កម្ពុជាប្រកាសប្រើយន្តការតុលាការ ICJថៃថាប្រើJBC
21-September-2026 / សន្តិសុខសង្គម
ប្រទេសថៃ:នៅថ្ងៃទី៤ ខែមិថុនានេះ រដ្ឋាភិបាលថៃបានចេញសេចក្តីថ្លែងការណ៍មួយបញ្ជាក់ថា ប្រទេសថៃត្រៀមខ្លួនជាស្រេចក្នុងការចរចាជាមួយកម្ពុជា តាមរយៈយន្តការទ្វេភាគី (JBC)ដែលមានស្រាប់។ ជាការអះអាងរបស់ថៃគឺបន្ទាប់ពីកម្ពុជាលើកឡើងពីជំហររបស់ខ្លួនក្នុងការស្វែងរកដំណោះស្រាយ ដោយប្រើប្រាស់យន្តការតុលាការយុត្តិធម៌អន្តរជាតិ ICJ ពាក់ព័ន្ធនឹងបញ្ហាព្រំដែន ក្រោយពីយោធាប្រទេសទាំងពីរបានប៉ះទង្គិចគ្នា កាលពីថ្ងៃទី២៨ ខែឧសភា។
សេចក្តីថ្លែងការណ៍បញ្ជាក់ថា “ចំពោះជំហររបស់កម្ពុជាក្នុងការប្រើប្រាស់យន្តការតុលាការ ឬភាគីទីបី ដើម្បីពិចារណាលើបញ្ហានេះ ប្រទេសថៃដែលជាប្រទេសជិតខាងរបស់កម្ពុជា ប្តេជ្ញាដោះស្រាយបញ្ហាដោយសន្តិវិធីផ្អែកលើច្បាប់អន្តរជាតិ សន្ធិសញ្ញា និងកិច្ចព្រមព្រៀងនានាដូចជា អនុស្សារណៈនៃការយោគយល់គ្នា(MOU) ឆ្នាំ២០០០ និងភស្តុតាងផ្សេងៗ រួមទាំងរូបភាពពីផ្កាយរណប”។ ប្រទេសថៃត្រៀមខ្លួនជាស្រេចក្នុងការចរចាជាមួយកម្ពុជាតាមរយៈយន្តការទ្វេភាគីដែលមានស្រាប់ រួមមាន៖
-គណៈកម្មាធិការព្រំដែនរួម(JBC) ដែលជាយន្តការបច្ចេកទេស ដែលបង្កើតឡើងដោយអនុស្សរណៈនៃការយោគយយល់គ្នា(MOU) ឆ្នាំ២០០០ ដើម្បីពិភាក្សាអំពីការវាស់វែង និងកំណត់ព្រំដែន។ ភាគីកម្ពុជាបានយល់ព្រមតាមសំណើរបស់ប្រទេសថៃ សម្រាប់កិច្ចប្រជុំមួយ ដែលកម្ពុជាធ្វើជាម្ចាស់ផ្ទះ ហើយគ្រោងនឹងធ្វើឡើង នៅថ្ងៃទី១៤ ខែមិថុនា ឆ្នាំ២០២៥។-គណៈកម្មាធិការព្រំដែនទូទៅថៃ-កម្ពុជា (GBC) ដែលជាយន្តការថ្នាក់រដ្ឋមន្ត្រីការពារជាតិរវាងប្រទេសទាំងពីរ។ គណៈកម្មាធិការព្រំដែនតំបន់(RBC) ដែលជាយន្តការថ្នាក់មេបញ្ជាការយោធាតំបន់នៃប្រទេសទាំងពីរ។
សេចក្តីថ្លែងការណ៍របស់រដ្ឋាភិបាលថៃបញ្ជាក់ទៀតថា គណៈកម្មាធិការព្រំដែនទូទៅ(GBC) និងគណៈកម្មាធិការព្រំដែនតំបន់(RBC) សុទ្ធតែមានទំនួលខុសត្រូវចម្បងក្នុងការ ថែរក្សាស្ថានភាពព្រំដែនឱ្យមានសន្តិភាព។ លើសពីនេះ រដ្ឋាភិបាលទាំងពីរបានយល់ព្រមផ្តល់អាទិភាពដល់ការធ្វើទំនាក់ទំនង ជាមួយប្រជាពលរដ្ឋ ដើម្បីទប់ស្កាត់ការយល់ច្រឡំរវាងប្រជាជននៃប្រទេសទាំងពីរ។រដ្ឋាភិបាលថៃបាននិយាយថា ស្ថានភាពបច្ចុប្បន្ននៅតាមបណ្តោយព្រំដែនថៃ-កម្ពុជា មានសន្តិភាពជាទូទៅហើយ និងបានបង្ហាញការជឿជាក់ថា ប្រទេសថៃ និងកម្ពុជា អាចដោះស្រាយបញ្ហារួមគ្នាបានដោយផ្អែកលើមូលដ្ឋាននៃភាពជាអ្នកជិតខាងល្អ សន្តិសុខ និងសុខុមាលភាពរបស់ប្រជាជនរស់នៅតាមព្រំដែន ក្នុងនាមជាសមាជិកគ្រួសារអាស៊ាន។
