ស្ទាវអះអាងថាក្រុមការងារកញ្ញាធីសុវណ្ណថា ប្រើអំពើរហិង្សាទៅលើស្ត្រីនេសាទម្នាក់របួសធ្ងន់
16-November-2025 / សន្តិសុខសង្គម
កណ្តាល៖ ស្ត្រីម្នាក់បានរងរបួសធ្ងន់ បែកមាត់ហូរឈាមពេញខ្លួនបង្កឡើងដោយជនសង្ស័យពីរនាក់ ម្នាក់ដែលអះអាងថាខ្លួនជាក្រុមការងាររបស់កញ្ញា ធី សុវណ្ណថា ក្រោយពីពួកគេ បានធ្វើការឃាត់ទូកជនរងគ្រោះសង្ស័យនេសាទខុសច្បាប់ (ឆក់ត្រី) រហូតឈានដល់ការឈ្លោះប្រកែកគ្នាប្រើអំពើរហិង្សាតែម្តងកាលពីថ្ងៃទី២៨ ខែតុលា ឆ្នាំ២០១៨ វេលាម៉ោង២១ និង៣០នាទី នៅចំណុចចុងព្រែកឃ្លោក ស្ថិតក្នុងភូមិថ្កុល ឃុំត្រើយស្លា ស្រុកស្អាង ខេត្តកណ្តាល។
លោកវរសេនីយ៍ សេង សុជាតិ អធិការនគរបាលស្រុក ស្អាងបានឱ្យកាសែតដឹងថា ជនរងគ្រោះ ឈ្មោះ ឆេង មុំ ភេទស្រី អាយុ៣៤ឆ្នាំ ជនជាតិខ្មែរ មុខរបរកសិករបច្ចុប្បន្នមានទីលំនៅភូមិទួលក្តី ឃុំត្រើយស្លា ស្រុកស្អាង ខេត្តកណ្តាល។ ចំណែកជនសង្ស័យមានចំនួន២នាក់ ទី០១ឈ្មោះ ហ្វី សើគីនីន ភេទប្រុស អាយុ២០ឆ្នាំ ជនជាតិខ្មែរ មុខរបរ មិនពិតប្រាកដ (ប្រាប់ថាជាក្រុមការងាររបស់កញ្ញា ធី សុវណ្ណថា) មានទីលំនៅ ភូមិច្រាំងចំរេះ១ សង្កាត់ច្រាំងចំរេះ១ ខណ្ឌឬស្សីកែវ រាជធានីភ្នំពេញ។
ទី០២ឈ្មោះ លី ម៉ាត់សារី ភេទប្រុស អាយុ២៤ឆ្នាំជនជាតិខ្មែរឥស្លាម មុខរបរសន្តិសុខសណ្តាប់ធ្នាប់ផ្សារព្រែកឃ្លោក មានទីលំនៅភូមិ លេខ២ សង្កាត់ច្រាំងចំរេះ១ ខណ្ឌឬស្សីកែវ រាជធានីភ្នំពេញ។ បច្ចុប្បន្នអ្នកទាំងពីរស្នាក់នៅភូមិព្រែកបាឡាត់ឆឹង ឃុំត្រើយស្លា ស្រុកស្អាងខេត្តកណ្តាល។
នៅថ្ងៃទី២៨ ខែតុលា ឆ្នាំ២០១៨ វេលាម៉ោង២១និង៣០នាទី មានឈ្មោះ ហុក ប៊ី ភេទប្រុស អាយុ៣៤ឆ្នាំកំពុងជិះទូកជាមួយប្រពន្ធឈ្មោះ ឆេង មុំ ដើម្បីបង្កៃសន្ទូចនៅចុងព្រែកឃ្លោក ពេលនោះមានឈ្មោះ ហ្វីសើគីនីន និងឈ្មោះលីម ម៉ាត់សារី ជិះម៉ូតូម្នាក់មួយគ្រឿងត្រឡប់ពីចំណុចពាមសូរតាមផ្លូវខាងត្បូងព្រែកឃ្លោកក៏បានជួបឈ្មោះ ហុក ប៊ី និងឈ្មោះ ឆេង មុំ កំពុងនេសាទត្រី។ជនសង្ស័យខាងលើមានការសង្ស័យអ្នកទាំងពីរនេសាទត្រីខុសច្បាប់ (ឆក់) ក៏បានសួរនាំថាពួកបងមានឃើញអ្នកឆក់ត្រីឬទេ? អ្នកទាំងពីរឆ្លើយថា ខ្ញុំរាយសន្ទូចទេ ពេលនោះជនសង្ស័យបានឃើញអាគុយចំនួន០១ នៅក្នុងទូកក៏បានសុំត្រួតពិនិត្យទូក ភ្លាមនោះឈ្មោះ ហុក ប៊ី មិនឱ្យត្រួតពិនិត្យក៏បញ្ឆេះម៉ាស៊ីនទូកចេញសំដៅទៅទិសខាងកើត(ពាមសូរ)បានចម្ងាយប្រហែល៥០០ម៉ែត្រទើប ឈ្មោះ លីម ម៉ាត់សារី និងឈ្មោះ ហ្វី សើគីនីន ជិះម៉ូតូដេញតាមរួចឈប់ កាត់មុខទូកក៏ឈ្មោះ លី ម៉ាត់សារី បានរើសដុំថ្មក្បែរផ្លូវ គប់សំដៅទូកជនរងគ្រោះចំនួន០១ដុំថ្ម។ ចំណែកឈ្មោះ ហ្វីសើគីនីន បានរើសដុំដីគប់សំដៅទូកជនរងគ្រោះចំនួន០២ដុំបណ្តាលឱ្យត្រូវចំមុខខាងស្ដាំ ឈ្មោះ ឆេង មុំ អង្គុយខាងក្បាលទូករបួសហូរឈាមតែម្តង។
សមត្ថកិច្ចប៉ុស្តិ៍ត្រើយស្លាបានអន្តរាគមន៍ដល់កន្លែងកើតហេតុនាំជនរងគ្រោះមកព្យាបាលនៅមណ្ឌលសុខភាពតាលន់ ចំនែកជនសង្ស័យបានឃាត់ខ្លួនមកប៉ុស្តិ៍រដ្ឋបាលត្រើយស្លាដើម្បីសាកសួរ និងបន្តអនុវត្តតាមនីតិវិធី។សមត្តកិច្ចដកហូតវត្ថុតាងចាប់យករួមមានដុំថ្មចំនួន០១ដុំ ម៉ូតូចំនួនចំនួន២គ្រឿង(ម៉ាកវេវអាល់ហ្វាពណ៌ក្រហមគ្មានផ្លាកលេខចំនួន០១គ្រឿងនិងម៉ូតូម៉ាកស៊ុយស៊ីគីស្មាសវីពណ៌ខ្មៅពាក់ផ្លាកលេខភ្នំពេញ1BL 5250ចំនួន១គ្រឿង)។
ពាក់ព័ន្ធនឹងករណីនេះ តកញ្ញា ធី សុវណ្ណថា បដិសេធថា មិនមែនជាក្រុមការងាររបស់កញ្ញា និងមិនមានការពាក់ព័ន្ធនឹងកញ្ញាឡើយ៕
