សម្តេចមហាបវរធិបតី ហ៊ុន ម៉ាណែត រំលើករឿងអ្នកនយោបាយបក្សប្រឆាំង ពេលបាន ៥៥កៅអីនៅរដ្ឋសភា មិនដែលបានទៅទាក់ទាញអ្នកវិនិយោគពីក្រៅប្រទេស
21-September-2026 / ផ្សេងៗ
ភ្នំពេញ៖ សម្តេចបហាវបរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី២៧ ខែមេសា ឆ្នាំ២០២៥នេះ បានថ្លែងខ្លាំងៗ ដោយបានចោទជាសំណួរមួយចំនួន ដើម្បីបងប្អូនប្រជាពលរដ្ឋ កម្មករ និងយោជិតពិចារណា អំពីទង្វើរបស់ក្រុមអ្នកនយោបាយបក្សប្រឆាំង ដែលមិនបានអ្វីសោះសម្រាប់ជួយទាក់ទាញអ្នកវិនិយោគមកកម្ពុជា ផ្ទុយទៅវិញ ថែមទាំងអំពាវនាវមិនឱ្យគេមកវិនិយោគនៅកម្ពុជា។
ក្នុងឱកាសអញ្ជើញសំណេះសំណាលជាមួយ សហជីពសេដ្ឋកិច្ចក្រៅប្រព័ន្ធ នៅមជ្ឈមណ្ឌលជ្រោយចង្វារ នាព្រឹកថ្ងៃទី២៧ ខែឧសភា ឆ្នាំ២០២៥សម្តេចបានថ្លែងដូច្នេះថា «សួរថាពីពេលដែលគាត់ នៅជាសមាជិកសភាពេលនោះ មានទៅទាក់ទាញវិនិយោគមកទេ? យើងមិនមែនជាការងារផ្តាច់មុខនោះទេ ហើយសិទ្ធិសេរីភាពក្នុងការការពារអត្ថប្រយោជន៍ប្រជាពលរដ្ឋ ក៏មិនមែនជាកាតព្វកិច្ច និងសិទ្ធិផ្តាច់មុខរបស់រដ្ឋាភិបាលនោះដែរទេ តាំងតែពីរដ្ឋាភិបាលអាមេរិកប្រកាសដាក់ពន្ធ ថ្ងៃទី២ មេសា មកដល់ម៉ោងនេះ យើងមានតំណាងសហជីព សហព័ន្ធ សរសរសំបុត្រសុំឱ្យអាមេរិក គិតគូរពីផលប្រយោជន៍របស់បងប្អូនរបស់យើង ក្រុមហ៊ុនអាមេរិក សភាពាណិជ្ជកម្មអាមេរិក សុទ្ធតែខំប្រឹងទាំងអស់គ្នា ធ្វើបាន មិនបាន មិនសំខាន់ សំខាន់មានទឹកចិត្ត»។
សម្តេចមហាបវរធបិតី ហ៊ុន ម៉ាណែត បានថ្លែងលើកបង្ហាញបទពិសោធន៍ប្រទេសនានាថា ពេលមានបញ្ហា ពិសេសបញ្ហាពន្ធអាមេរិក ទាំងអ្នកនយោបាយដឹកនាំរាជរដ្ឋាភិបាល និងបក្សនយោបាយជំទាស់តែងតែរួមគ្នាដោះស្រាយបញ្ហារបស់ជាតិ។ ផ្ទុយពីកម្ពុជា អ្នកនយោបាយប្រឆាំងកេងចំណេញ រកការចំណេញផ្នែកនយោបាយគ្រប់បញ្ហា។សូមបញ្ជាក់ថាគណបក្សប្រឆាំងត្រូវបានតុលាការកំពូលរំលាយចោលកាលពីឆ្នាំ២០១៧ដែលបើតាមច្បាប់ស្តីពីគណបក្សនយោបានបណ្តាលឲ្យតំណាងរាស្ត្រត្រូវបាត់បង់សុពលភាពផងដែររហូតមកដល់បច្ចុប្បន្ន។
