ចិនធើ្វការបង្ហាញគ្រឿងសព្វាវុធទំនើបៗជំនាន់ថ្មី ក្នុងឱកាសពិព័រណ៍យោធានៅប្រទេសអ៊ីរ៉ាក់
06-June-2026 / ព័ត៌មានអន្តរជាតិ
អ៊ីរ៉ាក់៖ នៅក្នុងព្រឹត្តិការណ៍ពិព័រណ៍យោធាលើកទី ១៣ របស់ប្រទេសអ៊ីរ៉ង់កាលពីចុងសប្តាហ៍កន្លងទៅ គេឃើញមានក្រុមហ៊ុនបច្ចេកវិទ្យាយោធារបស់ប្រទេសចិនជាច្រើន បានចូលរួមធើ្វការតាំងបង្ហាញបច្ចេកវិទ្យាគ្រឿងសព្វាវុធជំនាន់ថ្មីរបស់ខ្លួននៅក្នុងរដ្ឋធានីបាកដាដ ដើម្បីទាក់ទាញចំណាប់អារម្មណ៍ពីក្រុមមេដឹកនាំលើពិភពលោក។
ការតាំងពិព័រណ៍ដែលមានរយៈពេល៤ថ្ងៃនេះ មានការចូលរួមពីបណ្តាក្រុមហ៊ុនបច្ចេកវិទ្យាយោធាសរុប ១៥៥ ដែលមកពីប្រទេសសរុបចំនួន ២៤ នៅជុំវិញពិភពលោក។ វាជាឱកាសមួយសម្រាប់ការបង្ហាញនូវគំនិតច្នៃប្រឌិតចុងក្រោយបង្អស់ក្នុងវិស័យការពារជាតិ និងសន្តិសុខប្រព័ន្ធអ៊ីនធឺណិត ក៏ដូចជាបច្ចេកវិទ្យាជំនាន់ថ្មីផ្នែកការទំនាក់ទំនង តាមដានឃ្លាំមើល និងឧបករណ៍ប្រើប្រាស់របស់ប៉ូលីស។
ពាក់ព័ន្ធនឹងគ្រឿងបច្ចេកវិទ្យាយោធាចុងក្រោយរបស់ប្រទេសចិនវិញ គេបានឃើញមានដូចជា យន្តហោះដ្រូនគ្មានមនុស្សបើកជាច្រើនគ្រឿង និងប្រព័ន្ធមីស៊ីលវាយប្រហារផ្លូវអាកាស ប្រព័ន្ធរ៉ាដាទំនើប និងប្រភេទរថពាសដែកជំនាន់ថ្មីមួយចំនួនផ្សេងទៀត ដែលបង្ហាញពីការរីកចម្រើនឆាប់រហ័សរបស់ប្រទេសចិនក្នុងវិស័យអភិវឌ្ឍយោធា និងបច្ចេកវិទ្យាឈ្លបយកការណ៍សង្ងាត់។
អ្នកជំនាញចិនមួយរូបដែលបានចូលរួមតាំងបង្ហាញគ្រឿងបច្ចេកវិទ្យារបស់ខ្លួន បានបញ្ជាក់ឱ្យដឹងថា “ក្រុមហ៊ុនបច្ចេកវិទ្យាយោធាចិន មានគោលដៅជំរុញកិច្ចសហប្រតិបត្តិការវិស័យការពារជាតិជាមួយប្រទេសអ៊ីរ៉ាក់ ដើម្បីជួយពង្រឹងហេដ្ឋារចនាសម្ព័ន្ធយោធារបស់ប្រទេសមួយនេះ តាមរយៈការចែករំលែកគ្រឿងបច្ចេកទេស និងបង្វឹនបង្វឺនជំនាញការយោធា។
