ក្រសួងការពារជាតិបកស្រាយតំបន់ព្រៃចាន់​​អាជ្ញាធរមីនកម្ពុជា​ ចាត់ទុកការប្រើប្រាស់កម្លាំង​ និងច្បាប់សឹករបស់ថៃ​ ជាទង្វើបង្កើនអរិភាព

ភ្នំពេញ៖​ ក្រសួងការពារជាតិនៅ យប់ថ្ងៃទី២២ ខែកញ្ញា ឆ្នាំ២០២៥បានចេញមក បកស្រាយ ប្លង់បង្ហាញទីតាំងភូមិសាស្ត្រ និងបង្គោលព្រំដែន ដែលអ្នកនាំពាក្យរងយោធាថៃ ក៏ដូចជារដ្ឋបាលខេត្តស្រះកែវ និងបណ្តាញព័ត៌មានថៃ យកមកបង្ហាញបន្ទាប់ពីសម្ងំឈឹងជាច្រើនថ្ងៃក្រោមលេសថាមានកិច្ចព្រមព្រៀងភាគីទាំងពីរឲ្យរក្សាការសម្ងាត់?។ 

ឧត្តមសេនីយ៍ទោ ឆេង ឃុន នាយករងនាយកដ្ឋានភូមិសាស្រ្ត:«ខ្ញុំសូមបញ្ជាក់ជូនថា ចំពោះប្លង់បង្ហាញទីតាំងភូមិសាស្ត្រ និងបង្គោលព្រំដែន ដែលអ្នកនាំពាក្យរងយោធាថៃ ក៏ដូចជារដ្ឋបាលខេត្តស្រះកែវ និងបណ្តាញព័ត៌មានថៃ យកមកបង្ហាញ និងផ្សព្វផ្សាយនេះ មានចុះហត្ថលេខាដោយលោក ឡាយ សៀងលី (អតីតប្រធានក្រុមវាស់វែងខាងកម្ពុជា) និងវរៈសេនីយ៍ឯក ឆាខន ប៊ុនផាក់ឌី (អតីតប្រធានក្រុមវាស់វែងខាងថៃ) គឺជាប្លង់ដែលបញ្ជាក់អំពីទីតាំងបង្គោលព្រំដែន ប៉ុណ្ណោះ។

ប្លង់នេះត្រូវបានធ្វើ និងចុះហត្ថលេខារួមគ្នាដោយប្រធានក្រុមវាស់វែងចម្រុះកម្ពុជា-ថៃ ក្រោយពេលដែលភាគីទាំងពីរបានចុះពិនិត្យ និងផ្ទៀងផ្ទាត់លើទីតាំងពិតប្រាកដនៃបង្គោលព្រំដែនដែលបានបោះកាលពីសម័យបារាំង ហើយមិនមែនជាផែនទីឬជាឯកសារដែលនិយាយ ឬបញ្ជាក់ពីខ្សែព្រំដែនឡើយ។ ដូច្នេះការលើកឡើងថា ការចុះហត្ថលេខារបស់លោក ឡាយ សៀងលី លើប្លង់ទីតាំងបង្គោលទាំងនេះ គឺជាការទទួលស្គាល់ខ្សែព្រំដែន ពុំមែនជាការពិតនោះទេ»។

ដោយឡែកលោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC)​ បានលើកឡើងឲ្យដឹងដែរថា៖​ ការបោសម្អាតមីនមនុស្សធម៌គាំទ្រសុខសុវត្ថិភាព​ និងការកសាងហេដ្ឋារចនាសម្ពន័្ធរូបវន្ត​ ព្រមទាំងសេដ្ឋកិច្ចសង្គម​ដល់ប្រជាពលរដ្ឋខ្មែររស់នៅភូមិជោគជ័យ​ ភូមិអូរបីជាន់​ និងភូមិព្រៃចាន់​ ក៏ដូចជាភូមិករនានាតាមបណ្តោយព្រំដែនខ្មែរ-ថៃ​ ត្រូវបានរាជរដ្ឋាភិបាលកម្ពុជា​យកចិត្តទុកដាក់បំផុត​ចាប់តាំងពីឆ្នាំ១៩៩២-៩៣​ មកម្លេះ​។

លោក ហេង រតនា​ បានបញ្ជាក់ថា​ ក្រៅពីនេះកម្ពុជាបានចាប់ផ្តើម​ និងបានចែកចេញជាដំណាក់កាលសំខាន់ ដូចជា​ ១.​ ឆ្នាំ១៩៩២-១៩៩៨​​ ដំណាក់កាលធ្វើការបោសសម្អាតមីនដើម្បីបើកផ្លូវសុវត្ថិភាពក្នុងការធ្វើមាតុភូមិវិវត្តន៍និងគាំទ្រការតាំងទីលំនៅ​ និងកសាងជីវភាពថ្មីទាំងក្នុងឆ្នាំ១៩៩២​-៩៣​ និងក្រោយការបោះឆ្នោតឆ្នាំ១៩៩៣។ ២.​ ឆ្នាំ១៩៩៨-២០០៣​ដំណាក់កាលនៃការបោសសម្អាតមីនដេីម្បីគាំទ្រសុវត្ថិភាពនិងការអភិវឌ្ឍសេដ្ឋកិច្ចសង្គម​ ជាដេីម។ ការដំណេីរការបោសម្អាតមីនមនុស្សធម៌នៅទីតាំងទាំងនេះមានសហគមន៍អន្តរជាតិច្រេីនណាស់បានដឹងឭ​ និងចងចាំការពិតនេះ​ ព្រោះថាសហគមន៍អន្តរជាតិទាំងនោះបានចូលរួមអនុវត្តដោយផ្ទាល់ផងដែរ។

លោក ហេង រតនា​ បានបន្តទៀតថា​ រឿងជម្លោះខ្សែរបន្ទាត់ព្រំដែននៅតំបន់ទាំងនេះ​ ក្រុមការងារព្រំដែនទាំងខ្មែរ​ និងសៀមបានជួបពិភាក្សាគ្នាច្រើនលើកច្រើនសារហើយ​ ប៉ុន្តែមិនទាន់បានដោះស្រាយនៅឡើយ (ដូចខ្លឹមសារនៃសេចក្តីប្រកាសបដិសេដព័ត៌មាន)​ របស់រដ្ឋលេខាធិការកិច្ចការព្រំដែនបានបញ្ជាក់យ៉ាងច្បាស់លាស់​កាលពីថ្ងៃទី២១កញ្ញា។

លោកថា​ ប្រសិនពិតជាអ្នកជិតខាងគ្នាល្អ​មែននោះ​ យន្តការដោះស្រាយទំនាស់ដោយសន្តិវិធីមានគ្រប់ឋានានុក្រម​ មិនត្រូវប្រើប្រាស់កម្លាំង​ និងច្បាប់សឹកអ្វីនោះទេ​ ព្រោះទង្វើបែបនេះបង្កើនអរិភាពនឹងគ្នាកាន់តែខ្លាំងក្លាថែមទៀត៕