ទាក់ទងបញ្ហាការដាក់ពន្ធសម្តេចមហាបវរធិបតី នាយករដ្ឋមន្ត្រីកម្ពុជា បានថ្លែងថា អាមេរិកដំឡើងពន្ធលើទំនិញលើកម្ពុជា ក៏ដូចជាប្រទេសលើពិភពលោក ជាបញ្ហានៃការធ្វើពាណិជ្ជកម្ម ជាពិសេសអាមេរិកមើលឃើញពីគម្លាតនៃទំហំពាណិជ្ជកម្ម។សម្តេចមហាបវរធិបតី ហ៊ុន ម៉ាណែត បញ្ជាក់ថា «ហេតុអ្វីបានជាដាក់ពន្ធ? ដោយសារប្រធានាធិបតីអាមេរិក អាណត្តិនេះគិតថា មើលតួលេខទៅ ការនាំចេញនាំចូលទៅអាមេរិក ជាមួយប្រទេសផ្សេងៗ វាខុសគ្នាពេក គាត់គិតថាប្រទេសផ្សេងកេងចំណេញលើគាត់ច្រើន អីចឹងគាត់ចង់ធ្វើយ៉ាងម៉េចឲ្យគម្លាតហ្នឹងមិនច្រើន»។សម្តេចបានបន្តថា «ការជាប់ពន្ធនេះ ទី១ មិនមែនជាកំហុសរបស់យើងទេ គឺរដ្ឋាភិបាលអាមេរិកគិតថា គាត់ទាញផលទៅខាងគាត់ គ្មានប្រទេសណាខុស។ អីចឹងប៉ះ ១៨០ប្រទេស។ ទី២ យើងបានធ្វើអីខុសច្បាប់ឬទេ? តើយើងធ្វើថោកទាប ទៅកេងចំណេញគេទេ? អត់ទេ យើងធ្វើត្រឹមត្រូវតាមច្បាប់ ឯកភាពគ្នាតាមគោលការណ៍អង្គការពាណិជ្ជកម្មពិភពលោក»។
សូមបញ្ជាក់ថានៅថ្ងៃទី៣ ខែមេសា ឆ្នាំ២០២៥ លោក ដូណាល់ ត្រាំ បានសម្រេចកំណត់ពន្ធគយលើប្រទេសនានាជាសាកល ដោយបានដាក់លើទំនិញនាំចូលពីកម្ពុជាប្រមាណ៤៩% ដែលជាកម្រិតខ្ពស់មួយ ដើម្បីជាការសងសឹក ខណៈកម្ពុជាយកពន្ធនាំចូលទំនិញពីសហរដ្ឋអាមេរិកវិញ ក្នុងកម្រិត៩៧%។ បើតាមលោកត្រាំ ការដំឡើងពន្ធនេះ បានចូលជាធរមាននៅថ្ងៃទី៩ ខែមេសា ឆ្នាំ២០២៥ ប៉ុន្តែត្រូវបានពន្យារពេល ៩០ថ្ងៃ ដោយអនុវត្តពន្ធ ១០%ដដែល។
សម្តេចមហាបវរធិបតី ហ៊ុន ម៉ាណែត បានប្រកាសថា នឹងប្រឹងប្រែងចរចាជាមួយសហរដ្ឋអាមេរិក ពាក់ព័ន្ធការប្រកាសដំឡើងពន្ធ ៤៩ភាគរយលើទំនិញកម្ពុជា នាំទៅសហរដ្ឋអាមេរិក។ សម្តេចមហាបវរធិបតី ហ៊ុន ម៉ាណែត បានប្រកាសបែបនេះនៅក្នុងកិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រ ទី៤ ខែមេសា ឆ្នាំ២០២៥។
ពាក់ព័ន្ធបញ្ហាពន្ធនេះ សម្តេចមហាបវរធិបតី ហ៊ុន ម៉ាណែត បានកត់សម្គាល់ថា សហរដ្ឋអាម៉េរិកបាននិងកំពុងខាតបង់ច្រើនលើការចំណាយនាំចូលទំនិញពីបណ្តាប្រទេសលើពិភពលោក ដែលឆ្លុះបញ្ចាំងតាមរយៈឱនភាពជញ្ជីងពាណិជ្ជកម្ម (Trade Deficits) ដូច្នេះហើយ បានជារដ្ឋបាលប្រធានាធិបតី លោក ដូណាល់ ត្រាំ បានប្រកាសដាក់ចេញនូវអត្រាពន្ធនាំចូលឆ្លើយតប (Reciprocal Tarifts)លើបណ្តាប្រទេសដែលសហរដ្ឋអាម៉េរិកមានឱនភាពជញ្ជីងពាណិជ្ជកម្ម។