នៅក្នុងការថ្លែងសុន្ទរកថាមួយរបស់នាយករដ្ឋមន្ត្រីអ៊ីរ៉ាក់ លោក Al-Sudani លោកបានសង្កាត់ធ្ងន់ពីសារៈសំខាន់ក្នុងការរៀបចំព្រឹត្តិការណ៍ពិព័រណ៍យោធាខាងលើ សម្រាប់ជាវេទិការលើកស្ទួយគំនិតច្នៃប្រឌិតផ្នែកវិទ្យាសាស្ត្រ និងបច្ចេកវិទ្យារវាងប្រទេសអ៊ីរ៉ាក់ ជាមួយបណ្តាក្រុមហ៊ុនជាដៃគូលើពិភពលោក។
សូមបញ្ជាក់ថាបើយោងតាមសារព័ត៌មាន VOA ចេញផ្សាយកាលពីថ្ងៃទី១២ ខែមីនា ឆ្នាំ២០២៤ បានឱ្យដឹងថា នៅឯការប្រមូលផ្តុំនៃ កងទ័ពរំដោះប្រជាជនចិន ឬ PLA និងប្រតិភូកងកម្លាំងប៉ូលីសប្រដាប់អាវុធ ទៅកាន់សភាប្រជាជនជាតិ អំពី “សមត្ថភាពប្រយុទ្ធប្រកបដោយគុណភាពថ្មី” លោក ស៊ី ជិនពីង បានអំពាវនាវដល់យោធាឱ្យពង្រឹង កំណែទម្រង់របស់ខ្លួនឱ្យកាន់តែស៊ីជម្រៅ និងលើកកម្ពស់ការច្នៃប្រឌិត ដើម្បីបង្កើនសមត្ថភាពយុទ្ធសាស្ត្រ ឱ្យលេចធ្លោក្នុងតំបន់។ក្នុងកិច្ចប្រជុំនោះ គឺអ្នកតំណាងយោធាចំនួនប្រាំមួយរូប បាននិយាយអំពីប្រធានបទជាច្រើន ពីសមត្ថភាពការពារជាតិនៅក្នុងអ៊ីនធឺណែត និងការអនុវត្ត AI រហូតដល់ការអភិវឌ្ឍន៍ និងការប្រើប្រាស់សមត្ថភាពប្រយុទ្ធគ្មានមនុស្ស។
លោក ឆុង ឈៀ ជាមួយមូលនិធិគោលនយោបាយជាតិ នៅទីក្រុងតៃប៉ិ បាននិយាយថា ដោយផ្អែកលើការកត់សម្គាល់របស់លោក ស៊ី នៅក្នុងកិច្ចប្រជុំ និងយោបល់នៅក្នុងសុន្ទរកថាកន្លងមក “សមត្ថភាពប្រយុទ្ធប្រកបដោយគុណភាពថ្មី” របស់គាត់ហាក់ដូចជាសំដៅ ទៅលើសមត្ថភាពប្រយុទ្ធដ៏ឆ្លាតវៃ។ជាឧទាហរណ៍ ជាមួយនឹងការប្រើប្រាស់ AI គឺយោធាកំពុងស្វែងរកការបង្កើនល្បឿននៃការប្រយុទ្ធ កាត់បន្ថយពេលវេលាដែល ត្រូវការសម្រាប់កិច្ចការជាច្រើន ដូចជាការស្វែងរកគោលដៅ ការវាយប្រហារពីដែនអាកាស ក៏ដូចជាប្រតិបត្តិការនៅជិតភ្លាមៗ និងសូម្បីតែការគ្រប់គ្រងដំណាលគ្នារបស់ យានយន្តប្រយុទ្ធគ្មានមនុស្សបើកជាច្រើនគ្រឿង។ លោកថា សម្រាប់មហាអំណាចយោធា អ្នកណាដែលអាចស្ទាត់ជំនាញរបៀបប្រយុទ្ធថ្មីមុនគេ គឺនឹងមានប្រៀបជាងគូប្រជែង។
