ព្រះមហាក្សត្រ ចក្រភពអង់គ្លេស ដកហូតគោរមងារ និងវិមានពីព្រះអនុជ!

ចក្រភពអង់គ្លេស:ព្រះបរមរាជវាំង បាក់ឃីងហែម (Buckingham) បានឲ្យដឹងនៅថ្ងៃព្រហស្បតិ៍ (៣០ តុលា) ថា ព្រះមហាក្សត្រ ឆាលស៍ (Charles) របស់ចក្រភពអង់គ្លេស បានត្រាស់បង្គាប់ដកហូតគោរមងារជាព្រះអង្គម្ចាស់ និងដំណាក់នៅវិមាន Windsor របស់ម្ចាស់ប្អូនទ្រង់ គឺព្រះអង្គ ម្ចាស់Andrew ចេញពីខ្សែរាជវង្ស ដោយសារតែរឿងអាស្រូវទំនាក់ទំនងជាមួយឧក្រិដ្ឋជនផ្លូវភេទ ជេសហ្រ្វី អ៊ែបស្ទីន (Jeffrey Epstein)។ 

ព្រះអង្គ ម្ចាស់Andrew ព្រះជន្ម ៦៥ព្រះវស្សា គឺជាម្ចាស់ប្អូនរបស់ព្រះមហាក្សត្រ ឆាលស៍ ដែលជាបុត្រាទីពីររបស់ម្ចាស់ក្សត្រី អេលីហ្សាប៊េត ហើយទ្រង់បានស្ថិតក្រោមសម្ពាធកាន់តែខ្លាំងឡើងក្នុងប៉ុន្មានឆ្នាំចុងក្រោយនេះ ជុំវិញពាក្យចចាមអារ៉ាម និងទំនាក់ទំនងជាមួយជនល្មើសផ្លូវភេទ លោក Epstein ដែលបានស្លាប់។ នៅដើមខែតុលានេះ ព្រះអង្គ Andrew ត្រូវបង្ខំឱ្យឈប់ប្រើងារជា Duke of York រួចទៅហើយ។

ឥឡូវនេះ ព្រះមហាក្សត្រ ឆាលស៍ បានសម្រេចព្រះទ័យរបស់ទ្រង់ប្រឆាំងនឹងព្រះអង្គ Andrew ដោយដកហូតគោរមងារទាំងអស់ ហើយបន្សល់ត្រឹមតែនាមធម្មតា Andrew Mountbatten Windsor ។ សេចក្ដីថ្លែងការណ៍របស់បរមរាជវាំង បាក់ឃីងហែម បាននិយាយថា ឥឡូវនេះ ព្រះអង្គ Andrew ត្រូវតែថ្វាយមកវិញនូវរាជដំណាក់ Royal Lodge របស់ទ្រង់ នៃទ្រព្យសម្បត្តិវិមាន Windsor ភាគខាងលិចទីក្រុងឡុងដ្រ៍ ហើយព្រះអង្គនឹងផ្លាស់ទៅគង់នៅវិមានឯកជនជំនួសវិញ លើអចលនទ្រព្យ Sandringham នៅភាគខាងកើតដែនដីអង់គ្លេស។ការសម្រេចព្រះទ័យរបស់ព្រះមហាក្សត្រ ឆាលស៍ គឺជាការជំហានដ៏គួរឱ្យភ្ញាក់ផ្អើលបំផុតមួយប្រឆាំងនឹងខ្សែរាជវង្ស នៅក្នុងប្រវត្តិសាស្ត្រអង់គ្លេសសម័យទំនើប៕