ជនជាតិនាំគ្នាជីកដីរុករករ៉ែអកុសល្យបាក់ដីសង្គត់ស្លាប់២នាក់

ខេត្តមណ្ឌលគិរី៖ ការរុករករ៉ែតាមបែបអនាធិបតេយ្យ ឆក់យកជីវិតមនុស្សជាបន្តបន្ទាប់។ ជាក់ស្តែង កាលពីថ្ងៃទី០៨ ខែមេសា ឆ្នាំ២០២៦ ករណីបាក់ដីសង្កត់មនុស្សក្នុងរណ្តៅរ៉ែ បានកើតឡើងនៅចំណុចអូរតេ ភូមិខ្ទង់ ឃុំស្រែឈូក ស្រុកកែវសីមា បណ្តាលឱ្យបុរស ២ នាក់បាត់បង់ជីវិតភ្លាមៗ។ 

ជនរងគ្រោះមាន១. លោក ក្រូត នីន អាយុ ៦៦ ឆ្នាំ (ជនជាតិព្នង)។២. លោក មុិប លើម អាយុ ៣៧ ឆ្នាំ (ជនជាតិព្នង)។អ្នកទាំងពីរមានទីលំនៅភូមិខ្ទង់ ឃុំស្រែឈូក ស្រុកកែវសីមា ខេត្តមណ្ឌលគិរី។

តាមប្រភពពីសាច់ញាតិបានឱ្យដឹងថា មុនកើតហេតុ ក្រុមជនរងគ្រោះសរុប ៦ នាក់ បានទៅជីករ៉ែមាសតាំងពីព្រឹកព្រលឹម។ លុះដល់ម៉ោងសម្រាកហូបបាយ ជនរងគ្រោះទាំង ២ នាក់ មិនទាន់ឈប់សម្រាកនៅឡើយទេ គឺបន្តជីកកកាយដីក្នុងរណ្តៅរបស់ខ្លួន។

ជាអកុសល នៅវេលាម៉ោង ១២:១០ នាទីថ្ងៃត្រង់ ស្រាប់តែមានសំឡេងស្រែកផ្អើលឆោឡោថា "ដីបាក់សង្កត់ហើយ!"។ ទោះបីជាអ្នកនៅជិតខាងខំប្រឹងជួយកាយដីសង្គ្រោះយ៉ាងណាក៏ដោយ ក៏មិនអាចជួយសង្គ្រោះជីវិតអ្នកទាំងពីរបានដែរ ដោយសារបរិមាណដីបាក់ចុះមកមានទំហំធំពេក។អាជ្ញាធរតែងតែអំពាវនាវឱ្យបងប្អូនប្រជាពលរដ្ឋ បញ្ឈប់សកម្មភាពរុករករ៉ែដោយខុសច្បាប់ និងគ្មានបច្ចេកទេសត្រឹមត្រូវ ព្រោះវាជាហានិភ័យខ្ពស់បំផុតចំពោះអាយុជីវិត។