ទាក់ទងនិងការចរចារនេះភាគីកម្ពុជាបានឲ្យដឹងថាកម្ពុជានឹង ធ្វើជាម្ចាស់ផ្ទះរៀបចំកិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែនគោក (JBC) កម្ពុជា-ថៃ នាថ្ងៃទី១៤ ខែមិថុនា ឆ្នាំ២០២៥ ខាងមុខនេះ នៅរាជធានីភ្នំពេញ។ នេះបើតាមការបញ្ជាក់របស់ លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ។លោកបានបញ្ជាក់ថា ក្នុងជំនួបទ្វេភាគីនៅទីក្រុងតូក្យូ ថ្ងៃទី៣០ ឧសភា ២០២៥ រដ្ឋមន្ត្រីការបរទេសរបស់ប្រទេសទាំងពីរ បានឯកភាពប្រកាន់ស្មារតីនៃការគោរពអនុស្សរណៈនៃការយោគយល់គ្នាឆ្នាំ២០០០ ស្តីពីការវាស់វែង និងខណ្ឌសីមាព្រំដែនគោកកម្ពុជា-ថៃ និងប្រើប្រាស់គ្រប់យន្តការដែលមានស្រាប់ ជាពិសេសជំរុញយន្តការ គណៈកម្មការចម្រុះខណ្ឌសីមា និងបោះបង្គោលព្រំដែនគោក (JBC) ជួបពិភាក្សាការងារគ្នាឱ្យបានឆាប់តាមដែលអាចធ្វើទៅបាន ដើម្បីដោះស្រាយបញ្ហាព្រំដែន ដោយផ្ដោតសំខាន់ទៅលើតំបន់ដែលបានកើតហេតុនាពេលថ្មីនេះ។«ក្នុងស្មារតីនេះ កម្ពុជាបានឯកភាព ធ្វើជាម្ចាស់ផ្ទះរៀបចំកិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែនគោក (JBC) កម្ពុជា-ថៃ នាថ្ងៃទី១៤ ខែមិថុនា ឆ្នាំ២០២៥ នៅរាជធានីភ្នំពេញ។ ក្រសួងការបរទេស និងសហប្រតិបត្តិការអន្តរជាតិ បានជូនព័ត៌មាននេះជាផ្លូវការទៅភាគីថៃរួចហើយ»។
សូមបញ្ជាក់ថាកាលពីថ្ងៃទី១ ខែមិថុនា សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសថា កម្ពុជាប្រកាន់ជំហរដោះស្រាយបញ្ហាព្រំដែនដោយសន្តិវិធីតាមរយៈការប្រើប្រាស់យន្តការបច្ចេកទេស និងច្បាប់អន្តរជាតិជាគោល។ សម្តេចបវរធិបតី ក៏បានបញ្ជាឲ្យគណៈកម្មការព្រំដែនចម្រុះ(JBC) កម្ពុជា ត្រៀមដាក់ចូលក្នុងរបៀបវារៈសម្រាប់កិច្ចប្រជុំJBC ពាក់ព័ន្ធនឹងការយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅតុលាការយុត្តិធម៌អន្តរជាតិ(ICJ)។ការប្រកាសរបស់សម្តេចបវរធិបតី ហ៊ុន ម៉ាណែត គឺបន្ទាប់ពីមានហេតុការណ៍ប៉ះទង្គិចគ្នាដោយប្រដាប់អាវុធ រវាងទាហានកម្ពុជា និងថៃ នៅតំបន់មុំបីនៃខេត្តព្រះវិហាររបស់កម្ពុជាជាប់ស្រុកណាំយឺននៃខេត្តឧប៊ុនរបស់ថៃ កាលពីព្រឹកព្រលឹមថ្ងៃទី២៨ ខែឧសភា៕