សម្ដេចមហាបវរធិបតី ហ៊ុន ម៉ាណែត បានមានប្រសាសន៍បែបនេះថា៖ «បងប្អូនហើយ ដើម្បីអី? ដើម្បីទាញចំណូលមកស្រុកខ្មែរដើមម្បីបង្កើតការងារឱ្យកូនចៅយើងនៅទីនេះ តើរដ្ឋភិបាលខុសទេ? អាហ្នឹងដូចឪពុក ម្ដាយ គេមើលងាយ អ្នកក្រ ឪពុក ម្ដាយ ទៅធ្វើការរើសអេតចាយ គេមើលងាយឪពុក ម្ដាយ តើកូនត្រូវមើលងាយឪពុកម្ដាយទេ? ឪពុក ម្ដាយ មិនបានទៅលួចគេយកមកចិញ្ចឹងកូនទេ។ គាត់មានលទ្ធភាពគាត់ទៅបើកហាងគុយទាវ តូចមួយអត់បានបើកហាងធំអីទេ ប៉ុន្តែឪពុកម្ដាយខំសន្សំបន្តិចម្ដងៗ ដោយសុច្ចរិតភាពដើម្បីយកមកចិញ្ចឹងកូន ដើម្បីយកមកទិញសម្ភារៈ ឱ្យកូនឱ្យច្រើន តើកូនត្រូវបន្ទោសឪពុក ម្ដាយទេ? រដ្ឋាភិបាលដូចគ្នា គេឌឺយើង យើងទៅស្មូមចិន ឱ្យមកវិនិយោគ មកធ្វើផ្លូវ ធ្វើសាលារៀន ធ្វើហេដ្ឋារចនាសម្ព័ន្ធ ដើម្បីបើករោងចក្រ ឱ្យអ្នកស្រុកមានការងារ គេឌឺយើងសព្វ សូម្បីតែប្រធានាធិបតីចិនមក គេថាយើងរើសស្ពៃមិនរើសសាច់គោ គេថាល្ងង់ គេថាយើងជញ្ចក់ឈាមរបស់អាមេរិកកាំង»។
ត្រង់ចំណុចនេះសម្ដេចនាយករដ្ឋមន្ត្រី បានអំនាវនាវទៅកាន់ប្រជាពលរដ្ឋថា៖ «បងប្អូនហើយ អ្វីដែលរដ្ឋាភិបាលធ្វើនៅក្នុងរយៈពេលរាប់សិបឆ្នាំមកនេះ គ្មានអីក្រៅពីដូចម្ដាយចិញ្ចឹងកូន គឺខំរកស៊ីដោយសុច្ចរិត ដើម្បីបង្កើតការងារឱ្យកូនចៅប្រជាពលរដ្ឋ រឿងប៉ុណ្ណឹង»។ […] ការសម្រេចចិត្តជាសិទ្ធិរបស់អាមេរិក យើងគ្មានជម្រើសអីទេ មានតែខិតខំអត្ថបរយោជន៍ដើម្បីឱ្យអ្វីដែលយើងខំកសាងបាននៅស្ថិតស្ថេ បានជាអត្ថបរយោជន៍ឱ្យបងប្អូនយើងឱ្យបាន»។
សម្ដេចមហាបវរធិបតី បានបញ្ជាក់ថា៖ «បងប្អូនហើយ គិតមើលទៅរដ្ឋាភិបាលគេមើលងាយរហូត ហើយអ្នកគេមើលងាយថាបរទេសចុះមើលងាយ តែខ្មែរគ្នាឯង អ្នកនយោបាយមួយចំនួនដែលថាស្រលាញ់កម្មករណាស់ ចង់ការពារកម្មរណាស់ តែខ្លួនគេមើលងាយតែរដ្ឋាភិបាល រដ្ឋាភិបាលខំការពារយ៉ាងមិច តែខ្លួនគេមិនបានស្នើសូមទៅអាមេរិកដើម្បីជួយគិតគូរផងទេ។ ការពារផលប្រយោជន៍កូនចៅប្រជាពលរដ្ឋរបស់ខ្ញុំ នេះដែលរដ្ឋាភិបាលត្រូវធ្វើ ការពារឆ្នាំងបាយ ការពារកំណើនសេដ្ឋកិច្ចរបស់ខ្ញុំ បងប្អូនប្រជាពលរដ្ឋរបស់ខ្ញុំ អ្នកឯងចង់ថាអីថាទៅ»។
ដើម្បីតែការពារផលប្រយោជន៍របស់ប្រជាពលរដ្ឋខ្មែរ ក្រុមការងារចរចារជាមួយសហរដ្ឋអាមេរិក ធ្វើការមិនមានពេលសម្រាកសោះឡើយសូម្បីតែក្នុងឱកាសពិធីបុណ្យចូលឆ្នាំថ្មីប្រពៃណីជាតិកន្លងទៅ ក៏ក្រុមការងាររដ្ឋាភិបាល នៅតែបន្តជួបចរចារជាមួយសហរដ្ឋអាមេរិកដែរ។ គ្របយ៉ាងទាំងអស់គឺរដ្ឋាភិបាលធ្វើឡើងដើម្បីតែ ការពារឆ្នាំងបាយ ការពារសេដ្ឋកិច្ច ការពារមុខរបររបស់បងប្អូនប្រជាពលរដ្ឋខ្មែរទាំងអស់គ្នា៕
