កម្ពុជាទូលពិតបារាំងរឿងថៃឈ្លានពានតែមិនបានសុំបារាំងឲ្យជួយដូចឆ្នាំ១៩៤៦ទេ!

សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក្នុងអំឡុងជំនួបការងាររវាងថ្នាក់ដឹកនាំនៃប្រទេសទាំងពីរ នៅរសៀលថ្ងៃទី ៨ ខែមេសា ឆ្នាំ២០២៦ នាវិមានប្រធានាធិបតី ក្នុងទីក្រុងប៉ារីស ក្រុងប៉ារិសបានប្រាប់ការពិតចំនួន៣ ចំនុចអំពីសកម្មភាពថៃឈ្លានពានកម្ពុជា ដល់លោក Emmanuel Macron ប្រធានាធិបតីបារាំង ។ 

លោក ហ្សង់ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការបរទេស នៅក្នុងសន្និសីទសារព័ត៌មាន ស្ដីពីការធ្វើមាតុភូមិនិវត្ត របស់សម្ដេចនាយករដ្ឋមន្រ្តី ក្រោយបញ្ចប់ក្នុងកិច្ចប្រជុំកំពូល One Health Summit និងទស្សនកិច្ចការងារ នៅទីក្រុងប៉ារីស ប្រទេសបារាំង នាថ្ងៃទី៩ ខែមេសា ឆ្នាំ២០២៦បានឱ្យដឹងថា នៅក្នុងជំនួបនោះសម្តេចធិបតីបានលើកឡើងពីការពិត ដោយឈរលើគោលការណ៍មួយច្បាស់ នោះគឺកម្ពុជាត្រូវតែផ្សព្វផ្សាយ និងលាតត្រដាងស្ថានភាពនៅតាមបណ្តោយព្រំដែនជាមួយថៃ ដោយមិនបំភ្លើសហួសពីការពិត តែក៏មិនបង្រួមឱ្យតូចជាងការពិតដែរ។ ដូច្នេះសម្តេចក៏បានលើកឡើងនូវចំណុចសំខាន់ៗចំនួន៣។

ចំណុចសំខាន់ទាំង៣នោះរួមមាន៖១.ភាពតានតឹងអចិន្រ្តៃយ៍កំពុងបន្តគ្របដណ្តប់លើបណ្តោយព្រំដែនកម្ពុជា-ថៃ ដោយសារកងទ័ពថៃបានចូលជ្រៅហួសព្រំដែនស្របច្បាប់មកក្នុងទឹកដីកម្ពុជា និងកាន់កាប់ដោយខុសច្បាប់អន្តរជាតិ ថែមទាំងកម្ទេចផ្ទះសម្បែងរបស់ប្រជាជនខ្មែរ និងរារាំងប្រជាជនខ្មែររាប់ម៉ឺននាក់មិនឱ្យត្រឡប់ទៅផ្ទះសម្បែងវិញ និងបានសាងសង់លើដែនដីកាន់កាប់ទាំងអស់នោះដូចជាផ្លូវថ្នល់ និងហេដ្ឋារចនាសម្ព័ន្ធផ្សេងៗ។

ទី២.សម្តេចនាយករដ្ឋមន្រ្តីបានលើកឡើងថា ដាច់ខាត កម្ពុជាមិនទទួលឡើយនូវស្ថានភាព ការកែប្រែខ្សែបន្ទាត់ព្រំដែនដែលខុសច្បាប់អន្តរជាតិ មានន័យថា ទោះបីជាថៃបានឈ្លានពានយកនិងកាន់កាប់ទឹកដីនៅទីតាំងទាំងនោះ ក៏ទឹកដីទាំងនោះនៅតែជាកម្មសិទ្ធិស្របច្បាប់របស់កម្ពុជា។ ទី៣ សម្តេចបានបញ្ជាក់បន្ថែមថា កម្ពុជានៅតែរក្សាជំហរដោះស្រាយជម្លោះព្រំដែនជាមួយថៃ ដោយសន្តិវិធី ផ្អែកលើច្បាប់អន្តរជាតិ សន្ធិសញ្ញាដែលមានស្រាប់ និងគ្រប់កិច្ចព្រមព្រៀង ដែលថៃនិងកម្ពុជា បានចុះហត្ថលេខាជាមួយគ្នា។

សម្រាបលោកប្រធានាធិបតីបារាំងវិញ ក្នុងជំនួបនៅទីក្រុងនីស ប្រទេសបារាំង កាលពីខែមិថុនា លោកប្រធានាធិបតី អេម៉ានុយអែល ម៉ាក្រុង ប្រាប់សម្តេចនាយករដ្ឋមន្ត្រី ហ៊ុន ម៉ាណែត ថា បារាំងអាចជួយសម្របសម្រួលផ្តល់ឯកសារដល់កម្ពុជា និងថៃ ដើម្បីដោះស្រាយជម្លោះព្រំដែនរវាងប្រទេសទាំងពីរ ក្នុងករណីចាំបាច់.។

សូមបញ្ជាក់ថាបើតាមឯកសារនានាបានឲ្យដឹងថាកាលពីឆ្នាំ១៩៤១ដោយមានការគាំទ្រពីជប៉ុនសៀមបានឈ្លានពានកាប់កាប់ខេត្តខេត្តខ្មែរចំនួន៤។ក្រោយមកជប៉ុនចាញ់សង្គ្រាមនៅឆ្នាំ១៩៤៦បារាំងដែលនោះនៅត្រួតត្រាកម្ពុជាបានកៀបសង្កត់សៀមឲ្យប្រគល់ខេត្តទាំង៤មកឲ្យខ្មែរវិញ។