អង្គរក្ស ម្ចាស់ឡានស្លាកលេខ 7171ដែលជា ក្រុមហ៊ុនកាហ្វេល្បីឈានមុខគេមួយត្រូវបាននគរបាលឲ្យមកផ្ទះវិញហើយ

ភ្នំពេញ ៖អង្គរក្សស៊ីវិលទាំង២នាក់ របស់ឧកញ៉ា ធា ទ្រីម្ចាស់ឡានលេខ៧១៧១ ត្រូវបានស្នងការនគរបាលរាជធានីភ្នំពេញ លោកឧត្តមសេនីយ៍ឯក ជួន ណារិន្ទហៅមក អប់រំឲ្យបញ្ឈប់សកម្មភាពទាំងនេះ រួចហើយអនុញ្ញាតឲ្យត្រឡប់ទៅវិញហើយ។លោកឧត្តមសេនីយ៍ស្នងការនគរបាលរាជធានី ក៏បានអំពាវនាវឲ្យអ្នកផ្សេងទៀត បញ្ឈប់សកម្មភាពអសីលធម៌បែបនេះ តាមដងផ្លូវសាធារណ:។ 

សូមបញ្ជាក់ថាឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នាយប់ថ្ងៃទី២៥ ខែវិច្ឆិកា ឆ្នាំ២០២៥នេះ បានដាក់បទបញ្ជាបន្ទាន់ ដល់កម្លាំងជំនាញឲ្យស្រាវជ្រាវតាមស្វែងរកជនស៊ីវិល០២នាក់ ជិះម៉ូតូកាក់រថយន្តពលរដ្ឋ បង្កភាពភ័យខ្លាចលើដងផ្លូវសាធារណៈ យកមកសួរនាំ ។

ឧត្តមសេនីយ៍ស្នងការ បានបង្ហោះលើគណនេយ្យផ្ទាល់ខ្លួនឲ្យដឹងថា ខ្ញុំបាទបានឃើញរូបភាព និងសកម្មភាពបែបនេះ ពិតជាមិនអាចទទួលយកបានទេ ។ ខ្ញុំបានដាក់បទបញ្ជាឱ្យជំនាញកោះហៅមកសួរនាំអំពីសកម្មភាពតាមដងផ្លូវសាធារណៈបែបនេះ ( សូមកុំធ្វើទង្វើលឲមានការភ័យខ្លាចដល់អ្នកធ្វើដំណើរ ) ។

បទបញ្ជារបស់លោកឧត្តមសេនីយ៍ឯកស្នងការធ្វើឡើងបន្ទាប់ពី មានការបង្ហោះចែកចាយនៅលើបណ្តាញទំនាក់ទំនងសង្គម អំពីសកម្មភាព របស់បុរស០២នាក់ ដែលបានជិះម៉ូតូមួយគ្រឿងម៉ាកហុងដាឌ្រីមឌុបគ្នា ហើយជិះទៅកាក់ពីមុខរថយន្តពលរដ្ឋអ្នកដំណើរ និងប្រើពាក្យពេជន៍សម្លុតគំរាមលើអ្នកបើកបររថយន្ត ធ្វើឲ្យមានការភិតភ័យខ្លាច ។

សូមបញ្ជាក់ថាផ្អែកតាមវីឌីអូរដែលបានបែកធ្លាយ អាចបញ្ជាក់បានថា ជនស៊ីវិលទាំង០២ កំពុងព្យាយាមការពារមេកើយរបស់ខ្លួន តាមរយៈការមិនឲ្យយានយន្តដទៃដែលកំពុងធ្វើដំណើរលើដងផ្លូវ អាចចូលទៅក្បែររថយន្តមេកើយរបស់ខ្លួន ដែលជារថយន្តស៊េរីទំនើបមួយគ្រឿងកំពុងធ្វើដំណើរស្របពេលជាមួយគ្នានោះ ។

 តាមបណ្តាញសង្គមមានពលរដ្ឋបានលើកឡើងថា ៖ ខ្ញុំសូមផ្តាំទៅលោកឧកញ៉ា ម្ចាស់ឡានស្លាកលេខ 7171 ជួយលួងអង្គរក្ស២នាក់របស់លោកផង ព្រោះអាចពួកគាត់ដេកមិនលក់យប់នេះ ព្រោះតែទទួលរងការជេរប្រមាថខ្លាំងពេក នៅតាមបណ្តាញសង្គមនៅថ្ងៃនេះ។ពលរដ្ឋ បន្ត ខ្ញុំជឿថា លោកឧកញ៉ា ដែលមានលុយរាប់លាន ហើយដឹកនាំក្រុមហ៊ុនល្បីឈានមុខគេមួុយ (ថៅកែកាហ្វេ) ច្បាស់ជាមិនឲ្យអង្គរក្សរបស់លោក ធ្វើយ៉ាងដូច្នេះឡើយ។

សូមជួយអប់រំ និងតម្រង់ទិសពួកគាត់ផង ដោយខ្ញុំបារម្ភថា ពួកគាត់អាចនាំទុក្ខទោសដល់លោកនៅថ្ងៃណាមួយ បើពួកគាត់ប្រើអំណាចខុសរបៀបបែបនេះ (ឧទាហរណ៍: ពួកគាត់ការពារមេពេក ហើយជ្រុលដៃប្រើហិង្សា និងបទល្មើសណាមួយដាក់រាស្រ្តតាមផ្លូវ តើគិតយ៉ាងណា?)

ខ្ញុំមិនដឹងថា តើកន្លងទៅអង្គរក្សទាំង២នាក់នេះ ធ្វើឲ្យប៉ះសតិអារម្មណ៍ពលរដ្ឋធ្វើដំណើរយ៉ាងណាឡើយ ព្រោះតែការប្រើអំណាចការពារមេបែបនេះ។សូមបញ្ជាក់ថា ៖ ម្ចាស់ រថយន្ត ឈ្មោះ ធាង ទ្រី អាយុ ៥៣ឆ្នាំ ជាថៅកែកាហ្វេ មិនមែន ជា ឧត្ដម មន្ត្រី ទេ ដូច្នេះ សូមបងប្អូន កុំ យល់ច្រលំ ថា រថយន្ត នោះ ជា រថយន្ត អ្នកមាន អំណាច ។