចូលមកក្នុងសាលាឆាន់ធំ ដើម្បីទម្លាក់រូបភាពឲ្យលោក ដើម្បីរាយការណ៍ជូនថ្នាក់ដឹកនាំ ពេលទម្លាក់រូបភាពរួចរាល់ ជនរងគ្រោះក៏បានឃើញនារីសង្សាររបស់គាត់កំពុងឈរលក់ម៉្សៅ គាត់ក៏ចេញទៅជួបនិយាយគ្នា និងជ្រកភ្លៀងនៅទីនោះជាមួយមនុស្សយ៉ាងច្រើន ស្រាប់តែពេលនោះ រន្ទះបាញ់ត្រូវតែគាត់ជាមួយសង្សារគាត់។ ដោយពេលនោះ អាកាសធាតុក៏ចាប់ផ្តើមភ្លៀងតែម្តង មានខ្យល់ខ្លាំង ហើយរន្ទះបាញ់តែម្តងគត់ ត្រូវចំគាត់ទាំងពីរនាក់ដែលកំពុងឈរជ្រកភ្លៀង។

ជនរងគ្រោះទាំងពីរនាក់ខាងលើ ទី១-ឈ្មោះ វ៉ាន រតនៈសម្បត្តិ ភេទប្រុស អាយុ២៦ឆ្នាំ មានទីលំនៅ នៅភូមិកោះច្រែង ឃុំកោះច្រែង ស្រុកចិត្របុរី ខេត្តក្រចេះ បានស្លាប់ភ្លាមៗនៅកន្លែងកើតហេតុ។ ទី២.ឈ្មោះ ហុក កញ្ញា ភេទស្រី អាយុ ២៣ឆ្នាំ មានទីលំនៅ នៅភូមិកែងប្រាសាទ ឃុំសំបូរ ស្រុកសំបូរ ខេត្តក្រចេះ បណ្តាលឲ្យរងរបួសស្រាល ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកសំបូរ។ ចំណែកសពជនរងគ្រោះ ឈ្មោះ វ៉ាន រតនៈសម្បត្តិ ត្រូវបានក្រុមគ្រួសារយកទៅធ្វើបុណ្យតាមប្រពៃណី៕