កម្ពុជាទាមទារនិងប្តឹងឲ្យថៃបញ្ជូនកងទព័ដែលបោកចាប់ខ្លួនមកកម្ពុជាវិញ!
21-September-2026 / សន្តិសុខសង្គម
ឧត្តរមានជ័យ៖ព្រឹកថ្ងៃទី១សីហាមានតែទាហានកម្ពុជាចំនួន២នាក់ ប៉ុណ្ណោះក្នុងចំណោមឈ្លើយសឹកយោធាកម្ពុជា២០នាក់ដែលថៃប្រើល្បិចចាប់ខ្លួនត្រូវបានភាគីថៃប្រគល់ត្រឡប់មកវិញហើយ នៅច្រកទ្វារព្រំដែនអន្ដរជាតិអូរស្មាច់ ខេត្តឧត្តរមានជ័យ។យោធា២រូបនោះក្នុងនោះមាន៖១-លោកអនុសេនីយ៍ត្រ អាង អឿង អាយុ៣៧ឆ្នាំ។២-លោកពលបាលឯក ម៉ម វុទ្ធី អាយុ៥៣ឆ្នាំ។យោធាទាំងពីររូបនេះសុទ្ធតែមានសុខភាពទ្រុឌទ្រោម។
ថ្លែងក្នុងសន្នីសីទសារព័ត៌មាន នាព្រឹកថ្ងៃទី០១ ខែសីហាដែរលោកស្រីឧត្តមសេនីយ៍ឯក ម៉ាលី សុជាតា បានគូសបញ្ជាក់ថា «កម្ពុជាក៏បានស្នើឱ្យម៉ាឡេស៊ីដែលជាប្រធានអាស៊ានឱ្យជួយអន្តរាគមន៍ដើម្បីជំរុញឱ្យភាគីថៃឆាប់ប្រគល់ពួកគេឱ្យយើងវិញ។ ដូច្នេះក្រសួងការពារជាតិ កងយោធពខេមរភូមិន្ទ នឹងមិនទុកសមាជិករបស់ខ្លួនណាម្នាក់ចោលនោះទេ ទោះក្នុងកាលៈទេសៈណាក៏ដោយ»។
ដោយឡែកលោកទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា ក៏បានផ្ញើលិខិតជូនចំពោះ លោក Volker Türk ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) វិមានប្រជាជាតិ (Palais des Nations) CH-1211 ហ្សឺណែវ ១០ ប្រទេសស្វីស ស្នើសុំអន្តរាគមន៍ជាបន្ទាន់លើករណីការឃុំខ្លួនដោយខុសច្បាប់ ការធ្វើទារុណកម្ម និងការបញ្ជូនកងទ័ពកម្ពុជាមួយចំនួនតូច ក្នុងចំណោមកងទ័ពចំនួន ២០នាក់ ដោយកងយោធាថៃផងដែរ។
លោកទេសរដ្ឋមន្ត្រី កែវ រ៉េមី បានបញ្ជាក់ក្នុងលិខិតថា កម្ពុជា គឺជាប្រទេសមួយដែលស្រឡាញ់សន្តិភាព និងខិតខំប្រឹងប្រែងធានាឱ្យបាននូវសន្តិភាព ស្ថិរភាព និងសុខដុមរមនាក្នុងតំបន់ ព្រោះប្រទេសកម្ពុជាមានប្រវត្តិឆ្លងកាត់សង្គ្រាមជាច្រើនទសវត្សរ៍។ ក្នុងស្មារតីនៃ ការគោរពគ្នាទៅវិញទៅមក និងការរួមរស់ដោយសន្តិភាព ។កម្ពុជាបានប្រកាន់ខ្ជាប់យ៉ាងពេញលេញនូវកិច្ចព្រមព្រៀង បទឈប់បាញ់ថ្មីៗនេះជាមួយប្រទេថៃ ដែលបញ្ជាក់ពីការប្តេជ្ញាចិត្តក្នុងការស្វែងរក និងការកសាងសន្តិភាព តាមរយៈការសន្ទនា និងកិច្ចសហប្រតិបត្តិការ។
កម្ពុជាបានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់សហគមន៍អន្តរជាតិ និងសម្តែងការកោតសរសើរយ៉ាងជ្រាលជ្រៅចំពោះសេចក្តីប្រកាសព័ត៌មានរួម ដែលចេញដោយរាជរដ្ឋាភិបាលម៉ាឡេស៊ី កម្ពុជា និងថៃ បន្ទាប់ពីកិច្ចប្រជុំពិសេស ដែលរៀបចំដោយនាយករដ្ឋមន្ត្រី អានវ៉ាអ៊ីប្រាហ៊ីម(Dato' Seri Anwar Ibrahim) នៅទីក្រុងពុតត្រាចាយ៉ា ប្រទេសម៉ាឡេស៊ី។ ក្រោមគំនិតផ្តួចផ្តើមដ៏សំខាន់របស់លោកប្រធានាធិបតី Donald J. Trump ដោយមានការចូលរួមពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា លោក Phumtham Wechayachai នាយករដ្ឋមន្ត្រីស្តីទីរបស់ប្រទេសថៃ និងសហការរៀបចំដោយសហរដ្ឋអាមេរិក ជាមួយនឹងការចូលរួមយ៉ាងសកម្មពីសាធារណរដ្ឋប្រជាមានិតចិន បានបង្ហាញពីការប្តេជ្ញាចិត្តរួមគ្នាក្នុងការស្វែងរកដំណោះស្រាយដោយសន្តិវិធីចំពោះ ស្ថានភាពដែលកំពុងកើតមានតាមរយៈមធ្យោបាយការទូត ច្បាប់អន្តរជាតិ និងសាមគ្គីភាពក្នុងតំបន់។
គណៈកម្មាធិការសិទ្ធិមនុស្សកម្ពុជា (CHRC) បានលើកឡើងថា ចំពោះទង្វើខុសច្បាប់របស់កងកម្លាំងប្រដាប់អាវុធថៃ ដែលជាការរំលោភបំពានយ៉ាងធ្ងន់ធ្ងរលើច្បាប់មនុស្សធម៌អន្តរជាតិ ច្បាប់សិទ្ធិមនុស្ស និងគោលការណ៍យុត្តិធម៌ និងសេចក្តីថ្លៃថ្នូររបស់មនុស្សដែលត្រូវបានទទួលស្គាល់ជាសកល។បន្ទាប់ពីកិច្ចព្រមព្រៀងបទឈប់បាញ់កម្ពុជា-ថៃ ក្នុងជម្លោះប្រដាប់អាវុធថ្មីៗនេះនៅជិតប្រាសាទព្រះវិហារ និងតំបន់ព្រំដែនជាប់គ្នា កងកម្លាំងយោធាថៃបានឃុំខ្លួនទាហានកម្ពុជា ដែលមានសុខភាពល្អ និងមានសមត្ថភាព ពេញលេញចំនួន ២០ (ម្ភៃ)នាក់ ដោយខុសច្បាប់។ ទង្វើនេះបានកើតឡើងបន្ទាប់ពីកិច្ចព្រមព្រៀងឈប់បាញ់ ចូលជាធរមាន ហើយដូច្នេះជាការរំលោភបំពានយ៉ាងធ្ងន់ធ្ងរលើទំនុកចិត្ត និងច្បាប់អន្តរជាតិ។
